С.П.Дбар ихьӡ зху Аԥсны Аџьынџьтәылатә еибашьра (1992-1993) Гәдоуҭатәи Аҳәынҭқарратә музеи аиҳабы, агазеҭ «Аԥсны» аредакциа амаҵ зуа, Аԥсны акультура зҽаԥсазтәыз аусзуҩы, Гугуца Џьыкрба 65ш. лхыҵит.
Гугуца Шьаликәа-иԥҳа Џьыкырба диит Гәдоуҭа араион Мгәыӡырхәа ақыҭан 1961ш. ииуль 5 рзы. Аԥснытәи аҳәынҭқарратә унивеситет афилологиатә факультет далгеит. Агәырҵҟәыл бзиа змаз аԥҳәызба аханатә лаԥшьгарақәа рыла деицгәарҭахьан. 1984 ш. инаркны еиуеиԥшым ашықәсқәа рзы аус лухьеит Аԥсны аҵара аминистрра анапаҵаҟа иҟаз аусҳәарҭаҿы, ашәҟәҭыжьырҭа «Алашара» аҟны редакторс, Гәдоуҭа араион Акультура аҩны асахьаркыратә напхгаҩыс, Гәдоуҭа араион Ахадара акультура аҟәша аиҳабыс.
Г.Џьыкырба данқәыԥшыз инаркны ҳажәлар рмилаҭ-хақәиҭратә қәԥара иалагылаз леиҳабацәа ирҿылҵааз Аԥсадгьыл абзиабара, лыжәлар рԥеиԥш азааԥсара, ахеиқәырхара уасхырс измаз зегьы дрызҿлымҳан. Урҭ атрадициақәа ирылааӡоу даҽакала ихы изымҩаԥгарымызт. Амилаҭтә интересқәа рыхьчара иазкыз аусмҩаԥгатәқәа еснагь дрылахәын, ибжьалыжьуамызт, аԥҳәызба лажәа ахьаҭахыз аизарақәа рҟны дықәгылон, лгәаанагара аҳәашьа дақәшәон
2016 ш. акәзар, Г. Џьыкырба Аԥсадгьыл ахь ахынҳәразы Аԥсны аҳәынҭқарратә еилакы ахантәаҩы ихаҭыԥуаҩс дҟарҵоит. Аамҭа кьаҿк иалагӡаны аҳәаанырцәтәи ҳџьынџьуааи рҭоурыхтә ԥсадгьыли реимадарақәа рырҿиаразы, зыԥсадгьыл ахь ихынҳәхьаз аус рыдулараҿы ицәырҵуаз азҵаатәқәа рхаҵгылараҿы илыллыршаз маҷӡам.
Иахьа напхгара зылҭо амузеи аҟны Г.Џьыкырба уаанӡагьы шықәсырацәала аус луан, афондқәа рхылаԥшҩыс дыҟан. Аханатә амузеи –ҳәырԥсарра «Абазгиа» ахьӡын. Иахьатәи амузеи аартын 1994 шықәсазы. Усҟан — Аԥсны Раԥхьатәи Ахада В.Г. Арӡынба иааирԥшыз адгылара абзоурала афонд ахарҭәаара напы аркын.
Лара илылшеит «Аԥсуа шәҩыуаа», «Кьаразаа», иара убас Аџьынџьтәылатә еибашра Дуӡӡа (1941-1945) иадҳәалаз аҭоурыхтә хҭысқәа ирымадоу аматериалқәа маҷымкәа реизгара. Абарҭқәа роуп Г. Џьыкырба ажурналистикахь, дхьазырԥшыз. Аԥсны Аџьынџьтәылатә еибашьраан (1992-1993) Аԥсадгьыл зхы ақәызҵаз афырхацәа ирыдҳәалоу афотосахьақәеи рнысмҩа аазырԥшуа аматериалқәеи реизгараҿы ллагала дууп. Амузеи уаныныҩнало иубарҭоуп шәҩыла Аԥсадгьыл ахьчаҩцәа рфотосахьақәа, убарҭ роуп Г. Џьыкырба иҭлыжьхьоу лышәҟәқәа хәба зызкугьы.
Еиҳарак аҵыхәтәантәи ашықәсқәа рзы лассы-лассы лстатиақәа убоит агазеҭ «Аԥсны» адаҟьақәа рҟны. Аԥсадгьыл ахьчаҩцәа ирзылкуа лкьыԥхьымҭақәа акырӡа рыҵаркуеит Аԥсны Аџьынџьтәылатә еибашьра аҭоурых инхарҭәааны аҭҵаараҿы, убри аҟнытә еснагь актуалра рымоуп.
Г. Џьыкырба Аԥсадгьыл амаҵ аураҿы лааԥсаразы иланашьоуп аҳәынҭқарратә ҳамҭа «Ахьӡ-Аԥша» аорден ахԥатәи аҩаӡара.
Агазеҭ «Аԥсны» анапхгареи аредакциа аусзуцәеи гәык-ԥсыкала илыдырныҳәалоит 65ш. лхыҵра. Агәабзиара ацны, арҿиара агәацԥыҳәара лыманы шьардаамҭа луаажәлар дрылагылазааит.
