Хымш ирҭагӡаны имҩаԥысуаз ари аконкурс хыркәшан гала-концертла. Уи амҩаԥгаҩ Есма Џьениа асценахь иналыԥхьеит аконкурс аҿы зҽалызкааз афиналистцәа 30-ҩык.

Ахәаԥшцәа рҿаԥхьа дықәгылеит Аԥсни Урыстәылеи зҽаԥсазтәыз артист, «Геликон-Опера» атеатр асолистка Алиса Гыцба. Лара илҳәеит: «Ари аконкурс есышықәса еиҳа-еиҳа аҩаӡара шьҭыҵуеит. Иаҳхысыз ашықәсазы уи иалахәын 88-ҩык, сынтәа акәзар, урҭ рхыԥхьаӡара 200-ҩык инархыҳәҳәоит. Афинал ахь инеизгьы рхыԥхьаӡара  еиҳахеит. Аконкурс –даара ахы аус адулара, аџьабаа ду зцу акоуп. Афинал ахь ацәырҵраз еицлабуан 128-ҩык артистцәа, Аԥсны Урыстәыла, Белорусиа, Ермантәыла, Британиа ду, Германиа, Китаи, Сербиа, Монголиа, Молдавиа рҿынтәи.

Аконкурс ажиури рџьабаа шьардаӡоуп. Урыстәыла зҽаԥсазтәыз артистцәа: Иана  Иваниловеи, Роман Муравицкии, Москва аҳәынҭқарратә капелла адирижиор хада Анатоли Судакови, аексперт Викториа  Фернандеси (Испаниа) иҭабуп ҳәа ралҳәеит.

Уи ашьҭахь Алиса Гыцба аконкурсантцәа аҳамҭақәа раналшьеит.

Артистцәа қәыԥшцәа асценахь ирыццәырҵит Воронежтәи асимфониатә оркестри, Аԥсны  аҳәынҭқарратә камертә оркестри.

«Асолотә вокал аҿы» анаминациаҿы актәи апремиа иаԥсахеит: Анастасиа  Колотовеи, Анастасиа  Лаптевеи.

«Ансамбльтә ҟазара» ахкаҟны актәи апремиа  ранашьан: Софиа Сақаниеи Мариа Самусеваи. Иара убас Ҭаҭарсҭантәи адует Иаков Асташини Саид Хусаинови.

Аҳамҭақәа ршараан ахәаԥшцәеи аконкурсантцәеи ирзыԥшын даҽа гәахәарак, Аԥсны  Атәыла Ахада иԥшәма лҟнытә аԥхьахә ланашьан Москватәи аконсерваториа астудентка Иарна Сым-сым.

Аҵыхәтәаны, зегь реиҳа ихадоу аҳамҭа ҷыда – Гран-При ианашьан атенор Валери Макаров (Москва). Аҳамҭа идкыло, уи иҳәеит иара иаби, иабдуи Аԥсны ишиз, иара изы ишгәадуроу, араҟа абри аҩыза аиааира агара.

Аҳамҭақәа ршара анхдыркәша ашьҭахь, ахәаԥшцәа идырбан афиналистцәа рконцерт.

III Жәларбжьаратәи амузыкатә конкурс аиҿкааҩ Алиса Гыцба иҭабуп ҳәа ралҳәеит егьырҭ атәылақәа рҟнытә зхы алазырхәыз асасцәа. Иара убас иҭабуп ҳәа ралҳәеит  аконкурс амҩаԥгараҿы илыцхрааз Аԥсны акультура Аминистрра.

Наира Сабекиа