Апрель 11 рзы Аҧсны ашәҟәыҩҩцәа Реидгыла аҧшьгарала С. П. Басариа ихьӡ зху Очамчыратәи ашкол-интернат аҟны имҩаҧган  араион алитераторцәа ҿарацәа рсеминар, иара убас апоезиа ахәылҧаз.

Алитературатә хәылҧазы  мҩаҧысит Аҧсны жәлар рпоет Д. И. Гәлиа диижьҭеи 150 ш. аҵра иазку аиубилеитә усмҩаҧгатәқәа рҳәаақәа ирҭагӡаны.

 Очамчыратәи ашкол-интернат аҟны еиҿкааз аусмҩаҧгатә иалахәын, уахь имҩахыҵыз ашәҟәыҩҩцәа реиҧш, араион аҵара аҟәша аиҳабы Ҭемур Гындиа, аҟәша аусзуҩцәа, арҵаҩцәеи ашколхәыҷқәеи, урҭ рхыҧхьаӡараҿы иҟан ақыҭақәа Ҷлоу, Кәтол, Баслахә рҟнытә инеиз аҵаҩцәа. Аумҩаҧгатә рҽаладырхәит Аҧсны абыргцәа Реидгыла ахантәаҩы Апполон Думаа, Очамчыра араион абыргцәа рхеилак аиҳабы Иури Лагәлаа.

 Аиҧылара аартраан иадырҳәеит Аҧсны Аҳәынҭқарра Агимн.

            Д. Гәлиа иархив аҟнытә ианҵоу ибжьы ала иажәеинраала даҧхьеит.

Аиқәшәара аартуа Очамчыратәи ашкол-интернат аҧсуа бызшәеи алитературеи рырҵаҩы Асҭанда  Ҷолокәуа еиқәшәаз бзиала шәаабеит ҳәа ралҳәеит. Анаҩс ажәа илҭеит алитературатә семинар аҵаки ахықәки иааркьаҿны иалацәажәаз  Аҧсны ашәҟәыҩҩцәа Реидгыла ахантәаҩы – В. Аҧҳазоу. Уи иҳәеит: «Ҳазну ашықәс ҳмилаҭтә литература, ҳажәлар рдоуҳатә культура азы акырӡа зҵазкуа шықәсуп. Имҩаҧааго иарбанзаалакгьы Дырмит Гәлиа ииубилеи иадҳәалоуп. Иахьа араҟа имҩаҧысуа араион алитераторцәа ҿарацәа рсеминар, иара убас жәлар рпоет ирҿиамҭақәеи ҳпоетцәа ражәеинраалақәеи рыҧхьара  уҳәа азҿлымҳара бзиа рыманы имҩаҧысып ҳәа ҳақәгәыҕуеит».

Алитераторцәа ҿарацәа рсеминар иалахәыз Очамчыра ақалақьи араион ақыҭақәеи ршколқәа рҟынтәи аиҳабыратә классқәа рҵаҩцәа  рхатәы жәеинраалақәа ирыҧхьеит.

            Д. Гәлиа иажәеинраалақәа, ипрозатә ҩымҭақәа рцыҧҵәахақәа ирыҧхьеит, иажәабжь кьаҿқәа ирылхны аинсценировкақәа ықәдыргылеит, ашәеи акәашарақәеи нарыгӡеит ашкол-интернат аҵаҩцәа.

Аҧсны ашәҟәыҩҩцәа Реидгыла аҟнытә аиҧылара иалахәыз апоетцәа  Анатоли  Лагәлаа, Гәында Кәыҵниа, Гәында Сақаниа, Заира Ҭҳаиҵыкә  Д.И. Гәлиа иажәеинраалақәеи рхатәы жәеинраалақәеи ирыҧхьеит.

Еизаз рҿаҧхьа дықәгылеит Аҧсны абыргцәа Реидгыла ахантәаҩы Апполон Думаа, агәахәара ду шинаҭаз азгәаҭауа зегьы еиҳау ақәҿиарақәа рзеиҕьеишьеит.

  Очамчыра араион Ахадара аҵара аҟәша аиҳабы Темур Гындиа аиҧылара иалахәыз зегьы раҧхьаҟа аихьӡарақәа рзеиҕьашьауа иазгәеиҭеит ас еиҧш иҟоу аиҧыларақәа аҿар рааӡараҿы хәарҭара ду шрылоу.

Аусмҩаҧгатә еихшьалауа иқәгылаз  ашәҟәыҩҩцәа Реидгыла ахантәаҩы  Вахтанг  Аҧҳазоу аиқәшәара аиҿкаара иахаҵгылаз, уи зҽалазырхәыз зегьы  иҭабуп ҳәа реиҳәеит, насгь арҿиаратә хеидкыла аҟнытә инаргаз Дырмит Гәлиа ифотосахьа ашкол-интернат ҳамҭас иеиҭеит, иара убас аҧсуа шәҟәыҩҩцәа рышәҟәқәа.

Аусмҩаҧгатә ахыркәшараан аиқәшәара иалахәыз зегьы иҭабуп ҳәа рарҳәеит  ашкол-интернат адиректор Белла Ашәба, иара убас  ашкол-интернат ахәыҷқәа азыҟазҵаз арҵаҩы Асҭанда  Ҷолокәуа. 

Мшаԥымза 4-5, 2024 шықәса рзы Женева имҩаԥысит Аахыҵ-Кавказ ашәарҭадареи аҭышәынтәалареи рзы Жәларбжьаратәи Женеватәи аиҿцәажәарақәа 60-тәи рраунд. Аиҿцәажәарақәа ирылахәын Аԥсны, Қырҭтәыла, Аахыҵ-Уаԥстәыла, Урыстәыла, Америка Еиду Аштатқәа рхаҭарнакцәа ЕАР, ЕЕАЕ, ЕЕ рҟынтәи ацхантәаҩцәа алархәны.
Аԥсны адәныҟатәи аусқәа рминистр ихаҭыԥуаҩ Иракли Ҭыжәба напхгара зиҭоз аделегациа аилазаараҿы иҟан Аԥсны адәныҟатәи аусқәа Рминистрра Аконсултә департамент аиҳабы Лаша Аҩӡба, Мрагылара Ааигәеи Африкеи рдепартамент аиҳабы Артур Гагәлиа, адепутат Баҭал Џьопуа.
Аԥсны адәныҟатәи аусқәа Рминистрра аофициалтә саит аҿы иҟоу адыррақәа рыла, Аахыҵ-Кавказ ашәарҭадареи аҭышәынтәалареи рзы Жәларбжьаратәи Женеватәи аиҿцәажәарақәа рлахәылацәа аформат аиқәырхара аинтерес шрымоу азгәарҭеит, еиуеиԥшым азҵаарақәа рзы аицәажәарақәа рымҩаԥгаразы.
Аԥсуа ган иазгәанаҭеит ихықәкы хаданы ишшьоу Қырҭтәыла Аԥсни Аахыҵ-Уаԥстәылеи рганахь ала амч ахамырхәаразы аиқәшаҳаҭра адкылара алзыршо ашәҟәы аус адулара, иара убасгьы Аԥсны-Қырҭтәыла, Аахыҵ-Уаԥстәыла-Қырҭтәыла рҳәаақәа рҿы аделимитациа апроцесс аусура аларгара.
Ақырҭуа лахәылацәа аҽазныкгьы ирзаамырԥшит аҭынчразтәи аԥшьгамҭақәа конструктивла рызнеишьа. Ари азҵаара аартны ишыҟац иаанхеит.
Аҩбатәи аусуратә гәыԥ аусура аҳәаақәа ирҭагӡаны имҩаԥысит агуманитартә зҵаарақәа рылацәажәара.
Аԥсуа ган азхьаԥшра рнаҭеит атәыла ауааԥсыра рхы иақәиҭны рныҟәара алмыршара апроблема, Аԥсны атәылауаҩшәҟәқәа разхаҵара алыршара азҵаара.
Араунд амҩаԥгара аҳәаақәа ирҭагӡаны егьырҭ азҵаарақәагьы ирылацәажәеит.
Аиҿцәажәарақәа реихшьалала иазгәаҭоуп 2024 шықәса рашәарамза 25-26 рзы Аахыҵ-Кавказ ашәарҭадареи аҭышәынтәалареи рзы Жәларбжьаратәи Женеватәи аиҿцәажәарақәа изаамҭанытәиу 61-тәи рраунди уи иашьҭанеиуа егьырҭ абри аформат иаҵанакуа аиԥыларақәеи шымҩаԥгахо.

Сынтәа ауаажәларратә усзуҩы, ажурналист, аҭоурыхҭҵааҩ, Аџьынџьтәылатә еибашьра Дуӡӡа (1941–1945 шш.) иалахәыз, Аԥсуа ҳәынҭқарратә музеи адиректорс иҟаз (1978–2007 шш.) Алеқсандр Ҭариа диижьҭеи 100 шықәса ҵит.

Мшаҧымза 11  рзы  С. П.  Басариа ихьз зху Очамчыратәи ашкол-интернат аҟны имҩаҧысит апоезиеи апрозеи  рымҩахь ашьаҿа ҟазҵаз  аҿари, еиҵырдыруа аҧсуа шәҟәыҩҩыцәеи рсеминар. Аусмҩаҧгатә аҧшьнагеит Аҧсны ашәҟәыҩҩцәа Реидыла. Сынтәа асеминар мҩаҧысуеит Аҧсны жәлар рпоет Д. И. Гәлиа диижьҭе 150 ш. аҵра иазку аиубилеитә усмҩаҧгатәқәа рҳәаақәа ирҭагзаны. Асеминар аартын Аԥсны ахьыӡрашәа арҳәарала.

 Алитературатә семинар аҵаки ахықәки иааркьаҿны далацәажәеит  Аҧсны ашәҟәыҩҩцәа Реидгыла ахантәаҩы В. Аԥҳазоу. Алитераторцәа ҿарацәа рсеминар иалахәуп Очамчыра ақалақьи, араион ақыҭақәа   рышколқәеи рҟынтәи аиҳабыратә классқәа рцаҩцәа. Урҭ рхатәы ҩымҭақәа ирыҧхьеит. Очамчыратәи ашкол-интернат аҵаҩцәа Д. Гәлиа иажәеинраалақәеи, ипрозатә ҩымҭақәеи  ирыԥхьеит, ашәақәеи акәашарақәеи нарыгӡеит .

 Аԥсны ашәҟәыҩҩцәа Реидгыла аҟынтәи аиҧылара иалахәын  В. Аԥҳазоу, А. Лагәлаа, Гә. Кәыҵниа, Гә. Сақаниа, 3. Тҳаицыкә.

Елана Лашәриа

Аҧсуа шәҟәыҩҩы-адраматург, арежиссиор, актиор, акәашаҩ, Аҧсни Қырҭтәылеи жәлар рартист Мҭы Ақаҩба диижьҭеи 115 ш. ҵит.

Аԥсуа қыҭа Џьырхәа. Ахацәа нагақәа злиааз, адунеи ари ақыҭа ахьӡ азырдырыз Асовет Еидгыла Афырхаҵа Ҳаразиа Владимир Камсагә-иԥа инаиркны еиқәаҳаԥхьаӡо ҳалагар хара ҳагоит. Иарбан ҭоурыхтә аамҭазаалакгьы иҟаз зегьы рҟынтә ԥсра-ӡра зқәым ахаҿсахьақәа ари ақыҭаҿы иҟоуп.

Аԥсуаа рҿы аарыхра иузаҟәым­ҭхо иадҳәалоуп ҩ-маҭәарк – акалаҭи амҵәышәи. Ишԥацәырҵи дара, насгьы урҭ ирышьашәалоу маҭәарқәак иахьа ахархәара зрымамзи дара реиԥш, ашышра ҩычагас аԥсуаа ҳҿы аҿиара ианбалагеи?
70 шықәса зхыҵуа Мықә ақыҭан инхо Зураб Араҳамиа инапала акалаҭқәа ҟаиҵоит. Уи игәыла иҟынтә иҵеит. Иара иҽазҵәылхны дашьҭаны ҳәа акәым, анхараҿы исыхәо ак сзыҟаҵозар ҳәа нап аиркит. Аԥхьа иҟасҵоз усҟак ублаҿ иааиуамызт, аха нас салашьцылеит, иҳәоит иара. Зны ихазы ишышуан акалаҭқәа, нас аҳаблан инхоз зегьы акака рзыҟаиҵеит.
Зураб акалаҭ аџьи арасеи ирылихуеит, урҭ аҵла ахкқәа рырҷҷара маншәалоуп. Амҵәышә ҟаимҵац, уи иаҳа ицәгьоуп иҳәоит. Акалаҭ ашышраҿы зегь реиҳа узыдхало аҵа аҟаҵароуп.
«Акалаҭ злысхуа аџьи араса ҷыни нанҳәамзазоуп ианԥысҟо. Ҩымш раҟара ианышьҭасҵалак ашьҭахь, амцаҿы избылуеит. Амҿы канӡароуп, аршьшьара маншәалахарцаз. Ашышра саналаго мышкы шагу уахык амҿы аӡы иӡаауп. Азхара аӡы аналалак аус адулара маншәалахоит», - иҳәоит Зураб.
Абар, шьҭа ҩажәа шықәса ҵуеит анхаҩы акалаҭқәа ҟаиҵоижьҭеи. Ари аамҭа иалагӡаны шьҭа иус дазҟазахеит уҳәар алшоит. Иусумҭақәа иҭиуеит, изҭахугьы маҷҩым. Аԥхьа даналагоз калаҭк 1500 мааҭ иаԥсазгьы, уажәы х-нызқь мааҭ рҟынӡа инеихьеит, иаазхәогьы анхацәа роуп.
«Акалаҭ анҵыра амоуп, аџьабаагьы абоит - ибзианы уахылаԥшуазар. Ауаара ианруҭалак хьаас изымкуа дыҟоуп. Аџьықәреи амашьына ианақәрыԥсалак хыхьынтә идыршәуеит, ма иақәтәоит, зны адәахьы иаанрыжьуеит. Акалаҭ уи бзиа иабаӡом. Пату ақәуҵар, акыраамҭа иухәарҭахоит», - иҳәоит Зураб икалаҭқәа дрыхӡыӡаауа.
Зураб акалаҭқәа ҩ-хкыкны иҟаиҵоит, идуу - 50 кьыла зкуа. Уи аҟаҵаразы 140 сантиметр иҟоу аџьқды аҭаххоит, егьи - 25 кьыла зкуа – иазхоит метраки ҩажәа сантиметри иҟоу. Акалаҭ хәыҷқәа зҭаху еиҳарак аҳәса роуп, рацәак аидара аҵалара зҭахым. Акалаҭ хәыҷы аҟаҵаразы зынӡа ижәпам қдызаҵәык азхоит.
Аҟазеи сареи заа ишеибаҳҳәа­хьаз еиԥш, инагӡаны иҟаҵамыз акалаҭ аҿы иаҳирбеит ишишышуа. Иаҳа иҟьаҟьаны иҟоу аткьацқәа аҵахь ишьҭуеит, иааихданы ишьҭаиҵоит. Акалаҭ иахәҭоу аҭбаара анаиҭалак, аӷәыцәмаҟьақәа аҩадахьы ирхәоит. Нас иаҳа иҵаӷоу алаиԥоит. Акалаҭ ахы акәзар, аҷын аакәыршан адәахьалагьы, аҩныҵҟалагьы еидикылоит. Нас акылҵәарақәа ҟаҵаны арасамаҵә ҵаӷаӡаны ирҷҷаны, акалаҭ ахы алаҿаиҳәоит. Азныказы зыжәпара маҷу, аха ихәхәаӡа иҟоу аҵәаҟьақәа анубалак уаршанхоит, ас иҵаӷаны рҷҷашьас иамоузеи ҳәа. Зураб иажәақәа рыла, ҷынк хәба-ԥшьба ҵәаҟьа алихуеит. Иара маругас имоу аҳәызба мацароуп. Араҟа аус злоу, иара иажәақәа рыла, ианаамҭоу аџьи арасеи рыԥҟароуп, уи ианацлалак аԥышәа бзиа – акалаҭ мазеиуп. Ҽнакала ҩбагьы анеизиго ыҟоуп, излихуа ирмазеины имазар. Ари аус аҿы аӡәы духәартә дыҟам, иҳәоит Зураб. Иара ихала, ҭынч аус аниуа иаҳа бзиа ибоит.
Акалаҭи амҵәышәи аԥсуаа ҳҿы ииз маҭәарқәоуп. Дара ажәытә хаҳәаамҭа аҟынтә иаауеит. Иара амҵәышә аформа акәзар, аԥсуаа ирхәыцыз ак акәны иҟоуп, лҳәоит Аԥснытәи аҳәынҭқарратә музеи аетнологиа аҟәша аҭҵаарадырратә усзуҩы еиҳабы Инга Шамԥҳа.
«Ауаҩы дшьақәгылеижьҭеи, ажәытә ахаҳәаамҭа инаркны, анхараҿы ихы иаирхәоз злаҟаиҵоз аҵиаақәа рыла акәын. Раԥхьатәи амаҭәахәқәа ишышны иҟаиҵоит. Урҭ ҟазара ҳаракыла инагӡамзаргьы, даара ихәарҭан. Итыруа иҟаз аҵиаақәа: аҟарма, аӡахәа, ашәчқәа ирылырхуан. Аӡҟычгьы ахархәара аман», - ҳәа еиҭалҳәоит Шамԥҳа.
Абраҟа иҳәатәуп, акалаҭи амҵәышәи ишышны иҟарҵоз амаҭәарқәа рахь ишаҵанакуа, ашышра ахаҭа акәзар, аԥсуаа рнапҟазараҿы ҩычага елементны иԥхьаӡоуп.
Аԥсуаа мҿыла иршышуан аандақәа, ажәытә ргыларақәа – ақәацәқәа, амаҵурҭақәа, аԥацхақәа, акәытҵарақәа, ацақәа, аџьмаҭрақәа уҳәа.
«Ажәытә нхарҭақәа быцала иршышуан. Ахыбқәагьы аҵиаақәа рыла иԥаны иҟарҵон ақәа кылымсырцаз, асы ачҳарцаз. Аҵиаақәа рыла ашышра Аԥсны ииз акоуп», - иазгәалҭоит аетнолог.
Аԥсуаа жәытә-натә аахыс ажьааӡара иаҿын, уимоу аӡахәа Аԥсны иатәу ҵиаауп. Аӡахәа ара еизҳауан ауаҩы дықәнагалаанӡагьы. Абнаӡахәақәа даара иалаҵәаны иҟан. Ажь аԥсуа дгьылқәа иртәу ҵиааны ишыҟоу аршаҳаҭуеит Нарҭаа репосгьы. Ажь зларҭаауаны аԥсуаа ирхәыцыз амҵәышә ауп. Ақәаҵақәа рҿы ахархәаразы даара иманшәалан. Ажь зҭаз амҵәышә шахала илбаашьҭны акалаҭ иҭарыԥсон. Иахьагьы аҵлақәа ирықәу ажь усоуп ишырҭаауа. Иҟоуп анапҟазацәа - уи ҟазҵо.
Инга Шамԥҳа илҳәоит Аԥсны византиаа рымч аҳра анауаз араантә иртәыртәуаз ауаа иахьнаргоз аҭыԥ аҿгьы ирдыруаз акәын излагоз. Италиатәи ажәытә хыҵхырҭақәа рҿы иҟоуп амҵәышә асахьа змоу ажь зларҭаауаз, аха уи Аԥснынтә игоу акоуп ҳәа агәраганы дыҟоуп аетнолог.
Амҵәышә аформа аԥхьа ицәырҵыз ак шакәугьы, акалаҭ иаҳа ахархәара аман. Иҟан амаа зманы аҟаҵкәырқәа реиԥш иҟаҵаз, шәагаалагьы дара еиуеиԥшымызт. Адгьылқәаарыхра ианалага нахыс акалаҭ асахьа змаз ишышны иҟаз амаҭәахәқәа ркын. Раԥхьа Аԥсны иаадрыхуан ахәыӡ, нас ажәибыжьтәи ашәышықәсазы ицәырҵит аџьықәреии аҟәыди. Иара иахьагьы амхы аҭагалараҿы акалаҭ ада ԥсыхәа ыҟам, иара ахы ҭбаауп, иманшәалоуп. Акалаҭ ркын аҭаҭын анҿырхуазгьы.
Иршышуаз анхараҿы ихәарҭаз маҭәарын адарҷ. Иара иахьа ахархәара амам, аха аиԥш зеиԥшу убар улшоит Аҳәынҭқарратә музеи аҿы. Иааизыхәаны иҟаз, иара хәарҭан аԥсыӡкраан. Адарҷ иаҳа итыруаз аҵиаақәа ирылхны иҟарҵон, аха еиҳарак аҟарма иалырхуан. Аԥсыӡ ахьамаз аҭыԥ аҿы иаанрыжьуан. Иара иамаз аформа иабзоураны аԥсыӡ анҭалалак шьҭахьтәи изҭыҵӡомызт. Аԥсыӡ ҭаларцаз изларжьоз фатәык ҭыршьуан.
Еиҭа ишышны иҟарҵоз аинтерес зҵоу маҭәаруп ацгәмырчы. Иара аԥацхаҿы икнарҳауан, афатә ҭарҵәахырцаз. Еснагь ахәышҭаараҿы еиқәыз амца иахылҵуаз алҩа иабзоураны афатә ԥхасҭахаӡомызт. Иара ишышны, иаагьежьны аформа амоуп. Ҵаҟала иамаз ахҩа аартны унапы нҭаҵаны иуҭахыз афатә ааҭугон. Ацгәмырчқәа акымкәа-ҩбамкәа икнарҳауан, афатә еилыхны акәын ишҭарҵоз. Акәацрҩа хазы, ахшлых хазы.
Ишышны аԥацхақәа рҿы ахәышҭаара иахакнарҳауан иара убас ахәарҭа, афатә ахьдырҩоз, иара убас аҭӡаҿы икыдырҵон акәаҷабқәа зҭадыргылозгьы. Амузеи аҿы иҟоуп мҿыла мацарала ишышны иҟаҵоу алыхәҭа. Иара аамҭа иаӡрыжәхьеит аҟнытә иԥҽуп, аха аиҿартәышьа, аидкылашьа уамашәа иҟоуп. Иҳәатәуп, ишышуаз ахацәа шракәыз, дара роуп аҩнымаҭәахәқәагьы ҟазҵоз.
Абасала, аԥсуаа ҳҿы ицәырҵыз маругақәак иахьагьы ахархәара рымоуп, анхацәа рнапаҿы иркуп, иажәыр аҿыц аархәоит, егьырҭ ракәзар, шьҭа амузеи аҿы ада иубарҭам, рыхьӡқәагьы ажәытәра иагеит.

Альбина Жьиба

Аԥсны жәлар рартист, Аԥсуа ҳәынҭқарратә Аҿар ртеатр асахьаркыратә напхгаҩы Софа Агәмаа-ԥҳа иқәлыргылаз, Бранислав Нушич иҩымҭа иалху аспектакль «Лхаҵкы, аминистр иԥҳәыс» знык иахәаԥшыз игәы еиҟараны дыннажьуам, даҽазныкгьы аиҭахәаԥшра агәаҳәара инаҭоит.

Ражден Гәымба ихьӡ зху Аԥснытәи аҳәынҭқарратә филармониаҿы имҩаԥысит аестрадатә шәаҳәаҩцәа рреспубликатә еицлабра «Аҿар рыбжьы». Апроект аиҿкааҩс дамоуп Аԥсны зҽаԥсазтәыз акультура аусзуҩы, Иван Кортуа ихьӡ зху Арҿиаратә центр аиҳабы Нури Кәарҷиа.
Аицлабратә концерт мҩаԥылгон ашәаҳәаҩ Инесса Григолиа.