Октиабр 11 – ҳҳәынҭқарра аҭоурых аҿы акрызҵазкуа рыцхәуп. Ампыҵахалаҩ иҟнытә ақалақь Гагреи атәыла мраҭашәаратәи ахәҭеи рхақәиҭтәра иааирала ианхыркәшаха анаҩс, 1992 шықәса ари амш аҽны, Аԥсны Ареспублика Иреиҳаӡоу Асовет Апрезидиум Ахантәаҩы Владислав Григори-иԥа Арӡынба Аусԥҟа инапы аҵаиҩит Атәылахьчара Аминистрреи Аштаб хадеи раԥҵаразы.

Аԥсны Аҳәынҭқарра Ахада Аслан Бжьаниа Урыстәылатәи Афедерациа аҳҭнықалақь ахь иусуратә визит аҳәаақәа ирҭагӡаны, Москва еиуеиԥшым аҵараиурҭақәа рҟны аҵара зҵо астудентцәа дырԥылеит, ҳәа адырра ҟанаҵоит Аԥсны Аҳәынҭқарра Ахада ипресс-маҵзура. Аиԥыларахь инеит 150-ҩык инарзынаԥшуа астудентцәа. Аиԥылара аартуа, Аслан Бжьаниа иазгәеитеит, астудентцәа Урыстәыла аҳҭнықалақь аҟны Аԥсны Аҳәынҭқарра хаҭарнакра шазыруа, дара рҵараҟны ирымоу алҵшәақәеи аихьӡарақәеи рыла Аԥсназы агәаанагара шышьақәгыло.

Аԥыза-министр Алеқсандр Анқәаби Урыстәыла афинансқәа рминистр ихаҭыԥуаҩ Алеқсеи Сазанови анаҩстәи аҩганктәи аусеицура азҵаарақәа ирылацәажәеит. Аиԥылара далахәын Аԥыза-министр ихаҭыԥуаҩ, афинансқәа рминистр Владимир Делба.