Хәажәкырамза 22 ахәылбыҽха, гәыԥҩык бџьарла еибыҭаз ауаа Москва ақалақь, убри аамҭазы агәыԥ  «Пикник» аконцерт алагараны иахьыҟаз аконцерттә зал ду  «Крокус Сити Холл» иақәлеит.

Идырым шьоукы «Крокус Сити Холл» аҿы ахысра иалагеит. Владимир Путин атеракт шыҟалазҵәҟьа иаразнак ахҭыс азы адырра ирҭеит. Иара иааиԥмырҟьаӡакәа еиуеиԥшым амаҵзурақәа рҟынтәи адыррақәа иоуеит, ҳәа ажурналистцәа дрыҿцәажәо иҳәеит урыстәылатәи Афедерациа Ахада ипресс-маӡаныҟәгаҩ Дмитри Песков. 

Урыстәыла Аусеилыргаратә Комитет адыррақәа рыла, иҟалаз атеракт аҿы 115-ҩык ҭахеит.  Афедералтә шәарҭадара Амаҵзура адыррақәа рыла 100 - ҩык инареиҳаны ааха роуит.

Урыстәыла агәабзиарахьчара аминистр Михаил Мурашко ахәышәтәырҭақәа рахь инагаз, 115-ҩык рахьынтә   5-ҩык ахәыҷқәа роуп, ҳәа адырра ҟаиҵеит.  

60-ҩык рҭагылазаашьа даараӡа иуадаҩуп.  

Агәабзиарахьчара Аминистрра аҿы иҟарҵаз адыррақәа рыла иҟалаз атеракт иахҟьаны х-ҩык ахәыҷқәа рыԥсҭазаара иалҵит, ахәышәтәырҭақәа рҿы иҟоуп 121-ҩык ааха зауз.  

Урыстәыла Иҷыдоу аҭагылазаашьақәа рзы Аминистрра адыррақәа рыла, ахәышәтәырҭақәа рҿы ишьҭоуп  107-ҩык атеракт аҿы ааха зауз ауаа.

600-ҩык инареиҳаны адонорцәа арыцҳара аныҟала раԥхьатәи асааҭ азы ашьа арҭеит.  

Ахысрақәа рзы адырра ашьҭахь акомплекс аҿы аҭҟәацреи уи инашьҭарххны амцакреи шыҟалаз азы аинформациа ҟалеит.

Абылра ауадаҩра иреиҳау аҩаӡара анаршьеит.

Ахыбра аиҳарак амца амҽханакит, алҩақ ӷәӷәала иқәчит.

Акомплекс иблыз ахыбра аиҳарак еилабгеит.  Ашырԥазы, асааҭ 0:55 аламҭалазы амца аанкылара алыршахеит.

 Атәыла анапхгара ареакциа

Урыстәылатәи Афедерациа Аусеилыгаратә Комитет атеракт азы ашьаусеилыргара хацнаркит.  Иҷыдоу амчратә структурақәа иахәҭоу аусҩаԥгатәқәа зегьы нарыгӡоит, ҳәа аҳәамҭа ҟарҵеит Урыстәылатәи Афедерациа Афедералтә шәарҭадара Амаҵзура аҟны иҟоу аконституциатә шьақәгылашьа ахьчареи атерроризм аҿагылареи рзы Аусбарҭа (ЦОС ФСБ) аҿы.  

Москва ақалақь аҿы Ашҭа Ҟаԥшь, аҳаирбаӷәазақәа, авокзалқәа, астанциақәа, уҳәа, астратегиатә обиектқәа зегьы рҿы ҷыдала ахьчара  рӷәӷәоуп.

Амассатә усмҩаԥгатәқәа зегьы рымҩаԥгара аԥыхуп.

Атеракт инамаданы ашәарҭадара ауснагӡатәқәа  дырӷәӷәеит Урыстәылатәи Афедерациа арегионқәак рҿы, Москватәи арегион, Лугансктәи Жәлартә Республика, Даӷьсҭан, Нхыҵ Уаԥстәыла, Тулатәи аобласт, уахь иналаҵаны. 

Урыстәылатәи Афедерациа Афедералтә шәарҭадара Амаҵзура адиректор Алеқсандр Бортников, аҩныҵҟатәи аусқәа рминистр Владимир Колокольцев, УА Аусеилыргаратә Комитет ахантәаҩы Алеқсандр Бастрыкин, Урыстәыла агвардиа адиректор Виктор Золотов Урыстәылатәи Афедерациа Ахада Владимир Путин атеракт азы аусеилыргара шымҩаԥысуа азы адырра ирҭеит.  

УА Аусеилыргаратә  Комитет иҟанаҵаз адыррақәа рыла, «Крокус Сити Холл» иҟалаз атеракт азы игәҩароу ԥшьҩык аанкылоуп.

Жәларбжьаратәи ареакциа

Иҟалаз атеракт азы Аҩны Шкәакәа аҟынтәи адышшылара ааит. Вашингтон иҟалаз арыцҳара Киев џьара акала иадҳәалаӡам ҳәа аҳәамҭа ҟанаҵоит. Убри аан, Урыстәыла адәныҟатәи аусқәа Рминистрра аҿы ишазгәарҭаз ала, Еиду Америкатәи Аштатқәа ареакциа имаҷымкәа азҵаарақәа цәырнагоит.

Украина Ахада иофис анапхгаҩы иабжьгаҩ Михаил Подолиак иҟалаз ахҭыс Киев иадҳәалаӡам ҳәа аҳәамҭа ҟаиҵеит.

Еиду Амилаҭқәа Реиҿкаара атеракт азы ажәабжь гәалсра дула ирыдыркылеит, иназыцҵоу аинформациа аиура иақәгәыӷуеит ҳәа аҳәамҭа ҟанаҵоит.

Интерпол Москва ақалақь, «Крокус Сити Холл» иҟалаз аҭынч уааԥсыра рнырҵәара иадҳәалоу ахҭыс  бааԥсы еиҿызкаази иалахәызи рыԥшаараҿы урыстәылатәи амчратә структурақәа ацхыраара рыҭара ишазхиоу азы аҳәамҭа ҟарҵеит.

Иҟалаз атрагедиа азы адышшыларақәа аарышьҭит Египет, Ҟазахсҭан, Азербаиџьан, Киргизиа, Италиа, Сербиа, Германиа, Лиуксембург, Катар, Куба, Палестина, Боливиа, Иран, Венесуела, Узбекьысҭан, Сербиатәи Ареспублика, Ҭырқәтәыла, Ермантәыла, Мальта, Аԥсны, Аахыҵ-Уаԥстәыла, Иорданиа, Саудтәи Аравиа, Франциа, Ҭаџьыкьысҭан, Мексика, Колумбиа, Австриа, Еиду Арабтәи Емиратқәа, Шьамтәыла, Словакиа, Молдавиа, Израиль​, Бахреин, Бырзентәыла, Аргентина, Норвегиа, Бельгиа, Нидерланды, Чили, Черногориа, Шотландиа, Еквадор, Перу, Венгриа, Уругваи, Панама, Марокко, Зеландиа Ҿыц, Гватемала, Ирландиа, Мали, Тунис, Туркмениа, Индиа, Коста-Рика, Иапониа, Таиланд, Китаи, Кипр, Монголиа, Чехиа, Қырҭтәыла, Маврикии, Кениа, Швециа, Афганисҭан, Мадагаскар, Кувеит, Аладатәи Африкатәи Ареспублика, Буркина-Фасо, Адемократиатә Республика Конго, Танзаниа, Пакисҭан, Шри-Ланка, Польша, Непал, Малаизиа, Нидерланды, Сомали, Великобританиа, Венгриа, Австриа, Норвегиа, Иран, Исландиа.

Атеракт иара убас ӷәӷәала иақәыӡбеит Ихьыԥшым Аҳәынҭқаррақәа Реиҩызара, Европатәи аҳәынҭқаррақәа Реидгыла Ашәарҭадара Ахеилак, Еиду Амилаҭқәа Реиҩызара,  Европатәи атәылақәа Реидгыла.

Урыстәылатәи Афедерациа иҟалаз арыцҳара  ианамаданы, Аԥсны анапхгаратә  аусбарҭақәа жәпакы адышшыларақәа ҟарҵеит.

Актәи Бедиа ақыҭа аҿы шьаҭанкыла иблит ҩ-еихагылак змаз аҩны, – Аԥсныпресс ахь Иҷыдоу аҭагылазаашьақәа рзы Аминистрра аҟынтәи адырра ҟалеит.

Аԥснытәи аҳәынҭқарратә университети зҭакԥхықәра ҳәаақәҵоу Пекинтәи аинформациа-консультативтә еилазаара «Евразиеи» (Китаи) аусеицуразы аиқәшаҳаҭра рыбжьарҵеит. Абри азы адырра ҟанаҵоит ААУ аинформациеи амедиакоммуникациақәеи рыҟәша.
Аусшәҟәы рнапы аҵарҩит ААУ аректор, академик Алеко Гәарамиеи Аилазаара «Евразиа» ахантәаҩы Ге Чжили.

Ақалақь Фырхаҵа Гәдоуҭа агәаҿы игылоу С. П. Дбар ихьӡ зху Аԥсны жәлар Рџьынџьтәылатә еибашьра Аҳәынҭқарратә музеи аҟны афотоцәыргақәҵа еиҿкаан. Уаҟа 500 патреҭ еизган.
Ацәыргақәҵа «Афырхацәа зааӡаз Анацәа» ахьӡын. Ари апроект х-етапкны ишоуп: актәи имҩаԥгаз аҟны Гәымсҭатәи афронт аҟны иҭахаз ранацәа рыхәҭак алахәын. Аҩбатәи мҩаԥгахоит ԥхынҷкәын мзазы, ахԥатәи цәыббрамзазы.

Кәтол ақыҭантәи анацәа рпатреҭқәа аизгаразы ацхыраара ду ҟарҵеит Инга Коӷониеи Ельвира Сиҷинааи. Ҭхьынантәи аизгареи аиҿкаареи зегьы рхахьы иргеит агазеҭ «Аԥсны» ажурналист Шарида Торчуеи Ирма Аршба-Ҷокәуеи (Ҭхьынатәи абжьаратә школ аиҵбыратәи аклассқәа рырҵаҩы), Гәылрыԥшь араион анацәа рхеидкыла, Ҷлоу ақыҭан амузеи аиҳабы Мзиа Кәыҵниа. Иара убас лџьабаа дуӡӡоуп Ешыратәи амузеи адиректор Марина Тәанба. Зҽалазырхәыз зегьы иҭабуп ҳәа раҳәо зыҷкәынзаҵә дҭахаз Лиуда Ҷыҭанаа-Конџьариа абас лажәақәа хлыркәшеит: «Иахьа еизгоу апатреҭқәа ҭоу­рыхтә хаҿсахьақәоуп. Урҭ реизгареи ашәҟәы рҭагалареи хҭыс дууп. Баша иҭамхеит ҳҳәо ҳҟалеит. Шаҟа иҭышәҵаауа, еидышәкыло – уи ҭоурыхуп. Бзыԥаа анацәа рпатреҭқәа реиҳараӡак ҳмузеи аусзуҩ Анжела Барганџьиа еидылкылеит. Зегьы шәеицхыраара алҵшәа бзиа аиуит. Иҭабуп». Аиԥылараҿы аво­калтә -инструменттә ансамбль «Риҵа» ықәгылеит, аибашьреи Аиааиреи ирызкыз ашәақәа нарыгӡеит.
Аиԥылара иалахәын: араион Ахадара, араион адепутатцәа реилазаара, ауаажәларратә хеилакқәа. Еизаз зегьы иҭабуп ҳәа раҳәо араион ахада ихаҭыԥуаҩ Валери Аҩӡба иҳәеит: «Ҳаҭыр ду зқәу анацәа, раԥхьаӡа акәны ари аҩыза ацәыргақәҵа мҩаԥысуеит. Шәара араҟа еизаз зегьы иҭабуп ҳәа шәаҳәо, исҳәарц сҭахуп, зыԥсадгьыл ахьчара зхы ақәызҵо, ахааназ ԥсра шрықәым.
Шәагымзааит Аԥсны, аԥеиԥш лаша ацзааит. Хашҭра рықәымзааит зегьы!»
Ацәыргақәҵа апроект иацҵахоит.

Гәгуца Џьыкырба

Имҩаԥысит Аԥсны аҭҵаарадырақәа Ракадемиа 2023 шықәсазтәи аусура аихшьаалатә еизара. Аизара аартуа ААР апрезидент, академик Зураб Џьапуа дырзааҭгылеит иарбоу аҿҳәаразтәи академиа аусура.
Ажәахәқәа рыҟаҵара иалагаанӡа, уи иалатәаз зегьы минуҭктәи аҿымҭрала иргәаладыршәеит, иаҳхысыз ашықәс азы здунеи зыԥсахыз аԥсуаҭҵааҩцәа: Руслан Барцыц, Алеқсеи Чачаков, Иуана Шамба, Имархети Калаџьиан – Еремиан.

«Адунеи зегь ианыруа, аԥсуаа рыҷкәынцәагьы злахәу Донбастәи аибашьра адунеиеибаркыра ахаҭа аԥсахыр алшоит. Ус шакәугьы Урыстәыла Апрезидент Владимир Путин иҳәеит: анаука аҳәынҭқарраҿы ихадоу аҭыԥ шаиуа, уи ада аҿиара шыҟамло. Убри инаҿырԥшны ҳахәаԥшуазар аԥсуа академикцәа, аҵарауаа иҵегьы азхьаԥшра рымазар ахәҭоуп.
Академиа апрезидиум аҿы аиҿкаара ҳаҿуп академиа аексперттә комиссиа ду, аҳәынҭқарра ахырхарҭақәа, аспектқәа зегь абызшәа аҿиара, адемографиа, ақыҭанхамҩа, аҵара, акультура, атуризм зегьы рҿы адырра ҿыцқәа шьаҭас иҟалароуп, урҭ зырҿио анаука ада акгьы ыҟаӡам. Анаука ҿиарцазы иҭышәынтә́алоу аҭагылазаашьа ыҟазароуп».

Хымԥада иаԥҵатәны иҟоуп академиазы азакәан. Академиа астатус, ароль, азинқәа, насгьы анаука афинансқәа разшәашьа аформа ҿыцқәа рыԥшаара. Иахьазы академиа асистемаҿы аус руеит ахырхарҭақәа хԥа. Урҭ зегьы ҳҳәынҭқарразы иактуалтәу азҵаарақәа ирызкуп.
Аԥсны Ахадара гәыкала, еилкаарала академиа иазыҟоуп, аҽа зҵаароуп амилаҭтә лшарақәа. Уи зырҵабыргуа хҭысуп уажәааигәа Аԥсны Ахада иҿы аҵарауаа ҿарацәа рхеилак аԥҵара. Насгьы анаука адгыларазы афонд аиҿкаара ахацыркра», ҳәа азгәеиҭеит Зураб Џьапуа.Иажәахә ахыркәшамҭаз Академиа иҭнажьыз ахьтәы медал ианаишьеит сынтәа 95 шықәса зхыҵыз, раԥхьатәи Аԥсны аҭҵаарадыррақәа Ракадемиа апрезидент Шоҭа Ҟасҭеи-иԥа Арсҭаа.
Аԥсны аҭҵаарадыррақәа ракадемиа 2023 шықәсазтәи арусура, аихшьаалақәа ҟаҵо Зураб Џьапуа аҳаҭыртә шәҟәқәеи апремиақәеи ранаишьеит еиҳа аихьӡарақәа аазырԥшыз аҵарауаа: Виачеслав Чирикба (12 статиа икьыԥхьит, урысшәала, англыз бызшәала). Аслан Аҩӡба ашәҟәқәа реиқәыршәареи, аредакторра рзуреи рзы, Инварби Екба – иикьыԥхьыз астатиақәа рзы, Аиба Лиосик ашәҟәқәа рҭыжьразы. Аспирантцәа ҿарацәа Давид Арӡынба, Валери Аџьынџьал, Радион Аҩӡба, Алиса Матуа, Алеқсандр Гәлиа, Маиа Цибулевскаиа, Алиса Аҳәба уҳәа аӡәырҩы рџьабаақәа алкаан иазгәаҭан. Адипломқәа ранашьан Ирма Аиба, Давид Аӡынба, адиссертациа зыхьчаз.

Аизараҿ ажәахә ҟазҵаз Аԥсны академиа амаӡаныҟәгаҩ Валентин Кәаӷәаниа дазааҭгылеит ҳҵарауаа рлагала, 2023 шықәса азы ирылдыршаз. Уи иҳәеит, Аԥсуа академиа аханатә ишьҭнахыз аныҟәашәа еиҳа-еиҳа еихаҳауа ишааиуа. Аԥсуа науказы аҿар реиҵааӡара ахшыҩзышьҭра ду азууп. Ҵыԥх жьҭаарамза 4 рзы Академиа алхра ҿыцқәа аан иакадемикцәахеит: Зураб Амқәаб, Алықьса Касланӡиа, Анатоли Марколиа, Лили Ҳагба. Алахәыла корреспондентцәахеит: Валери Бигәаа, Аслан Аҩӡба, Лали Коӷониа, Омар Маан. Иара убас ихҭыс духеит жьҭаарамза 30 рзы акыр жәашықәса лҵшәала аус зуа академиа апрезидент Зураб Џьапуа ҿыц иалхра. Ҳҵарауаа Аԥсни аҳәаанырцәи иҭыҵуа аҭҵаарадырратә журналқәа ирымадоуп. Ҳҵарауаа 2023 шықәсазы ажәахәқәа рыла рхы рыладырхәит Аԥсни, Урыстәылеи (Даӷьстан), Ермантәылеи рҟны имҩаԥыргоз аҭҵаарадырратә форумқәа. Уи иабзоураны адунеи иабоит ҳҵарадырра алаԥшҳәаа. Уаҟа аԥыжәара рымоуп: Сослан Салаҟаиа, Диана Ԥлиа, Арда Ашәба, Маиа Цибулевскаиа, Ирина Попова, Алиса Матуа уҳәа убас егьырҭгьы. Дырмит Гәлиа ихьӡ зху аԥсуаҭҵааратә институт ҵыԥх имҩаԥнагеит аҭҵаарадырратә форумқәа жәба рҟынӡа. Академиақәа хԥа рҿы аус рыдырулон 115-тема, урҭ рахьтә иахьа 37-тема хыркәшоуп.
Аихшьаларатә еизараҿы ажәахәқәа рыла иқәгылеит академик-маӡаныҟәгаҩ Лиосик Аиба, аҵарауаа: Анатоли Марколиа, Заур Шьалашьаа, Инварби Екба, Едуард Гәбаз.
Аихшьаларатә еизараҿы ирымоу аихьӡарақәа инрываргыланы иазааҭгылан иара убас ҳҵарауаа ирымоу апроблемақәагьы. «Аботаникатә институт анапхгаҩы Едуард Шамиль-иԥа Гәбаз иқәгылараҿ иҳәеит: «Анаука иара ахала изыҟалаӡом, аҳәынҭқарра аҟнытә адгылара аҭахуп, даара ицәгьоуп Аԥсуаҭҵаара аинститут аҭагылазаашьа, асубтропикатә дендропарк акәзар ацхыраара аҭахуп. Аԥсны иҳамоу аинститутқәа СССР иацәынхаз роуп, иҳагу уаҵәы ашҟа ахыгара аҭахым. Аԥсны иҳамоу аинститутқәа адунеи аҿы иззымдыруа аӡәгьы дыҟаӡам. Аус зуа ҳҵарауаа рыҩаӡара ҳаракуп, Урыстәыла аума, Европа аума ирываургыларатәы иҟоуп. Аихьӡара ахьҳамам изхароу амамзаара ауп. Ҳарҭ есымша аиҳабыра рылаԥш ҳхызароуп. Урыстәыла иахьа аибашьра шаҟа мал ақәнарӡуа жәбоит, аха анаука гәыгәҭажьны иҟаӡам. Ҳара ҳаҿгьы ари азҵаара хаданы иқәҳаргылароуп».
Аихшьаларатә еизара хыркәшо аҭҵаарадырра академиа 2023 шықәсазтәи аусура ибзиоуп ҳәа ахәшьара арҭеит.

Наира Сабекиа

Абаҩхатәра злаз иналукааша аԥсуа поет Иуа Коӷониа диижьҭеи 120 шықәса ҵит. Абри арыцхә иазкны уи данииз амш – март 13 рзы аиубилеитә хәылԥазы мҩаԥыргеит Аԥсны ашәҟәыҩҩцәа Реидгылеи И. Гь. Папасқьыр ихьӡ зху Аԥснытәи Амилаҭтә библиотекеи.
Ахәылԥаз ахь имҩахыҵит ашәҟәыҩҩцәа, аҵарауаа, аԥсуа интеллигенциа рхаҭарнакцәа, ауаажәларратә усзуҩцәа, акультуреи, аҟазареи, аҵареи русзуҩцәа, зиубилеи азгәарҭоз иҭынхацәа, иара убас астудентцәа, ашколхәыҷқәа, апоет ирҿиамҭақәа бзиа избо аӡәырҩы.

Аԥсны Аԥыза-министр Алеқсандр Анқәаб Ливан еиҿкаау «Ачерқьестә ассоциациа» ахада Риад Цыба зхадараҿы дыҟоу Ливантәи аԥсуа диаспора ахаҭарнакцәа идикылеит. Абри атәы аанацҳауеит Аминистрцәа Реилазаара апресс-маҵзура.
Ҳџьынџьуаа рҭоурыхтә ԥс­а­дгьыл ахь рырхынҳәразы Аҳәынҭқарратә еилакы ахантәаҩы Вадим Ҳаразиеи Жәлар Реизара-Апарламент адепутат Нарсоу Салаҟаиеи злахәыз ари аиԥылараҿы агуманитартә хырхарҭа уҳәа егьырҭ азҵаарақәа рыла Аԥсни Ливантәи адиаспореи русеицура иадҳәалоу азҵаарақәа ирылацәажәеит, иара убас ҳџьынџьуаа рҭоурыхтә ԥсадгьыл ахь рырхынҳәразы ирымоу алшарақәа ирзааҭгылеит.
«Акыр шықәса ҳаиҟәыҭханы ҳшыҟазгьы, ҳабацәеи ҳабдуцәеи рыдгьыл аҭааразы алшара шҳамамызгьы, ҳара есымша Аԥсны имҩаԥысуа зегьы ҳрызҿлымҳан. Уажәы амҩақәа анааты, алшара ҿыцқәа анцәырҵ, иаҳҭахуп Ҳаԥсадгьыл иахәаша џьара акы ҟаҳҵарц», - ҳәа Аԥыза-министр аԥсшәа иаҳәо, иазгеиҭеит адиаспора аԥыза Риад Цыба. Ахәҭакахьала, Алеқсандр Анқәаб ауаажәларра рыхдырраҿы, иара убас аҳәынҭқарра анапхгара инарыгӡо аполитикаҿы адиаспора аусацура хадара злоу ахықәкқәа ишыруаку азгәеиҭеит. Аԥыза-министр иажәақәа рыла, ареспублика анапхгара ҳаԥхьаҟагьы аҳәаанырцә иҟоу ҳџьынџьуаа рымадареи аус рыцуреи иазхиоуп.

Ааигәа Аҧсны Жәлар Реизара аилатәара мҩаҧысит. Амшхәаҧштә аҿы иқәгылан зҵаарак, анаҩс иҟан еиуеиҧшым егьырҭ азҵаарақәагьы.
Аҧсны Жәлар Реизара Аиҳабы Лаша Ашәба зегьы бзиала шәаабеит ҳәа раҳәо, адепутатцәа идирдырит еиуеиҧшым азҵаарақәа рыла ишалаго аилатәара.

Абна ԥсабара Адунеизегьтәи амш есышықәса иазгәарҭоит март 3 азы. Уи хықәкы хадас иамоу абна афаунеи афлореи рызҵаарақәа рганахьала ауаажәларра ирымоу адырра аизырҳара ауп.
Аԥсны зеиуахкыҟаӡам аԥсабара, уи аекологиатә проблемақәа, урҭ рыӡбашьа амҩақәа дрылацәажәеит Аԥсныпресс иаиҭаз аинтервиу аҟны Аԥсны аҭҵаарадыррақәа Ракадемиа аекологиа Аинститут аиҳабы, Аԥснытәи аҳәынҭуниверситет раԥхьатәи апроректор Роман Дбар.
– Роман Саид-иԥа, иаҳзеиҭашәҳәа ҳтәыла ԥсабаратә ҷыдарақәас иамоу?
– Аԥсны азҟазшьагәаҭоуп иҳараку азеиԥшбиологиатә, аекологиатә, аҳауатә еиуеиԥшымзаарала. Ари рнубаалоит аҵиаақәа рыхкқәа, аԥстәқәа рырацәара, иара убас атәыла иахыԥраауеит аԥсаатәқәа рмиграциатә мҩадуқәа руакгьы. Абри инаваргыланы, Аԥсны адунеи зегьы иаҟәыҭхоу дгьылбжьахам, абри аҟнытә ҳара иаҳныруеит апланета зегьы азы иҟазшьарбагоу аекологиатә проблема хадақәа. Урҭ иреиуоуп аҳаир аҟьашьра, аҳауа аҽыԥсахра, ҭыԥк аҟнытә даҽа ҭыԥк ахь ииасуа ахкқәа рхыԥхьаӡара амаҷхара, убрахь иналаҵаны аԥсаатәқәа уҳәа ахәаҷа-маҷақәа рыхкқәак.
– Иарбан хкқәоу Аԥсны аныӡаара ахықә аҟны инеины иҟоу?

– Аҵиаақәа ртәы уҳәозар, ҳара ҳҟны шәкы инареиҳауп џьара мацара изызҳауа, аендемикқәа ҳәа изышьҭоу аҵиаа жәлақәа. Хадаратәла, урҭ уԥылоит Гагратәи Бзыԥҭатәи ашьхарԥырақәа рҿы. Апроблема амҽхак заҟароу еилаҳкаарц азы иаазгоит ҿырԥштәык: иааидкыланы хкык адунеи аҟны иамҽханакыр ауеит рацәак идуум уадак аҟара, ҿырԥшыс иаагозар, аҵәҵәа сахьа змоу ашәҭ, мамзаргьы Гегатәи аӡхыҽҽа. Ус еиԥш иҟоу аҭыԥқәа ҳара ҳҟны имаҷӡам. Проблемас иҟоу убри ауп, урҭ даара иуашәшәыроуп, ирыхӡыӡаалатәуп, уи моу ауаҩы дазымхәыцӡакәа, ихы-игәы иҭамкәа иааидкыланы хкык зынӡаск адунеи ианыӡаауа иҟаиҵар ауеит.
Аԥстәқәа рыҩнуҵҟа абас еиԥш иуашәшәыроу ахкқәа рахь иԥхьаӡатәуп, раԥхьаӡа иргыланы рацәак зымҽхак змырҭбаауа организмқәак, ҿырԥштәыс иаагозар, аҳаԥқәа рыҩнуҵҟа зхы ныҟәызго. Адырреи азхәыцреи имамзар, анхамҩа знапы алаку ауаҩы изгәамҭаӡакәа Адгьыл аҿы хкык аҭархара илшоит. Абри ҟамларц азы ианыӡаауа аҵиаа хкқәа инарҵауланы рыҭҵаара аҭахуп, избанзар ахкы ақәӡаара – хьаҳәра зқәым процессуп. Ҳара ҳзы ари даара хра алоуп, избанзар миллион шықәса раахыс ишьақәгылоз аорганизмқәа ахьыҟоу атәылақәа рдунеитә реитинг аҟны Аԥсны аԥхьатәи ацәаҳәақәа руак ааннакылоит, убрахь иаҵанакуеит иҵаулоу аҳаԥқәа.