Ҳаамҭазы ааԥсарада иусура алацәажәара ҳалагаанӡа, исҭахын иаазыркьаҿны инысымҩа сазааҭгыларц. Едуард Гәбаз 1970 шықәсазы далгеит ГИСХ, 1984 ш. қәҿиарала ихьчеит адиссертациа. Итема иахьӡын «Аԥсны аевкалипт ҵлақәа рыхкы ҿыцқәа рбиологиатә ҟазшьарбага». Иара иҭиҵаауеит Аԥсны ианаало асубтропикатә ҵиаахкқәа, урҭ рышәҭышьа, насгьы рырҿиашьа.
Едуард Гәбаз 18 анаукатә усумҭақәа авторс дрымоуп, урҭ азкуп аефирхәшақәеи, афатә-архаагақәеи, ахәшәқәеи злырхуа акультурақәа. Аботаникатә баҳча напхгара азиуеит 2009 шықәса раахыс.
Ааигәа, абаҳча аусура иадҳәалаз ҳаиҿцәажәараҿ Едуард Шамил-иԥа дазааҭгылеит русура атәы. «СССР ахаан иҟан 300 баҳча, ҳара ҳбаҳча адунеиаҿ иреиӷьу ирхыԥхьаӡалан. Абра иаагоуп континентцыԥхьаӡа рҿынтә Аԥсны дгьыл ианаало аҵиаақәа. Аԥсны мацара ирызҳауеит ҩ-нызқь хкы аҵиаақәа. Иахьа ҳботаникатә баҳчаҿы иҟоуп хәнызықь инареиҳаны аҵиаа хкқәа».
Аԥсны анҭыҵ иҟоу егьырҭ аботаникатә баҳчақәа, урҭ рҵарауааи дареи аинырра бзиа рымоуп. Рҽаладырхәуеит аҭҵаарадырратә конференциақәа, даргьы арахь иаарыԥхьоит жә́ларбжьаратәи анаукатә конференциақәа анымҩаԥырго. «Иаҳзаахьеит еицырдыруа аҵарауаа абиологиа аганахьала Белоруссиа, Венгриа, Ермантәыла, Урыстәыла уҳәа рхаҭарнакцәа. Урҭ ҳботаникатә баҳча, Аԥсны аԥсабара ргәы атҟәеит, дареи ҳареи аиқәшаҳаҭра ҳабжьоуп».
Хаҭала, Едуард Гәбази апрофессор Сергеи Бебиеи Китаи аконгресс аҿы иҟан. Аекологиеи аԥсабарахьчареи рзы Аԥсны Аҳәынҭқарратә еилакы ахантәаҩы Савели Ҷыҭанааи аботаникатә институт аиҳабы Едуард Гәбази Британиа Ду аконференциаҿы ажәахәқәа ҟарҵеит. «Уимоу адунеи зымҽхазкыз апандемиа ашықәсқәа рзгьы онлаин-конференциақәа ирылахәын, Москва, Ҟазахсҭан– Алма-Ата имҩаԥысуаз аботаника иазкыз Жәларбжьаратәи аконференциақәа» ҳәа азгәеиҭеит зусура ԥкым адунеи ахи-аҵыхәеи иакәшахьоу Аботаникатә институт аиҳабы Едуард Гәбаз.
«Гәадуроуп ҳа ҳзы ҳҩыза Сергеи Миха-иԥа Бебиа Санкт-Петербург ишәҟәы иҭыҵыз «Аԥсны абна» зыхьӡу, аӡыргареи ахәшьара ҳаракӡеи ахьаиуз», иҳәеит иара ҳаиҿцәажәараан.
«Иахьа даара ишәарҭоу аҵиаақәа рчымазарақәа цәырҵит Шәача иҟаз олимпиада аамышьҭахь. Уи ачымазара ааха ӷәӷәа анаҭеит ашыц, апальма. Урҭ роуп асубтропика аԥшӡара Аԥсны иазҭо, абри даара ипроблеманы иҳамоуп»,– иҳәеит аинститут аиҳабы. «Лондонтәи сныҟәарак аан, избеит уаҟа аботаникатә баҳчаҿ ирааӡаз аԥсаатә ԥшӡақәа. Ҳәара аҭахым, абзиа утәылазгьы уеилаҳауеит, еиҿыскаар сҭаххеит аԥсаатәқәа ркәакь. Иааҳгеит абнакәтқәа, апавлинқәа, аха изыхҟьазаалак урҭ ҳарҿиартә, аҭааҩцәеи аԥшәмацәеи аднаԥхьалартә́ изыҟамлеит. Угәы унархьуеит ҳара ҳтәылауаа џьоукы ҳзашьҭоузеи ҳәа ҳаԥшӡарақәа ахьхыршьаауа», – иҳәеит акыршықәса абаҳча ссир еиҿкааны, сасгьы, аԥшәымагьы рыбла аргәырӷьаратәы иаазго аинститут аиҳабы Едуард Гәбаз.
Аинститут аихьӡарақәа дырзааҭгыло иара дзавымсит аҿар рықәҿиарақәа. «Анкьа Урыстәылатәи аҵараиурҭақәа рҟны акәын аспециалистцәа ахьеиҵаҳааӡо, иахьа Аԥсны аҭҵаарадыррақәа Ракадемиа иабзоураны араҟа иазыҟаҳҵоит аҿар. Урыстәылантәи аспециалистцәа, аҵарауаа ааны абра алекциақәа ирзаԥхьоит. Академиа 12-ҩык алгахьеит, сынтәа хҩык адиссертациа рыхьчеит. Еиҳарак аҭыԥҳацәа роуп иаҿу, арԥарцәа маҷхеит, ҳара ҳнапы злаку аус аҿы арԥарцәа еиҳа иаҭахуп, аекспедициақәа, абнахь аныҟәара – иҟоуп аҭыԥҳацәа ирзышьҭымхуа аусқәа.
Ҳара аԥсабара ауп ҳзааӡо, уи ада аԥсҭазаара ыҟаӡам, уи дырны хаҭа-хаҭала ҳара-ҳара ҳанеилибакаа, ҳтәылагьы ҳарԥшӡоит, ҳахгьы еиқәҳархоит», – абас ихиркәшеит аҵарауаҩ ҳаиҿцәажәара.
Едуард Гәбаз лҵшәабзиала иусуразы ианашьоуп «Ахьӡ-Аԥша» аорден III аҩаӡара. 75 шықәса ихыҵра идныҳәало, изеиӷьаҳшьоит агәамч ӷәӷәа, ихы-иԥсы здиҵо иусураҿы ақәҿиара дуқәа.
Наира Сабекиа
