Аиааирахь амҩа даараӡа иуадаҩын, аҧсҭбара дуқәа ацын, аха ҳҵеи ду, амилаҭ-хақәиҭратә қәҧара аҧхьагыла, ҳаамҭазтәи Аҧсуа ҳәынҭқарра ашьҭаркҩы, Аҧсны Раҧхьатәи Ахада Владислав Арӡынба игәҭакы анагӡараҿы, ахақәиҭра аагараҿы хьаҵра аазмырҧшуаз, Ҳаҧсадгьыл аҧышәара дуӡӡақәа ирылигеит. Злахьынҵа инапы ианызҵаз ижәлар днарылагыланы, аибашьраҿы Аиааира диргеит, иара убриалагьы ахьыҧшымра алиршеит.

Иахьа уажәраанӡа, ишырҳәо аиҧш, Анцәа иџьшьаны, ҳажәлар адунеи аӡеибафара иаламӡыкәан, еибга-изҩыда иаауеит.

Сентиабр 12 азы Очамчыра ақалақь аҟны гәырҕьарала иаартын ахәыҷбаҳча "Аӡыхь", – иаанацҳауеит Аҧсныпресс.

Уи аартра иалахәын Аҧыза-министр ихаҭыҧуаҩ, аекономика аминистр Кристина Озган, аҵареи абызшәатә политикеи рминистр Инал Габлиа, Очамчыра араион ахадара аиҳабы Беслан Бигәаа.

Ааигәа ихыркәшахеит Жәларбжьаратәи аҧшааратә еқспедициа "Марыхә. Ашьхаҳаракыратәи афронт – 2022", В.Г. Арӡынба ихьӡ зху ихьӡ зху Аибашьра Ахьӡ-Аҧша Аҳәынҭқарратә музеи Аҧсны Россотрудничество ахаҭарнакреи еиҿыркааз, – адырраҭара ануп Феисбук аҟны амузеи адаҟьаҿы.

Август 29 инаркны сентиабр 2 азынӡа аҧшаарақәа ирҿын аӡиасқәа Аӡҕареи, Адангеи, Аладатәи Марыхәи ахьеилалауа аҭыҧ аҟны, иагьырбеит уаанӡа џьаргьы иарбамыз, ҩажәаҩык инареиҳаны асоветтә еибашьцәа анышә иахьамадаз аҧсыжырҭа.

Аҟәа Ахадара аиҳабы Беслан Ешба адҵа ҟаиҵеит Сентиабр 23 азы "Ицқьоу ақалақь" ҳәа азеиҧшқалақьтә аекологиатә акциа амҩаҧгаразы, – иаанацҳауеит Ахадара асаит.

Ақалақь анапхгара атәылауаа зегьы ирыҧхьоит убри рхы аладырхәырц, рықалақь гәакьа ацқьара иазку азеиҧш ус аҟны рлагаламҭа ҟарҵарц.

Сентиабр 19 азы Аҧыза-министр ихаҭыҧуаҩ, аекономика аминистр Кристина Озган аилацәажәара мҩаҧылгеит аҳәынҭеилахәыра "Аҧсныргылара" анапхгаҩи акапиталтә ргылара Аусбарҭа ахаҭарнаки алархәны. Уаҟа ирылацәажәеит Аҟәа ақалақь аҟны идыргылараны иҟоу Ахәыҷтәы республикатә хәышәтәырҭа иамадоу азҵаарақәа.

Ари аобиект акырӡа аҵанакуеит, 2023-2025 шықәсқәа рзы Аҧсны асоциал-економикатә рҿиара иазку Аинвестициатә программа аусмҩаҧгатә дуқәа ируакуп.

Ҳазну аамҭазы апроект-сметатә қьаадқәа реиқәыршаҳаҭреи рышьақәырҕәҕәареи хдыркәшоит. Ахәыҷтәы медицинатә усҳәарҭа аргылара иалагоит 2023 шықәсазы.

Аҭынч ҧсҭазаара згәы азыҳәоз Аҧсны ажәларқәа зегьы рзыҳәан, аибашьра хлымӡаах ирыцҳара духаз шьаарҵәыратә хҭысхеит. Аибашьра аҭоурых ззымдыруа дыҟам, уи рацәак саламлакәа исҳәарц сҭахәуп, ақырҭуа-аҧсуа еибашьра ианалага еиҧхьхәыцрада, рықәра ҿыҵгас иҟамҵакәа рыҧсадгьыл ахьчаразы абџьар шҭыхны еибашьыҵәҟьаз зегьы хымҧада ифырхацәаны ишыҟоу.

Аҧсны Ахада Аслан Бжьаниа дылҧылеит Аҧсны Аҳәынҭқарраҿы Урыстәылатәи Афедерациа ахәаахәҭра ахаҭарнак Залина Кобесова.

Сентабр 1 азы змаҵуратә уалҧшьақәа рынагӡара иалагаз Залина Кобесова длыдныҳәалауа, аҳәынҭқарра Ахада агәыҕра шимоу иҳәеит лҵшәабзиала аусеицуразы.

"2008 шықәсазы "Аҧсни Аахыҵ-Уаҧстәылеи азхаҵаны, Урыстәыла ахы иаднаҵеит урҭ ршәарҭадареи рҧеиҧши рыхьчара". Абри атәы иҳәеит Урыстәыла адәныҟатәи аусқәа Рминистрра ИАР атәылақәа Аҧшьбатәи рдепартамент аиҳабы Денис Гончар РИА Новости иаиҭаз аинтервиу аҟны.

"Урыстәылатәи аган активла иацхраауеит ареспубликақәа рҳәынҭқарратә ргылареи рсоциал-економикатә рҿиареи, убрахь иналаҵаны изыхәҭоу аинвестициатә программақәа инарықәыршәаны, иарҕәҕәоит урҭ жәларбжьаратәи рпозициақәа. Иазгәаҭатәуп, абарҭ атәылақәа руааҧсыра реиҳараҩык иара убас Урыстәылатәи атәылауаҩра шрымоу, даҽакала иуҳәозар, Урыстәыла аганахьала Аҧсни Аахыҵ-Уаҧстәылеи мҽхакы ҭбаала рфинанстә цхыраара – ари ҳара ҳџьынџьуаа рыцхраарагьы ауп", – иазгәеиҭеит Гончар.

Сентиабр 16 азы Аҧсны Ахада Аслан Бжьаниа диҧылеит Урыстәылатәи Афедерациа Аиҳабыра Рхантәаҩы ихаҭыҧуаҩ Дмитри Чернышенко, – иаанацҳауеит Ахада ипресс-маҵзура.

Дмитри Чернышенко бзиала уаабеит ҳәа иаҳәауа, аҳәынҭқарра Ахада иазгәеиҭеит хаҭала реибадырра дшеигәырҕьауа.

Сентиабр 14. Аҧсныпресс. Аҧсны Ахада Аслан Бжьаниа дырҧылеит Жәлар Реизара адепутатцәа, - иаанацҳауеит Ахада Иусбарҭа асаит.

Аиҧылара иалахәын Ахада Ихаҭыҧуаҩ Бадра Гәынба, Аҧыза-министр Алеқсандр Анқәаб, Ахада Иусбарҭа анапхгаҩы Џьансыхә Нанба, ашәарҭадара Ахеилак амаӡаныҟәгаҩ Сергеи Шамба, Ахада Иусбарҭа анапхгаҩы ихаҭыҧуаҩ Зураб Қаџьаиа, адәныҟатәи аусқәа рминистр Инал Арӡынба.