Аԥсны Аҳәынҭқарра ажурналистцәа Реидгыла иара убас иргәаланаршәоит ҳазну ашықәс азы аконкурс шеицымҩаԥырго Аԥсны Аиааиреи Ахьыԥшымреи Рымш 30 шықәса ахыҵра аныҳәа азгәаҭаразы Аҳәынҭқарратә комиссиеи дареи. Абри аҟнытә, аконкурс аԥхьахәқәа рфонд иазҳаит ҩынтә рыла, иагьартәоит 300 нызқь мааҭ.

Ишәыдаагалоит аконкурс Аԥҟарақәа хазы игоу рпунктқәа.

Аконкурс ахь ирыдыркылоит 2022 шықәса декабр 1 инаркны 2023 шықәса октиабр 30 азынӡа аԥсышәала, урысшәала иҩу, акьыԥхьтә, Интернет-ҭыжьымҭақәа рҟны икьыԥхьу, ателехәаԥшреи арадиои рефир ала идәықәҵоу, иара убас аҳәаанырцәтәи атәылақәа ринформациа массатә хархәагақәа ирну астатиақәа, аочеркқәа, аинтервиуқәа, арепортажқәа, адокументтә фильмқәа.

Ажурналистцәа рҩымҭақәа рзыркыр ауеит:

– Аԥсуа ар хазы игоу аибашьцәа;

– аруаа рыҟәшақәеи архәҭақәа рыхкқәеи;

– хатәгәаԥхарала аибашьцәа, ахатәгәаԥхаратә хеидкылара;

– ақалақьқәеи ақыҭақәеи рхы рақәиҭтәразы ажәыларақәа;

– аибашьра аан атәылахьчара Аҳәынҭеилакы амаҵзурақәа русура;

– агуманитартә усқәа;

– амедицина-санитартә маҵзурақәа, атыл уҳәа русура;

– аинформациатә еибашьра, аиҿцәажәарақәа.

Аконкурс рхы аладырхәыр рылшоит авторцәа, мамзар гәыԥҩык авторцәа, иара убас хазы игоу аредакциақәа.

Ателе-радиоматериалқәа аконкурс ахь инарышьҭуеит CD,DVD-дискқәа, мамзаргьы афлеш-ҭаҩгақәа рыла.

Аконкурс аихшьалақәа рыҟаҵаразы Аԥсны ажурналистцәа Реидгыла еиҿнакаауеит ажиури, насгьы аиҵбыраӡатәи ажурналистә еиҿкаарақәа рмаӡаныҟәгаҩцәа рахь аҳәара ҟарҵоит ажурналистцәа Реидгыла ашҟа иаарышьҭырц убри ажиури алахәылацәа ркандидатурақәа, аха амассатә информациатә хархәагақәа русзуҩцәа рхыԥхьаӡарахьтә акәымкәа.

Амассатә информациатә хархәагақәа рредакциақәа иалырхыз, аиҵбыраӡатәи ажурналисттә еиҿкаарақәа рнапхгаҩцәа, рмаӡаныҟәгаҩцәа рнапы зҵаҩу, мамзаргьы рхала инаргаз аматериалқәа аконкурс ахь ирыдыркылоит 2023 шықәса октиабр 30 азынӡа абри аҭыӡҭыԥ ала: ақ. Аҟәа, Ажәанба имҩа 9, ауада 105. Аҭел: 226-20-12; +7940 997-43-46.

Аԥсны Аҳәынҭқарра ажурналистцәа Реидгыла