Ианвар 19 азы Аԥсны Аминистрцәа Реилазаара ишьақәнарӷәӷәеит 2023 шықәсазы Аԥсны агәабзиарахьчара Аминистрра хықәкылатәи апрограмма «Анҭыҵи Аԥсны иахьаҵанакуеи атәылауаа рыхәшәтәразы». Абри апрограмма ԥарала еиқәыр­шәахоит ареспубликатә биуџьет амалқәа рыла. Ҳазну ашықәс азы анҭыҵ Аԥсны атәылауаа рыхәшәтәразы иоушьҭхоит 90 миллион мааҭ.

Аԥсныпресс. 2022 шықәсазтәи аусура аихшьалақәа ирызкын аҩаша, ианвар 24 азы Аԥсны Ахада Аслан Бжьаниа ихантәаҩрала имҩаԥысыз инарҭбааз аилацәажәара.

Уи иалахәын Ахада ихаҭыԥуаҩ, ашәарҭадара Ахеилак амаӡаныҟәгаҩ, Ахада Иусбарҭа анапхгаҩы, Аиҳабыра иалоу, Жәлар Реизара адепутатцәа, аҳәынҭеилахәырақәеи абиуџьет анҭыҵтәи афондқәеи рнапхгаҩцәа, ақалақьқәеи араионқәеи рхадарақәа реиҳабацәа.

Ианвар 19 азы ақьырсианцәа ныҳәан иазгәарҭоит Ҳазшаз иӡаахреи мамзаргь Анцәа ицәырҵреи.

Абри амш аҽны Аҟәатәи Акафедралтә уахәамаҿы Аӡаахра иазкыз аныҳәара мҩа­ԥигеит Аԥсны Аиашахаҵаратә Уахәама аиҳабы аиереи Виссариан (Аԥлиаа).

Очамчыра араион анапхгара иҟарҵаз афинанстә цхыраара иабзоураны Ҷлоу ақыҭа ахадара ахыбра аҧсахра иаҿуп. Ажәа ахы умҳәакәа аҵыхәа узҳәом. Ари зыӡбахә ҳамоу ахыбра ргылан иҳаҩсыз ашәышықәса ахынҩажәатәи ашықәсқәа рзыҳәан. Уи аахижьҭеи акыр шықәса цеит,  ахыбра акәзар, ахар­хәаразы иазыҧҵәаз аҽҳәара иахысижьҭеи акрааҵуеит.

Аԥсуа спортсмен Руслан Ҳашба Дон ихықәгылоу Ростов аҟны агрепплинг азы аицлабраҿы аиааира игеит, – иаанацҳауеит аҿари аспорти русқәа рзы Аҳәынҭеилакы асаит.

Агрепплинг азы аицлабра рхы аладырхәит Урыстәыла еиуеиԥшым арегионқәеи ИАР атәылақәеи рҟнытә аспортс­менцәа 300-ҩык раҟара.

Ахәаахәҭра-ааглыхратә палатаҿы имҩаԥысит уи аиҳабы Тамила Мырцхәлааи Аԥсны иҟоу Урыстәыла ахәаахәҭратә хаҭарнак Залина Кобесоваи реиԥылара. Иалацәажәеит ҩ-ганктәи русеицура, иара убас анападкылаҩцәа адгылара рыҭара.

«Акыр шықәса раахыс апалата ацхраауеит Аԥсны Урыстәылатәи анападкыларатә еилазаара ахаҭар­накцәа ахәаахәҭра-економи­катә уҳәа аусқәа рзеиҿкаара. Абри инавар­гыланы Урыстәылатәи Афедерациаҿы ахәаахәҭра-економикатә еизыҟа­за­ашьақәа рырҭбаара ҳадгылоит, ҳагьазхиоуп Аԥсныҟа атауарқәеи амаҵзурақәеи рекспорт», – иаҵылшьит Тамила Мырцхәлаа.

Аԥсны иҭыжьуп ахәыҷқәа рзы Аконституциа аекземплиарқәа 2000. Уаҟа аҳәынҭқарра азакәан хада ҩуп ахәыҷқәа  еилыркаауа бызшәа мариала, насгьы иацуп асахьа ԥшӡақәа, – иаанацҳауеит аҵара Аминистрра.

Ахәыҷқәа рзы Аконституциа аԥҵара аидеиа лтәуп Аԥсны Аконституциатә усӡбарҭа ахан­тәаҩы Лиудмила Хоџьашвили.

Адунеизегьтәи аԥсуа-абаза Конргесс аизара ду аҟны Екатерина Бебиа лықәгылара.

Аԥсны адәныҟатәи аусқәа Рминистрра Амедиацентр аҟны имҩаԥысит Аԥсны аҿар Рассоциациа астол гьежь. Уи анапхгаҩы Саид Ҟәланба дрылацәажәеит инагӡоу арҿиаратә, агәыҳалал­ратә, аспорттә проектқәа, даза­аҭгылеит аҿар рполитика знапы алаку амчра аусбарҭақәа рҟны аусеицура шыԥсыҽу, иҳәеит 2023 шықәсазы ирымоу апланқәа ртәы.

Аԥсны акультура Аминистрра гәалсра дула адырра ҟанаҵоит 84 шықәса дшырҭагылаз иԥсҭазаара дшалҵыз азы Аԥсны жәлар рартист Тото Аџьапуа.