Акурсқәа еиҿнакаауеит Аԥснытәи Аҳәынҭқарратә университет аҿы иҟоу аҵарадырра аизырҳареи акадрқәа реиҭазыҟаҵареи рзы Ареспубликатә центр.
Аусмҩаԥгатә аартуа, аҵарадырра аизырҳаразы Ареспубликатә центр анапхгаҩы Медеиа Ченгелиа иазгәалҭеит, иахьатәи аамҭа аҵарадырра аҟәша ахаҭарнакцәа рҿаԥхьа адҵа дуқәа шықәнаргыло, убри аҟнытә урҭ рзы еснагь аинформациатә технологиақәеи апрограмма ҿыцқәеи рҵара шхымԥадатәиу.
«Акурсқәа хықәкы хадас ирзықәгылоуп – арҵаҩы иусурҿы ихымԥадатәу аматематикеи афизикеи рырҵраҿы идыррақәа рыҩаӡара аизырҳара, атеориатә шьаҭа ҭбаа аԥҵара, акурс алахәылацәа иреиҳау ҳаамҭазтәи арҵаратә методқәа дырбара, насгьы урҭ апрактикаҿы рхархәара», - ҳәа азгәалҭеит лара.
ААУ актәи апроректор, абиологиатәҭҵаарадыррақәа ркандидат Роман Дбар иажәақәа рыла аҵарадырра аизырҳаразы Ареспубликатә центр аҿы раԥхьаӡа акәны иалыршахеит аматематикеи афизикеи рырҵаҩцәа реизгара. Убасгьы Р. Дбар иазгәеиҭеит, иахьатәи аамҭазы абитуриентцәа аматематикеи афизикеи рзы азҿлымҳара шаадмырԥшуа, уи угәы унамырхьырц залшом.
«Ҳара ҳзы хымԥадатәуп аинформатикеи апрограммаҭҵаареи рзы аспециалистцәа рхыԥхьаӡара аизырҳара, ари апрофиль ала аспециалистцәа разыҟаҵара ахьалыршахо афизикеи аматиматикеи рфакультет аҿы ауп», - ҳәа азгәеиҭеит Роман Дбар. Уи Арҵаҩцәа рахь ааԥхьара ҟаиҵеит, аҟыбаҩ бзиа змоу аҵаҩцәа алкааны, анаҩс урҭ ААУ иҟоу афизикеи аматематикеи рфакультет ахь рышьҭразы.
Афизика-математикатә факультет адекан, афизика-математикатә наукақәа рдоктор, апрофессор Ниазбеи Ԥачулиа афакультет аԥҵареи аҿиареи рҭоурых далацәажәеит.
«Уажәазы афизикеи аматематикеи рфакультет аҿы аҟәшақәа 4 ыҟоуп: аматематикатә анализ, ахархәаратә математикеи аинформатикеи, азеиԥш физика, иара убасгьы еиуеиԥшым аҵаратә лабораториақәа аус руеит . Аԥсны ашкол аушьҭымҭацәа разыҟаҵаразы 28 шықәса инарзынаԥшуа аус ауеит хәыда-ԥсадатәи афизика-математикатә школ», - ҳәа азгәеиҭеит Ниазбеи Ԥачулиа.
Аусмҩаԥгатә аартра рхы аладырхәит афизика-математикатә наукақәа ркандидат, афизика-математикатә факультет азеиԥш физика акафедра адоцент Аида Гыцԥҳа, Аԥснытәи Ауниверситет иреиҳау аматематика акафедра арҵаҩы еиҳабы Нина Жукова. Иреиҳау аҵаратә курсқәа рсессиа мҩаԥысуеит ноиабр 2-нӡа. Аусмҩаԥгатә аҳәаақәа ирҭагӡаны азыӡырҩцәа рзы имҩаԥгахоит алекциақәа, асеминарқәа, аицәажәарақәа, атренингқәа, онлаин-урокқәа, аҟазаратә-классқәа. Убасгьы аметодикатә сааҭ азгәаҭоуп. Анаҩстәи аусура латәарадатәи аформат ала иацҵахоит.
Арҵаҩцәа рзы аҟазаратә-классқәа мҩаԥыргоит ААУ афизикеи аматематикеи рфакультет апрофессортә-рҵаҩратә еилазаареи, ашколқәа рҟынтәи ааԥхьара змоу арҵаҩцәеи.
Аманда Анталаа
