Аԥсуаа жәаԥҟаны ирҳәоит уҽыззыукуа аҽузнакуеит ҳәа. Уи знаало аҭагылазаашьақәа рацәоуп, аха еснагь ҵакыс иамоу акоуп-иагьа иуадаҩзаргьы, хықәкыла узызнеиз, уҽыззукыз аус уқәманшәалахоит.

Лаҵарамза 21, 1844 шықәсазы диит еицырдыруа аԥсуа меценат, агуманист, акурорттә қалақь Гагра ашьаҭаркҩы Алеқсандр Пиотр-иԥа Ольденбургски.Сынтәа диижьҭеи 180 ш. ҵит.

«Аԥсуа хаҵа ииҳәаз ҳәазароуп. Ихымҩаԥгашьа, ицәажәашьа, итәашьа, игылашьа, ихәыцшьа раӡазароуп… Ажәлар рҿы иқәгыланы ажәа здырҳәоз, идырцәажәоз, хьаҳәа-ԥаҳәа змамыз, зыԥсы цқьаз, ҳажәлар рус азы иааԥсахьаз, иаҽԥныуҳәало акгьы имамзар акәын…