Едуард Быҭәба араион ахада Валери Аҩӡбеи ахәышәтәырҭа аҳақьым хада Ҳаџьараҭ Шамбеи иарбоу амедусбарҭа аусуразы дрыҿцәажәеит.
Ирылацәажәеит еиԥҟьарада аф­ы­­мцамч ала аиқәыршәара, автопарк аӡынра азыҟаҵара, ахәшәқәеи амедицинатә маҭәахәқәеи рыла, акадрқәа рыла аиқәыршәара уҳәа ирыдҳәалоу азҵаарақәа жәпакы.
Афымцамч арцәара иадҳәаланы ишьақәгылар зылшо аҭагылазаашьақәа раан ахәышәтәырҭа адизельтә генератор ала еиқәыршәоуп, аспонсорцәа рыцхыраарала ирласу амедицинатә цхыраара амашьынақәа зегьы шьаҭанкыла аиҭашьақәыргылара иахысуеит, ахәышәтәырҭа хәшәыла еиқәыршәоуп, ахәышәтәырҭаҿы акадрқәа разымхара ыҟаӡам.
Изҵаара хаданы уажәы иқәгылоу акомпиутертә томограф аи­ҭа­шьақәыргылара ауп.
«Гәдоуҭа араион дууп, арахь иаауа апациентцәа реиҳарак атомографиатә ҭҵаара рзымҩаԥгатәхоит. Аппарат излауала ирласны еиҭашьақәыргылатәуп, аха уи аҭахуп», - инаҵшьны иазгәеиҭеит Едуард Быҭәба.
Афон Ҿыц ахәышәтәырҭа аҳа­қьым хада Луиза Арӡынба аминистр амедусбарҭа адизель-генератор амамзар ада ԥсыхәа шыҟам азы адырра илҭеит. Афымцамч аныҟам аамҭазы адизель-генератор акырӡа ихымԥадатәиуп. Ирласу амедицинатә цхыраара амашьынақәа ртехникатә ҭагылазаашьа бзиоуп, урҭ ишахәҭоу ала ауааԥсыра рымаҵ аура алдыршоит. Ахәышәтәыраҿы акадрқәа разымхара ыҟаӡам.
Аминистр ахәышәтәырҭа ан­апхгара ақәиргәыӷит адизель-генератор аахәара азҵаара аӡбара шалыршахо азы.
Аԥсны агәабзиарахьчара аминистр Едуард Быҭәба Гагра араион ахәышәтәырҭа хада, Ареспубликатә реабилитациатә центр, иара убас Ԥицунда ақалақь ахәышәтәырҭа даҭааит, – адырра ҟанаҵоит атәыла агәабзиарахьчара Аминистрра апресс-маҵзура.
Гагра араионтә хәышәтәырҭа хада аҳақьым хада Индира Арсалиа адырра ҟалҵеит ахәышәтәырҭа ааигәа атехникатә гәаҭара ишахысыз, аштаттә режим ала аус зуа адизель-генератор ала, ишеиқәыршәоу, ирласу амедицинатә цхыраара автопарк иахәҭоу амашьынақәа рыла ишеиқәыршәоу, урҭ зегьы ртехникатә ҭагылазаашьа шыбзиоу азы адырра ҟалҵеит. Акурорттә сезон азы иҟаз акадртә уадаҩрақәа Урыстәылатәи рколлегацәа рыцхыраарала аӡбара алыршахеит, урҭ инеиԥынкыланы Аԥсныҟа иааны амедусбарҭақәа рҿы аус руан.
Иахьазы ахәышәтәырҭаҿы Башкортосҭанынтәи ареаниматологцәа ҩыџьа аус руеит. Ареспубликатә реабилитациатә центр (КБРЦ) аҿы аминистр уи аҳақьым хада Валери Аҩӡба диҿцәажәеит, араҟа ахәышәтәра иахысуа аветеранцәа дырԥылеит. Едуард Быҭәба урҭ рыкрыфара, хәшәыла реиқәыршәара, иарбоу амедусбарҭаҿы рыҟазаара аҭагылазаашьақәа уҳәа дрызҵааит.
Ԥицунда ахәышәтәырҭа аӡынра азыҟаҵара азҵаарала аминистр Едуард Быҭәба ақалақь ахада Руслан Хәынҵариеи астационар аҳақьым хада Савели Серетидии дрыҿцәажәеит. Аминистр ирласу амедицинатә цхыраара амашьынақәа зегьы ртехникатә ҭагылазаашьа бзиоуп, аштат нагӡаны еиқәыршәоуп ҳәа адырра ирҭеит. Акызаҵәык уадаҩраны иҟоу – адизель-генератор амчхара азымхара ауп.