Аҧсны Ахада ихаҭыҧуаҩ Бадра Гәынба идикылеит ауаажәларратә еиҿкаара "Абаза" амилаҭтә хеилак ахаҭарнакцәа. Уи асасцәа дрыдныҳәалеит, иагьазгәеиҭеит: "Ари хҭыс бзиоуп, избанзар иахьа алшара ҳамоуп Амилаҭтә хеилак "Абаза" ахаҭарнакцәа рҟны ҳажәларқәа рҿаҧхьа иқәгылоу азҵаарақәа рылацәажәаразы". Ахада ихаҭыҧуаҩ иазгәеиҭеит аҧсуааи абазақәеи рыбжьара аимадарақәа рырҕәҕәара акырӡа шаҵанакуа, ҷыдала иаликааит абри азҵаараҿы Адунеизегьтәи аҧсуа-абаза конгресс аҵакы. "Адырга ҷыда амоуп Тарас Мирон-иҧа Шамба иирамш аҽны ҳаиҧылара ахьымҩаҧысуа. Уи 25 шықәса инеиҧынкыланы аҧсуа-абаза жәлар Жәларбжьаратәи рассоциациа напхгара аиҭон. Сара издыруеит шәара шәгәы иҵхо азҵаарақәа. Сгәы иаанагоит, урҭ иахьа иаартны ҳрылацәажәап ҳәа", – иҳәеит Гәынба.

"Аҧсадгьыл аҿаҧхьа илшамҭақәа рзы, активла имҩаҧигауа ауаажәларра-политикатә усуразы "Ахьӡ-Аҧша" аорден ахҧатәи аҩаӡара ианашьазааит Гыцба Леванти Борис-иҧа", – иазгәаҭоуп август 1 азы аҳәынҭқарра Ахада иҭижьыз Аусҧҟаҿы

Ииуль 27 азы имҩаҧысыз Аҧсны Жәлар Реизара аилатәараҿы ишьақәырҕәҕәан 2022 шықәсазы Ареспубликатә биуџьет ианагӡашьоу азы аҳасабрба. Абри аӡбамҭа рыбжьы арҭеит 27-ҩык адепутатцәа, ҩыџьа аҿагылеит, аӡәы иҽааникылеит. Жәлар Реизара аилатәараҿы аҳасабрба ҟаиҵеит Аҧыза-министр ихаҭыҧуаҩ, афинансқәа рминистр Владимир Делба. Аҧсны Аҳәынҭқарратә биуџьет иаланагалаз ахашәалақәа рзеиҧш мҽхакы иартәеит 11 миллиарди 571 миллиони 535, 9 нызқь мааҭ, планла иарбаз аҟаҵарбақәа 10 миллиарди 737 миллиони 381,5 нызқь мааҭ рҭыҧан.

Аҧсны Ахада Аслан Бжьаниа Урыстәылатәи Афедерациа Апрезидент Иусбарҭа анапхгаҩы актәи ихаҭыҧуаҩ Сергеи Кириенко ииубилеи идиныҳәалеит.

Ииуль 14 азы Урыстәылатәи Афедерациа Апрезидент Москвамҵантәи ирезиденциа "Горки – 9" аҟны имҩаҧысит Аҧсны Ахада Аслан Бжьаниеи Урыстәылатәи Афедерациа Ашәарҭадара Ахеилак ахантәаҩы ихаҭыҧуаҩ Дмитри Медведеви реиҧылара. Бжьаниеи Медведеви инҭкааны ирылацәажәеит еиуеиҧшым аусхкқәа рганахьала ҩ-ганктәи аусеицура азҵаарақәа, – иаанацҳауеит Аҧсны Ахада ипресс-маҵзура.

2022 шықәса актәи ашықәсбжала Аҧсны иит 562-ҩык ахәыҷқәа, урҭ рахьтә 283-ҩык ҷкәынцәоуп, 279-ҩык ӡҕабцәоуп. Аҧсныпресс ахь абри атәы аарыцҳаит Аҧсны агәабзиарахьчара Аминистрра аҟнытә. Ҳазну ашықәс азы ииз ахәыҷқәа рахьтә 341-ҩык аҧсуаауп, 66-ҩык – аерманцәа, 63-ҩык – ақырҭцәа, 40-ҩык – аурысцәа, 52-ҩык – егьырҭ амилаҭқәа.

2022 шықәсазы, маи  5 аҽны, Аҧсны Аҳәынҭқарра,  Ақалақь-Фырхаҵа Гәдоуҭа, Сергеи Платон-иҧа Дбар ихьӡ зху Гәдоуҭатәи аҭоурыхтә музеи ахыбраҿы имҩаҧысит аҵарауаҩы-аҭоурыхҭҵааҩы Игор Ражден-иҧа Марыхәба ишәҟәы "Аҧсны: 1967, 1978 шықәсқәа рзы" зыхьӡу аӡыргара, ахцәажәара. Ари аиҧылара еиҿылкааит, иагьымҩаҧылгеит Гәдоуҭатәи амузеи анапхгаҩы Гугуца Шьаликәа-иҧҳа Џьыкырҧҳа.

Ииуль 18 азы аҳазалхырҭатә ҭыҧ "Ҧсоу" аконтрабандеи аҳазатә зинеилагарақәеи ирҿагыланы ақәҧаразы аҟәша аусзуҩцәа, ироуз аинформациа ахы аҵыхәа-анеилдыргоз, иааныркылеит, иагьеимырдеит Урыстәылатәи Афедерациантәи иаауаз, Аҧсны атәылауаҩ Агрба Г.В. дзықәтәаз автомашьына. Аҳәынҭқарратә ҳазалхырҭатә еилакы асаит излаанацҳауа ала, автомашьына аидараҭаҵарҭаҿы ирбеит, иагьҭыргеит Аҧсныҟа заагара рмаҷу акриптоҧарақәа рырҳаразы амаругақәа ҩба. Абри административтә зинеилагара иазку аматериалқәа нашьҭуп аҳазатә усҭҵаарақәа рыҟәша ашҟа.

Венесуела Апрезидент Николас Мадуро Аҧсны Ахада Аслан Бжьаниа идиныҳәалеит Аҧсни Венесуелеи рыбжьара адипломатиатә еизыҟазаашьақәа рышьақәыргылара ашықәсхыҵра.

Ииуль 21 азы Урыстәылатәи Афедерациа Ацҳаражәҳәаҩ Ҷыда Михаил Шургалин Аҧсны Аҳәынҭқарра Ахада Аслан Бжьаниа инапаҿы ииркит агәраргагатә шәҟәқәа.