Аусмҩаҧгатәқәа рынагӡара иалахәуп аҩнуҵҟатәи аусқәа рминистрра анапаҵаҟа иҟоу аҟәшақәа, иара убас ақалақьтәи араионтәи ҟәшақәа.

Ас еиҧш иҟоу аусмҩаҧгатәқәа хықәкыс ирымоуп амҩақәа ирну рыҩнуҵҟа аҭакҧхықәра ашьҭыхра, убри ала амҩатә машәырқәа реиҵатәра, насгьы аҧсҭбарақәа иахьынӡауа раанкылара.

Даара ииашаны иазнеиуеит автомашьынақәа амҩадуқәа рҟны иахьаарықәшәо идмыргылаларц аныҟәцаҩцәа иахьрабжьо. Ари акырӡа аҵанакуеит аҳҭны-қалақь аҩнуҵҟа, избан акәзар, изеицәааӡарызеи, аӡәырҩы рмашьынақәа иахьаарықәшәо иаанрыжьуеит, егьырҭ амҩа ианысуа ирҧырхагома ҳәа егьазхәыцуам. Ақалақь иахьаҵанакуа ари аҭагылазаашьа даара ауадаҩрақәа аҧнаҵоит, ашәарҭара ацуп, амашьынақәа анеиҿасуагьы ҟалалоит.

Анс акә, арс акә, зехьынџьара даараӡа аилыркааратә, апрофилактикатә усура аҭахны иҟоуп, уи арҵабыргуеит лассы-лассы амҩақәа рҟны иаабо аҭагылазаашьа. Ус анакәха, иааиҧмырҟьаӡакәа иазхьаҧшлатәуп. Ишдыру еиҧш, аҧхьа игылоуп ауаҩытәыҩса иҧсҭазаара.