Аҟәа, Амҳаџьырцәа Рыԥшаҳәаҿы аиԥхныҩлара официалла аартра аҽны уи иалахәыз дрыдныҳәалеит Аԥсны Ахада ихаҭыԥуаҩ Бадра Гәынба. Уи иазгәеиҭеит ашықәсан ари зымҽхак ҭбаау спорттә хҭысны ишыҟоу. Уи иалахәыз зыгьы ақәҿиарақәа рзеиӷьишьеит.
Аиԥхныҩрақәа ирылагаанӡа амарафон алахәылацәеи ахәаԥшцәеи Амҳаџьыраа Рыԥшаҳәаҿы инарҭбаау акультура-лахҿыхратә программа рзыԥшын.
Зегьы реиҳа анырра бзиа узҭо усмҩаԥгатәны иҟалеит амилаҭтә чысхкқәеи аҩи рфестиваль. Амарафон асасцәа ибеиоу Аԥсны атрадициақәеи акультуреи рдунеи аҽагәылахаларазы хра злоу алшарақәа рзаԥҵан, ргьамақәа рбар алшон хкы рацәала ачысхкқәа, арыжәтә, ашәырӡқәа, ажьырӡы уҳәа. Активла аԥсшьараамҭа ахгара бзиа избо рзы аԥышәа змоу аинструкторцәа рнапхгарала ахыци ахәымпали рыла ахысраҿы рымчқәа ԥыршәарц азы алшара рыман.
Амузыкатә фестиваль еизнагеит анагӡаҩцәа ҿарацәа. Ахәаԥшцәа агәырӷьареи алахҿыхреи зцыз зеиӷьаҟам анырра рнаҭеит ари аконцерт.
Ахаа-мыхаақәа рыбзиабаҩцәа рзы еиҿкаахеит аԥсуа хаа-мыхаа-хкы – аџьынџьыхәа аҟаҵаразы аҟазара акласс. Аҟазацәа асасцәа ари агәырхаага аҟаҵара иаҵоу амаӡақәа рзеиҭарҳәон, иара убас урҭ ҿыц иҟаҵоу ачыс агьама ддырбон.
«Шықәсыки бжаки рыҩныҵҟа ҳара, Урыстәыла, Ҟазахсҭан, Белоруссиа уҳәа егьырҭ атәылақәа рҟынтәи алахәылацәа ахәыҷтәы атлетикатә еиԥхныҩлара адагьы, Аԥсны акультурагьы атәы еилыркаарц азы ари ахҭыс ҳҽазыҟаҳҵон.
Иахьа аицлабрақәа рхы аладырхәуеит 13 шықәса зхымҵыц ҩышә-ҩык рҟынӡа ахәыҷқәа.
Шәареи ҳареи иахьа Аԥсны атлетика лас аҭоурых аҿиара ҳалахуп, убри аан зеиӷьаҟам, убла хызкуа аԥшӡарақәа, амш бзиа, аҳауа зҩыда, афатә хаа, иааидкыланы агәалаҟазаара аиуразы алшара ҳамоуп», – Аԥсныпресс акорреспондент диҿцәажәо, еиҭалҳәеит амарафон аиҿкааҩ, «Аҩратә ҭоурых» («Беговая история») аиҿкааҩ, адиректор хада Анастасиа Мачульскаиа.
Амш ахҭыс хада акәны иҟалеит ахәыҷқәа реиԥхныҩлара. Уи рхы аладырхәит 13 шықәса рҟынӡа зхыҵуа 200-ҩык раҟара, Аԥсны, Белорус, Ҟазахсҭан, Кыргызҭан атәылақәа рҟынтәи аспортсмен ҿарацәа.
6-9 шықәса зхыҵуа аспортсменцәа рыбжьара 1 км. рҟынӡа аиԥхныҩлараҿы аиааира ргеит Софиа Чаабали Ервин Асланиани, аҩбатәи аҭыԥ – Наала Бессоноваи Николаи Савинкини, ахԥатәи аҭыԥ ааныркылеит Манана Ашьхаруеи Кирилл Макарови.
10-13 шықәса зхыҵуа аспортсменцәа рыбжьара аиааира ргеит Ангелина Рушьчаки Сабри Нанбеи, аҩбатәи аҭыԥ ааныркылеит Анастасиа Ковалиоваи Алеқсеи Бондари, ахԥатәи аҭыԥ ааныркылеит - Даниел Ҭурқиеи Ерик Асланиани. 500 м. рҟынӡа инаӡо адистанциа ала аҩрақәа зхы рылазырхәыз 5 шықәса рҟынӡа зхыҵуа ахәыҷқәа зегьы агәаларшәагатә ҳамҭақәеи амедалқәеи ранашьахеит.
Адуцәа рыҩнуҵҟа аиԥхныҩлара рхы аладырхәит 700-ҩык.
42, 2 километр ахьыбжьаз аиԥхныҩлараҿы аиааира игеит Курск ақалақь аҟынтәи Артиом Маиоров. Аҳәса рыбжьара актәи аҭыԥ аанылкылеит Раменское аҟынтәи Ирина Шевченко.
Москватәи аобласт иатәу Артиом Цибак 21, 1 километр ахьыбжьаз аиааира игеит, аҩбатәи аҭыԥ – Алеқсандр Пирогов (Уфа), ахԥатәи – Борис Скрипников (Москва).
Аҳәса рыбжьара актәи аҭыԥ аанылкылеит Татиана Никульина (Сыкытвкар), аҩбатәи – Наталиа Раваева (Аҟәа), ахԥатәи – Ирина Колесникова (Белгород).
Аиааира згази аԥхьахәқәа заузи аҳамҭақәа ранашьара рхы аладырхәт Аԥсны Ахада ихаҭыԥуаҩ Бадра Гәынба, аҿари аспорти русқәа рзы Аҳәынҭеилакы ахантәаҩы Ҭарашь Ҳагба, Аҟәа ақалақь ахадара аиҳабы ихаҭыԥуаа Асҭамыр Ашәба, Леон Кәарҷиа, Аԥсны триатлон Афедерациа апрезидент Борис Барцыц.
