Жәытә-натә ахшара рацәа зааӡоз аҭаацәарақәа ҳаҭыр рықәын. Ахәыҷы рацәа ахьыҟаз ашҭақәа рҿы еснагь агәырҕьабжь ҭыҩуан.

Ҳәарада, 30 шықәса раҧхьа ҳажәлар зҭагылаз, ҳаҧсадгьыл ахьчаҩцәа ирхыргаз, рхы-рыҧсы ақәҵаны рџьынџь шырхьчоз атәы еиҭаҳәашьа амам. Аха есааирагьы иуадаҩхо иалагеит аибашьра аӡбахә алацәажәара…

Ашьха ашьапаҿы ишьҭоу ақалақь Тҟәарчал, Ақалақь-Фырхаҵа ҳәа ахьӡ зыхҵоу, ахатәы ҧшӡара аханатә аахысгьы иаман. Иашоуп, аибашьра ашьҭахь даара иуадаҩхеит араҟа ахныҟәгара, ақалақь аҟны аусурақәа рҕьырак зегьы злашьақәгылаз арацәаҵхрала акәын. Ари аус анаанкылаха, хымҧада ақалақьгьы даараӡа ианыҧшит. Тҟәарчал уанналалак убла иаахымгыларц залшом, аус зымуа азауадқәа, ашахҭақәа.