Згәы цқьаз,игәымшәаз,ачҳара злаз,зыԥсҭазаара аҵкьыс зыԥсадгьыл бзиа избоз, иахӡыӡаауаз, зыхьӡ хьтәы нбанла аҭоурых ианылаз. Аԥсуа жәлар игәалашәара еснагь ирыцуп. Убри инамаданы, ԥхынгәымза 7 рзы, Гәдоуҭа ақалақь С.П. Дбар ихьӡ зху Аԥсны жәлар Рџьынџьтәылатә еибашьра Аҳәынҭқарратә музеи аҟны имҩаԥысит ԥхынгәытәи ажәылара агәалашәара иазкыз аиԥылара. Уи иалахәын амузеи анапхгареи,Аԥсны Аџьынџьтәылатәи аибашьра аветеранцәеи,ААУ ажурналистика аҟәша астудентцәеи аушьҭымҭацәеи.
Аусмҩаԥгатә аалыртит амузеи аиҳабы Гәыгәыца Џьыкырба, ԥхынгәытәи ажәылараан иҭахаз Аҧсны аҵеицәа зегьы хьыӡҳәала илгәалалыршәеит, дазааҭгылеит аибашьра аҭоурых. Уи ашьҭахь Влалислав Арӡынба изкны ашәа налыгӡеит Нора Чамагәуа.
Астудентцәа ари аусмҩаԥгатә рхы аладырхәит ажурналист, апрофессор Екатерина Бебиа лыбзоурала.Иазгәаҭатәуп, ацәыргақәҵаҿы Владислав Арӡынба идҳәалаз лара лархивтә ҭыхымҭақәагьы шыҟаз, инарҭбааны дазааҭгылеит дара рҭоурых, урҭ амузеи ҳамҭасгьы иалҭеит.
Астудентцәа рықәгылара темас иаман «Владислав сара сгәаҿы".
Аушьҭымҭацәа Милана Гәынԥҳа,Адель Царгәышԥҳа ракәзар, Москва амагистратура аҿы рҵара аӡбахә еиҭарҳәеит, даҽа тәылак аҿы ианыҟоугьы еснагь рҵасқәеи рыԥсуареи реиқәырхара ишазықәԥо иазааҭгылеит .
Ас еиԥш иҟоу аусмҩаԥгатәқәа идырҵабыргуеит даҽазныкгьы еиуеиԥшым абиԥарақәа Владислав Арӡынба игәалашәара наунагӡа ргәаҵаҿы ишаанхо.

Ферызԥҳа Лаура
Зақараиаԥҳа Хамида
афилологиатә факультет ажурналистика аҟәша 2-тәи акурс астудентцәа