Аҧсны Ахада Аслан Бжьаниа аекономика хра злоу азҵаарақәа ирызкны аилацәажәара мҩаҧигеит, – иаанацҳауеит Ахада ипресс-маҵзура.

Аҧсны Ахада ихаҭыҧуаҩ Бадра Гәынба Ҟарачы-Черқьестәыла Абыргцәа Рхеилак ахантәаҩы Абу-Иусуф Банов инапаҿы ииркит Аҧсны иреиҳаӡоу аҳәынҭқарратә ҳамҭа – «Ахьӡ-Аҧша» аорден ахҧатәи аҩаӡара. Аҧсны Ахада Аслан Бжьаниа Иусҧҟала 1992-1993 шықәсқәа рзы Аҧсны жәлар Рџьынџьтәылатә еибашьраан илшамҭақәа рзы, Аҧсни Ҟарачы-Черқьестәылеи реиҩызаратә еизыҟазаашьақәа рырҕәҕәараҿы илагаламҭазы, активла имҩаҧигауа аусуразы Абу-Иусуф Банов 2022 шықәса маи 3 азы ианашьан «Ахьӡ-Аҧша» аорден ахҧатәи аҩаӡара.

Аҧсны иҟоу Урыстәыла Ацҳаражәҳәаҩ Михаил Шургалин дырҧылеит Аҧсны атәылахьчара аминистр Владимир Ануеи аусҳәарҭа анапхгареи. Реицәажәараҿы аганқәа рзааҭгылеит Урыстәылеи Аҧсни рырратә усеицура азҵаарақәа.

Агәабзиарахьчара аминистр Едуард Быҭәба ихантәаҩрала имҩаҧысит ауааҧсыра акоронавирустә инфекциа рацәыхьчаразы Аоперативтә штаб аилатәара. Аҳақьымцәа иазгәарҭоит ачымазара ашьҭыҵра ишаҿу, Ковид-19 хәыҵҟьеит араионқәа зегьы рҟны. Хадаратәла ичмазаҩцәахаз ирыдырбалоит аштамм «омикрон», ачымазарагьы рацәак аҽараапкуам.

В.Г. Арӡынба ихьӡ зху Аибашьра Ахьӡ-Аҧша Аҳәынҭқарратә музеи аҟны ааигәа Аҧсны Ахада иҟны иҟоу астратегиатә ҭҵаарақәа Рцентр астол гьежь мҩаҧнагеит, Аҧсны жәлар Рџьынџьтәылатә еибашьра ианалагаз аахыс ҷҭ шықәса аҵра иазкны. Аиҧылара анапхгаҩы – астратегиатә ҭҵаарақәа Рцентр аиҳабы Виачеслав Чрыгба иажәаҿы иазгәеиҭеит аиааира шзалымшоз ажәлар зегьы реидгылара ада, Владислав Арӡынба ахара дхәыцны, агәаҕьра аарҧшны имҩаҧигоз анапхгара ада, аҧсуа еибашьцәа рхамеигӡареи рхымшаҭареи…

Аџьынџьтәылатәи аибашьра Ду ҳҭоурых адаҟьақәа рҟны иҷыдоу аҭыҧ аннакылоит. Зхәышҭаарақәа ныжьны зыҧсадгьыл аҿаҧхьа зуалҧшьақәа назыгӡоз асолдатцәа рахьтә анцәа имчала зыҧсы ҭаны ихынҳәқәаз рацәоуп, аха иҟоуп зымаха-зышьаха еибгамкәа иааз, убас хабарда ибжьаӡыз, ишьыз. Иахьа зыӡбахә шәзеиҭасҳәо Дәрыҧшьтәи аибашьҩы Уаҳаид Чуаз иҩныҟа дхынҳәит, аха араҟа изыҧшын аибашьра иахылҿиааз ажәабжь хьанҭақәа.