Октиабр ҩеижәиакы рзы Аҧсны адәныҟатәи аусқәа Рминистрра Амедиацентр аҟны аконкурс «Аҧсны агәадура – 2022ш.» иалахәыз рахьтә аиааира згаз хҩык алкаахеит. Актәи аҭыҧ ааникылеит Валери Џьынџьал. Уи ипроект ашколхәыҷқәа рыбжьара ихадоу амедицинатә дыррақәа раларҵәара иазкуп. Аҩбатәи аҭыҧ даҧсахеит Гал араион ашәахтә инспекциа аусзуҩы Лев Буава. Уи аҳәынҭқарратә усбарҭақәа рҿы аусшәҟәқәа реикәыршара ацифровизациа иазкыз апроект рыдигалеит. Ахҧатәи аҭыҧ лгеит Россотрудничество Аҧсны иҟоу ахаҭарнакра аусзуҩы Руслана Гергедаа. Уи лпроект аҿартә политика аҿиареи анагӡареи иазкуп.

Ихьуаз ачымазара иахҟьаны ааигәа иҧсҭазаара далҵит Аҧснытәи аҳәынҭқарратә университет актәи апроректор, абиологиатә ҭҵаарадыррақәа ркандидат Виктор Илиа-иҧа Маланӡиа.

90 шықәса дшырҭагылаз иҧсҭазаара далҵит аҭоурыхҭҵааҩ, амилаҭ-хақәиҭратә қәҧара аветеран Ермолаи Кьасыгә-иҧа Аџьынџьал.

Аҧсны асахьаҭыхҩцәа рцәыргақәҵатә зал хада аҿы ҳҧыза ду Владислав Арӡынба изкыз афильм «Страсти по Владиславу» аҧызҵаз Ольга Давид-иҧҳа Дубинскаиа лфотоҭыхымҭақәа рцәыргақәҵа аартын, урҭ аҧҵоуп еиуеиҧшым аамҭақәа рзы. Дара зегьы Аҧсны жәлар, анхаҩы инаиркны ҳҵарауаа, ҳхақәиҭра аагаҩцәа уҳәа ирызкуп.

1970 шықәсазы абарҭ ахәажәак ихьӡыртәны исзеиҭеиҳәеит Уатаҧ инхоз, шәышықәса инарҭысхьаз аетнографиатә ансамбль «Нарҭаа» иалаз, Џьопуа Ҭарашь Маныхә-иҧа. Ҭарашь дшәаҳәаҩын, дкәашаҩын, ажәытә ажәабжьқәа рҳәара даара дазҟазан. Абар, дара ажәақәа: Цәаала Кьагәа, Цәымса Сеидыҟ, Ныга Иадгьац, Барбал Иасыф, Опцәа Шьаҳан, абарҭ ахьӡқәа схы-сгәы есымша иҭан, ааскьа абас Анцәа исзааиртит абарҭ ахәажәак рҭакқәа инеиҵыхны.

Аҧсны Жәлар Реизара – Апарламент Аиҳабы Лаша Ашәба Аҧснытәи аҳәынҭқарратә университет аректори аколлективи аҵараиурҭа 90 шықәса ахыҵра аиубилеи рыдиныҳәалеит.