«Аԥсны жәлар аибашьраҿы аиааира ргеит, аҭынч ԥсҭазаараҿгьы иаиааиуеит, ҳара аԥхьаҟа аизҳазыӷьара амҩа иацаҳҵоит, арбгара акәымкәа», – иҳәеит Аслан Бжьаниа 1992-1993 шықәсқәа рзы Аԥсны жәлар Рџьынџьтәылатә еибашьраҿы Аиааира 30 шықәса ахыҵра иазкыз арратә парад аҟны.

Аԥсны Қырҭтәыла Аҳәынҭсовет архәҭақәа рҟынтәи ахы иақәиҭыртәижьҭеи 30 шықәса ҵит. Цәыббрамза 30 рзы Аԥсны иазгәарҭоит Аиааиреи Ахьыԥшымреи Рымш. Ахьӡ-Аԥша апарк аҟны Аԥсны жәлар Рџьынџьтәылатә еибашьраҿы иҭахаз Рбаҟа амҵан ашәҭшьыҵәрақәа рышьҭаҵара мҩаԥысит.

Аԥсны Ахадеи ажәлари рахь Урыстәыла Апрезидент Владимир Путин Аслан Бжьаниа Аиааира Амш идиныҳәалеит. Уаҟа иазгәаҭоуп: «Ҳаҭыр зқәу Аслан Гьаргь-иԥа, гәык-ԥсык ала ишәыдысныҳәалоит Аԥсны Аҳәынҭқарра аныҳәа - Аиааиреи Ахьыԥшымреи Рымш.