Аҳәаанырцәтәи аҧсуаа иналукааша рхаҭарнакцәа ируаӡәку аҭҵааҩы, апоет, ауаажәларратә усзуҩы, «Ахьӡ-Аҧша» аорден актәи аҩаӡара занашьаз Омар Бирам-иҧа Беигәаа диижьҭеи 115 шықәса аҵра азгәаҭара аиҿкааразы иаҧҵаз аҳәынҭқарратә комиссиа анапхгарала аусмҩаҧгатәқәа азгәаҭан даниз амш – ииуль 1 азы.
Ашьыбжьышьҭахь сасгьы-ҧшәымагьы рҽеибаркны Аҧсадгьыл ахь архынҳәразы Аҧсны аҳәынҭқарратә еилакы ахьыҟоу ашҟа имҩахыҵит. Ашҭа ҭырҭәааны реизара азкын О. Беигәаа ибаҟа аартра.
Уахь инеит аиубилеитә усмҩаҧгатәқәа реиҿкааразы аҳәынҭқарратә комиссиеи Ҭырқәтәылатәи аҧсуа культуратә хеидкылақәа Рфедерациеи рхаҭарнакцәа, О. Беигәаа иусумҭақәа реизгаҩ, рыҭҵааҩы М. Папаҧҳа, аҧсуа интеллигенциа, ҳџьынџьуаа, Аҧснытәи Абеигәаақәа риешьара.О. Беигәаа ихьӡ анаунагӡатәра иадҳәалаз аусмҩаҧгатә аалыртит Аҧсадгьыл ахь архынҳәразы Аҧсны аҳәынҭқарратә еилакы ахантәаҩы ихаҭыҧуаҩ Гә. Џьыкырба. Дагьазааҭгылеит Ҭырқәтәылатәи аҧсуа диаспореи урҭ рҭоурыхтә ҧсадгьыли реимадара аусқәа рҟны О. Беигәаа иааникылоз аҭыҧ. Анаҩс О. Беигәаа ибаҟа иахаршәыз ацаха шкәакәа ахырхит Аҳәынҭеилакы ахантәаҩы В. Ҳаразиеи М. Папа-ҧҳаи.
Абаҟа аартра иазкыз аусмҩаҧгатә аҟны иқәгылаз, О. Беигәаа иҭынха зегьы аизгареи, аиқәырхареи, аҭҵаареи, акьыҧхьреи, аларҵәареи аҭакҧхықәра ду шацу ҳасаб азуны, ҳаҧхьаҟагьы инагӡатәу аусқәа ирылацәажәеит.
О. Беигәаа ибаҟа аартрала, зегьы лабҿаба иаабоит аҳәаанырцәтәи аҧсуааи рҭоурыхтә ҧсадгьыли еиҟәыҭхашьа шрымам.
Абарҭқәа ракәын абаҟа аартраан иқәгылаз Р. Гәажәба, М. Папаҧҳа уҳәа рықәгылара ҵакыс иамаз. Апоет Б. Барцыц даҧхьеит О. Беигәаа изкны илҩыз ажәеинраалақәа рцикл аҟнытә ацыҧҵәаха, иара убас ажәеинраала даҧхьеит зыҧсадгьыл ахь ихынҳәхьоу М. Аҭрышба иҧҳа - ҧшьышықәса зхыҵуа И. Аҭрыш-ҧҳа. Аешьара Абеигәаақәа зегьы рыхьӡала аусмҩаҧгатә еиҿызкааз, иахаҵгылаз зегьы иҭабуп ҳәа реиҳәеит Москва инхо, аус зуа аҵарауаҩ, афилологиатә ҭҵаарадыррақәа рдоктор Виач. Бигәаа. Абасала ихыркәшан абаҟа аартра иазкыз аусмҩаҧгатә.
Аҧсадгьыл ахь архынҳәразы Аҳәынҭеилакы ашҭаҿы еиҿкаан Омар Беигәаа иҧсҭазаара адаҟьақәа аазырҧшуа афотосахьақәа рцәыргақәҵа. Аусмҩаҧгатә иалахәыз ирызшан Аҳәынҭеилакы иҭнажьыз ажурнал «Аҧсадгьыл агәеисыбжь».
* * *
Омар Беигәаа диижьҭеи 115 шықәса аҵра аҳаҭыр азы ииуль 1 азы иазҧхьагәаҭаз аиубилеитә усмҩаҧгатәқәа ирыцҵан С.И. Ҷанба ихьӡ зху Аҧсуа ҳәынҭқарратә драматә театр аҟны.
Аиубилеи ахьазгәарҭоз Аҧсуа театр ахь инеит Аҧсны анапхгара, Аҧсны Жәлар Реизара адепутатцәа, аҵаратәи, аҭҵаарадырратәи, акультуратәи усҳәарҭақәа рнапхгаҩцәа, аҧсуа интеллигенциа, акультуреи аҟазареи русзуҩцәа, зыҧсадгьыл ахь ихынҳәхьоу ҳџьынџьуаа рхаҭарнакцәа, Беигәаа риешьара, урҭ руацәа-рҭынхацәа.
Омар Беигәаа диижьҭеи 115 шықәса аҵра аиубилеи азгәаҭара хацыркын Аҧснытәи аҳәынҭқарратә хортә капелла инанагӡаз Аҧсны Аҳәынҭқарра Агимн ала. Анаҩс иқәгылеит Аҧсадгьыл ахь архынҳәразы Аҧснытәи аҳәынҭеилакы ахантәаҩы Вадим Ҳаразиа, Ҭырқәтәылатәи Аҧсуа Федерациа ахантәаҩы Аҳмеҭ Ҳапаҭ, Аҧсны Ахада иабжьгаҩ Владимир Занҭариа.
Аҧснытәи зҽаҧсазтәыз жәлар рашәаҳәареи рыкәашареи рансамбль инанагӡеит аҧсуа ашәа «Оураашьеи» жәлар рыкәашареи.
Аҵыхәтәан идырбан аҵарауаҩ ҿа, О. Беигәаа ихьӡ зху аҳәаанырцәтәи аҧсуаа рҭоурых амузеи аиҳабы Џьамбул Инџьгиа ииазирхиаз адокументтә фильм «Ауыбла игәҭыха».
В. Баалоу (2016)
