52 шықәса дшырҭагылаз, акыраамҭа ихьуаз ачымаза­ра ӷәӷәа иахҟьаны, иԥсҭазаара далҵит арепатриант, Аԥсны Жәлар Реизара аԥшьбатәи ааԥхьара адепутат, Аԥсны жәлар Рџьынџьтәылатә еибашьра аве­теран, «Ахьӡ-Аԥша» аорден ахԥатәи аҩаӡара занашьоу Со­нер Неџьми-иԥа Гогәуа. «Ҩымзҟа раԥхьа уи Сҭампылынтәи диаргеит Москва ареабилитациатә центрқәа руак ахь. Ари ҳажәлар рзы, хаҭала сара сзы цәыӡ дууп», – Аԥсныпресс аҟны абас иҳәеит Аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа.

Аԥсныпресс. Аԥсны Очамчыра араиони Удмуртиа (Урыстәыла) Алнаштәи араиони акультура, атуризм, аҵарадырра, аспорт, ақыҭанхамҩа уҳәа рганахьала ау­сеицуразы аиқәышаҳаҭра рнапы аҵарҩит, – иаанацҳауеит Очамчы­ра-информ. Абарҭ амшқәа рзы Очам­чыра ақалақь иаҭааны иҟан Урыстәылатәи Афедерациа Удмуртиатәи Ареспублика Алнаштәи араион аделегациа. Уи напхгара аиҭон араион ахада Алеқсеи Се­мионов.

Асҭамыр Гәынбеи Мараҭ Кокосқьериеи аиааира ргеит, Ба­грат Ԥандариа иакәзар, ахацәа рыҩнуҵҟа ахы иақәиҭны аиқәԥаразы Ацентртә федералтә округ ачемпионат аџьаз ԥхьахәы иана­шьахеит, – иаанацҳауеит Аԥсны аспорт азы Аҳәынҭеилакы асаит. Ачемпионат мҩаԥысуан Брианск.