Ааигәа Аҧсны Ахада Аслан Бжьаниа инапы зҵаиҩыз Аусҧҟа инақәыршәаны еицырдыруа Кавказҭҵааҩцәа ируаӡәку, афилологиатә ҭҵаарадыррақәа рдоктор, Х.М. Бербеков ихьӡ зху Ҟабарда-Балкариатәи аҳәынҭқарратә университет аурыс бызшәеи азеиҧш бызшәадырреи ркафедра апрофессор, Аҧсны аҭҵаарадыррақәа Ракадемиеи Адыгатәи жәларбжьаратәи аҭҵааратә Академиеи ракадемик, Жәларбжьаратәи Кавказтәи алингвистикатә еилазаара алахәыла Зинаида Михаил-иҧҳа Габуниа лыҭҵаарадырратә лшамҭақәеи урҭ аҧсҭазаараҿы қәҿиарала рхархәареи рзы илыхҵоуп «Аҧсны аҭҵаарадырра зҽаҧсазтәыз аусзуҩ» ҳәа аҳаҭыртә хьӡы.

Август 23 рзы Аҧснытәи Асахьаҭыхыҩцәа Реидгыла ацәыргақәҵатә зал хадаҿы иаартын еицырдыруа асахьаҭыхҩы Баҭал Џьапуа иусумҭақәа рцәыргақәҵа. Уи иаҭааит аҧсуа ҵарауаа, аинтеллегенциа, аҟазара абзиабаҩцәа, аҿар.

Абар мышқәак роуп инхаз, иалагоит аҵарашықәс ҿыц. Раҧхьаӡа акәны ашкол ахь зшьаҿа еихызго ахәыҷқәа ргәы хыҭ-хыҭуа иазыҧшуп раҧхьатәи аҵәҵәабжьы. Сынтәатәи ашықәс азы 2452-ҩык ахәыҷқәа ршьаҿа еихыргоит адыррақәа рдунеи ашҟа. Аҧснытәи ашколқәа зегьы азхиоуп аҵаҩцәа рыдкылара.

1990 шықәсазы Ҭырқәтәылатәи ҳџьынџьуаа ргәыҧ даланы раҧхьаӡа акәны Аҟәа иаҭааз гәыҧҩык ҳџьынџьуаа дрылан Ҭырқәтәылан, Есқьишьеҳир иаҵанакуа Мусаҩзу ақыҭа еиуаз Ерсын Чқәа.

Август 30 рзы иазгәарҭоит хабарда ибжьаӡыз Жәларбжьаратәи рымш. Иахьа адунеи зегь аҿы хабарда ибжьаӡыз мамзар ҳаамҭазгьы еиуеиҧшым аҭагылазаашьақәа ирхырҟьаны ибжьаӡуа рхыҧхьаӡара нагӡаны еилкаам. Ҵабыргны уи хьаа дууп, харҭәаашьа змам ацәыӡ зауз аҭынхацәеи ақәлацәеи рзы.