Нанҳәамза 17 рзы Аҧсны Ауаажәларратә палатаҿы имҩаҧысит Аҧсны Ахада Аслан Бжьаниа далархәны аилатәара. Уи ҩ-сааҭк инарзынаҧшуа ицон. Аилатәара аартуа Ауаажәларратә палата амаӡаныҟәгаҩ, Аҧсны Анацәа Рхеидкыла аиҳабы Гәыли Кьычба илҳәеит, иахьатәи ҳаамҭазы Пицундатәи аҳәынҭдача иазкны Аиқәышаҳаҭра анапаҵаҩразы ауаажәларраҿы иҟоу агәынамӡарақәа инарымаданы, гәыҧҩык ауаажәларра рхаҭарнакцәа ашәҟәы шырҩыз Ауаажәларратә палатахь, алацәажәара ахаҵгыларазы.