2022 ш., октиабр 27. Аҧсныпресс.  Аҧсны Жәлар Реизара Аиҳабы Лаша Ашәба ихантәаҩрала имҩаҧысит Жәлар Реизара  изаамҭану ҭагалантәи аилатәара. 

Жәлар Реизара аҟны ирыхәаҧшит, аҵыхәтәантәи аҧхьараан ирыдыркылеит Аҧсны Аҳәынҭқарра азакәанқәа рпроектқәа: "2022 шықәсазтәи Ареспубликатә биуџьет азы", Аҧсны Аҳәынҭқарра Азакәан аҧсахрақәа ралагаларазы". Арҭ азҵаатәқәа рыдигалеит абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Беслан Ҳалуашь.

Аҧсны Ахада Аслан Бжьаниа дидикылеит аспортсмен Баҭал Чежиа. Уи далахәхахьеит абоқс азы Урыстәыла ачемпионат, аицлабраҿы аҧхьахә араӡны даҧсахеит. Урыстәыла ачемпион ихьӡ аиуразы Баҭал Чежиеи Максим Смирнови Москва еиқәшәеит, 79 килограмм зыкапан ыҟоу рыбжьара. Аиндаҭлара хыркәшан еиҭахарала. Аха аӡбаҩцәа анеилацәажәа ашьҭахь аҧыжәара зауз Баҭал араӡны даҧсахеит.

Октиабр 30 рзы Гәдоуҭа араион Лыхны ақыҭан имҩаҧысит традициала ишьақәгылахьоу аҽаҩра аныҳәа "Лыхнашҭа". Жәлар рныҳәа иалахәын Аҧсны Аҳәынҭқарра Ахада Аслан Бжьаниа, уи ихаҭыҧуаҩ Бадра Гәынба, Аҧыза-министр актәи ихаҭыҧуаҩ Беслан Џьопуа, Аҧсны Жәлар Реизара адепутатцәа, Аиҳабыра Реилазаара иалоу, ауаажәларра.

Урыстәылатәи Афедерациа Аиҳабыра Рхантәаҩы ихаҭыҧуаҩ Алеқсандр Новак Аҧсни Аахыҵ-Уаҧстәылеи аус рыцуразы аиҳабырабжьаратә комиссиа ацхантәаҩыс дҟаҵоуп, Аиҳабыра Рхантәаҩы ихаҭыҧуаҩ Марат Хуснуллин ихаҭыҧан.

Аҧсны Жәлар Реизара  Аиҳабы  Лаша Ашәба дырҧылеит Беларуси Урыстәылеи Рпарламентбжьаратә Еизара аделегациа. Уи напхгара аиҭоит аҿартә политикеи, аспорти, атуризми рзы аилак ахантәаҩы Артиом Туров.

Октиабр 30 рзы Аҧсны иазгәарҭеит харада ахара рыдҵаны идырӡыз Рымш. Ари     аҽны аполитикатә репрессиақәа ирылаӡыз рбаҟа амҵан ашәҭқәа рышьҭаҵарахь инеит Аҧсны Аҳәынҭқарра Ахада Аслан Бжьаниа, уи ихаҭыҧуаҩ Бадра Гәынба, Аҧсны Ахада иусбарҭа аиҳабы Џьансыхә Нанба, Аҧсны Аиҳабыра Реилазаара ахантәаҩы актәи ихаҭыҧуаҩ Беслан Џьопуа, ихаҭыҧуаа Кристина Озган, Владимир Делба, харада ахара рыдҵаны идырӡыз рҭынхацәа, ауаажәларра рхаҭарнакцәа.

Аҧсны Ахада Аслан Бжьаниа идикылеит Беларуси Урыстәылеи Реидгыла Апарламентбжьаратә Еизара аделегациа.

Аҳәынҭқарра  Ахада иазгәеиҭеит азакәанҧҵаратәи мамзаргьы аҳәынҭқарратә напхгараҭаратә структурақәеи еиуеиҧшым рыҩаӡарақәа рҟны акырӡа шаҵанакуа аизыҟазаашьақәа рырҿиара.

Ааигәа имҩаҧысит Аҧсны Жәлар Реизара ҭагалантәи изаамҭанытәу аилатәара. Аилатәара аартын Аҧсны агимн арҳәарала. Амшхәаҧштә аҟны иқәгылан жәиҧшь зҵаара. Урҭ рахьынтә ҩ-зҵаарак ииаган иааиуа егьырҭ аилатәарақәа рышҟа, иҵегьы аус адуларазы.

Жәлар Реизара адепутатцәа аусура иалагеит акадртә зҵаарақәа рыӡбарала. Маӡалатәи абжьыҭарала Аҧсны Иреиҳаӡоу Аӡбарҭа аӡбаҩцәас ишьақәырҕәҕәоуп Екатерина Адлеиҧҳаи Беслан Берулааи. Иара убас акадртә зҵаарақәа рыӡбараан аконтрольтә палата аудиторс дшьақәырҕәҕәан Инга Чыркба. Уаанӡа апалата аудиторс иҟаз Беслан Кәыҵниа хатәгәаҧхарала ииҩыз арзаҳал инақәыршәаны ихы дақәиҭтәын.

Аҧсны Аҧыза-министр Алеқсандр Анқәаб Аҧсны астатистиказы Аҳәынҭқарратә еилакы анапхгара дырҧылеит. Абри аанацҳауеит Аиҳабыра Реилазаара апресс-маҵзура.

Аҧсны астатистиказы аҳәынҭеилакы аиҳабы Кама Гогиа октиабр 19 рзы Москва лыҟазаара алҵшәақәа дрылацәажәеит, иара убас Аҧсны астатистиказы аҳәынҭеилаки Урыстәыла аҳәынҭқарратә статистиказы афедералтә маҵзуреи рнапхгарақәа рнапы зҵарҩыз ашәҟәы инақәыршәаны еицымҩаҧыргараны иҟоу аусмҩаҧгатәқәа рплан дазааҭгылеит.

Аҧсны адәныҟатәи аусқәа рминистр Инал Арӡынба аиформациатә агентра «Спутник Абхазия» аҟны ахҳәаа азыҟаиҵеит В. Зеленски Ҟрым аӡбахә дахьалацәажәоз Аҧснгьы ахьигәалаиршәаз иазкны.

«Владимир Зеленски, украинатәи амчрақәа Ҟрым архынҳәразы, дара ртәала, ирымоу агәҭакы иазкны игәаанагара ахьиҳәоз Аҧснгьы игәалаиршәеит. Украина Апрезидент даҽазныкгьы аҭоурых ҽеила ишизымдыруа ааирҧшит, насгьы иаартны апровокациа ҟаиҵоит», иҳәеит И. Арӡынба.