2024-2025 аҵарашықәс азы Аԥснытәи аҳәынҭқарратә университет ахь аусшәҟәқәа рыдкылара мҩаԥган аҵарадырратә программақәа 35 рыла.
Аԥсны Аҳәынҭқарра Ахада иҟаиҵаз адҵа ала актәи акурс аҿы абиуџьет харџь ала 397 ҭыԥ алкаан, урҭ рахьтә амагистртә программа ала 23 ҭыԥ.
Абакалавриат азы аҵарадырра (азанааҭқәа) рзы 676 арзаҳал ҟаҵан. Урҭ рҟынтәи 102-ҩык ашколхәыҷқәа ролимпиада "Аҳаракырахь амҩа" алҵшәақәа рыла уаанӡа аҭаларазы зсиа рыдыргалахьаз роуп.
11-ҩык ауаа аҩбатәи иреиҳау аҵараиурҭақәа рзы арзаҳалқәа рҩит, 12-ҩык амагистртә дипломқәа рзы.
Ҳазҭоу ашықәс азы ахырхарҭақәа 20 рҿы абиуџьеттә ҭыԥқәа рзы аконкурс ду мҩаԥысуеит.
Еиҳарак аҳасабырбақәа ҟазҵаз аҵарадырратә хырхарҭа “Аекономика” ауп, иара убас
аспециальност "Аиуриспруденциа".
Адкылара хада анхыркәшаха ашьҭахь, егьырҭ адкыларақәа рзы алаҳәара ҟаҵан анаҩстәи ахырхарҭақәа рҿы:
- "Аматематика";
- “Афизика”;
- “Абиологиа”;
- “Абнатә усқәа”;
- “Афармациа”;
“Аԥсуа бызшәеи алитературеи”;
- “Аԥсуа бызшәа иаԥсуам ашкол аҿы”;
- “Атәымтәылатәи абызшәақәеи (анемец бызшәа) акультурақәеи дырҵара атеориеи аметодикеи”;
- “Агроинженерра: Агробизнес аҿы атехникатә системақәа”;
- “Аҵиаақәа рыхьчара”;
- "Алагарҭатә классқәа рҵарадырра";
- "Ашколқәраҿынӡатәи аҵарадырра".
Сынтәа Аԥснытәи ауниверситет аҿы иаатит ахырхарҭа ҿыцқәеи аспециальностқәеи, урҭ рахь иаҵанакуеит “Афармациа”, “Азанааҭтә усура апсихологиа”, “Амузыкатә-театралтә ҟазара (Аоператә ашәаҳәара аҟазара)”, “Аҩныҵҟатәи адизайн”.
Аԥснытәи аҳәынҭқарратә университети Нхыҵ-Кавказтәи аҳәынҭқарратә академиеи ирыбжьарҵаз аиқәшаҳаҭра ахәҭак аҳасабала
“Афымцамчтә индустриеи аелектротехникеи” ахырхарҭақәа рҟны сынтәа раԥхьаӡа акәны абитуриентцәа рыдкылара мҩаԥган. Иҩын арзаҳалқәа 13. Ари аформат астудентцәа, иреиҳау азанааҭтә ҵарадырра анроуа, ҩ-университетк зныкала алгара алшара рынаҭоит – Аԥснытәи аҳәынҭқарратә университети Нхыҵ-Кавказтәи аҳәынҭқарратә академиеи.
Уаанӡатәи ашықәсқәа рзы еиԥш, сынтәагьы Аԥсны Аҳәынҭқарратә университет аҿы имҩаԥган ауниверситет аҭалара аԥхьатәи аҽазыҟаҵаратә школи афизика-математикатә школи.
Аҭаларазы ирҭиуаз аԥышәарақәа ҩ-етапктәи алҵшәақәа инарықәыршәаны, аҩбатәи иреиҳау аҵараиурҭа аҭаларазы арзаҳалқәеи, иара убас,
амагистртә программақәа рыла, иахьа Аԥснытәи аҳәынҭқарратә университет аҭалара азин рымоуп 700 инареиҳаны.
Аҩбатәи иреиҳау аҵареи амагистртә программақәеи рзы аусшәҟәқәа рыдкылара иацҵоуп.


Аманда Анталаа

Август 7 рзы Аԥсны Ахада Иусԥҟала Аԥсны Ашәарҭадаратә маҵзура ахантәаҩыс дҟаҵоуп Дмитри Қәычбериа.
Дмитри Қәычбериа Ашәарҭадаратә усбарҭақәа рсистемаҿ аус иуеит 2009 шықәса раахыс. 2023 шықәса декабр мза аахыс Аԥсны Ашәарҭадаратә маҵзура ахантәаҩы ихаҭыԥуаҩыс дыҟан,ԥхынгәы 26 рзы Аԥсны Ашәарҭадаратә маҵзура ахантәаҩы аамҭала инапынҵақәа рынагӡаҩыс даҭан.

Август 6 рзы Аԥсны Ахада Иусԥҟала Аԥсны адәныҟатәи аусқәа рминистрс дҟаҵоуп Сергеи Шамба.
Сергеи Шамба 2020 шықәса раахыс Аԥсны Ашәарҭадаратә хеилак амаӡаныҟәгаҩс дыҟан.
Раԥхьаӡа акәны иара адәныҟаполитикатә усбарҭа ахадас дҟалеит 1997 шықәсазы,2004 рҟынӡа ари амаҵура дахагылан. Аҩынтә раан аминистрс дыҟан 2004-2010 шықәсқәа рзы.

Август 6 рзы Аԥсны Ахада Аслан Бжьаниа Иусԥҟала Аԥсны Ашәарҭадара ахеилак амаӡаныҟәгаҩс даҭан Рауль Лолуа.
Рауль Лолуа 2017-2022 шықәсқәа рзы Аԥсны Апарламент афбатәи ааԥхьара адепутатс дыҟан. 2014-2015 шықәсқәа рзы Аԥсны аҩнуҵҟатәи аусқәа рминистрс дыҟан.
2008 шықәсазы напхгара аиҭон Атеррористҿагыларатә центр, уи ашықәсан ацентр урыстәылатәи архәҭақәа ирыцны Қырҭтәыла аҭынчра азаагаразы аоперациа нанагӡон.

Ажәытәӡатәи аҳәамҭақәа инарықәыршәаны, Анцәа ихазы иалхны имаз, аха адгьылқәа ршараан иагхан иааиз аԥсуа ианаишьаз – Аԥсны аԥсабара беиоуп шәаԥыџьаԥла. Адгьыл иҵоу амазарақәа рнаҩсгьы аӡиасқәа, абнақәа, ашьхақәа, амшыни уи иаԥну адгьыл чашәқәеи уҳәа, араҟа ирацәаӡоуп иуникалтәу аекологиатә система шьақәзыргыло аԥсабаратә беиарақәа.

Аида Гыцба лцәыргақәҵа аатит ԥхынгәымза 23 рзы Аԥсуа ҳәынҭқарратә драматә театр аҿы.
Аида Гыцба ддизаинеруп, дынхоит Москва, аҵара лҵон Иапониатәи академиа “DECO” захьӡу аҿы. Иреиҳау аҵараиурҭақәа ҩба дрылгеит, аха урҭ азанааҭқәа ирыдҳәаланы аус луӡом.

«Аҧсны Қырҭтәыла иахәҭакуп, Аҧсны Қырҭтәыла иадуп» уҳәа иахьатәи аамҭазы изҳәо ақырҭцәа даара ирацәаҩуп. Ақырҭцәа ҳара иҳаӷацәоуп, аха аҧсуаҵәҟьа дцаны Қырҭтәыла анхара даналага, уантәи ақырҭцәа дрыдгыланы аҧсуаа иара иган ахь ианхьаирҧшуа жәлар раӷа ҳәа ахьӡ ихылоит, зыҧсадгьыл зхы ақәызҵаз аҵеицәа рыхьӡ ирҧхашьоит.

Август 3 рзы, Москватәи аҳәынҭқарратә аргыларатә университет (НИУ МГСУ) аҟны аҵара зҵо аԥсуа студентцәа Александр Ашәбеи Осман Зекир-оглыи 5621 метра инаӡо Ельбрус мрагыларатәи аҳаракыра ихалеит.  

Дара мрагылара аганахьала амҩа ылхны, авулкан иаваланы ихалеит.

Астудентцәа фымш иныҟәеит, аҳаракыра ахалара жә-сааҭк иадхалеит.

Аҳаракыра ахалара даара аџьабаа шацызгьы, астудентцәа рықәлацәа адрыԥхьалоит рыԥсҭазаара активла имҩаԥыргаларц. Дара раԥхьаҟа хықәкыс ирымоуп авулкан Килиманџьаро ахалара.

Мадина Амҷԥҳа

2024-2026 шықәсқәа рзтәи хықәкылатәи анаука-тхникатә программа «Аҧсуадырреи кавказдырреи иактуалтәу рызҵаарақәа рыӡбара» аусура хацнаркит.

Аԥснытәи аспортсменцәа «Карате До Шотокан Риу Казе Ха» азы иаарту Европатәи ахраҿа агаразы аиндаҭлараҟны азеиԥшкомандаҿы актәи аҭыԥ ааныркылеит. Уи мҩаԥысуан август 4 рзы Аҟәа ақалақь аҟны. Араӡны иаԥсахеит Краснодартәи аспортсменцәа, аџьаз ранашьахеит Москватәи аобласт аҟынтәи аспортсменцәа.

Аиндаҭлараҿы аиааира згаз аспортсменцәа Европа еизгоу акоманда иахыԥхьаӡалахеит. Дара октиабр 3-5 рзы Мексика имҩаԥысуа III-тәи адунеизегьтәи ачемпионат рхы аладырхәыртә аҭагылазаашьа роуит.

Мадина Амҷԥҳа