Виачеслав Ешба диит март 13, 1949 ш. рзы Гәдоуҭа араион Дәрыԥшь ақыҭан.

1970 ш. рзы далгеит абжьаратә ҵара ашьҭахь идырра аизырҳара иҽахьазикыз Егоревсктәи аԥырра-техникатә ҵараиурҭа. 1973 ш. рзы ихиркәшеит Кременчугтәи аԥырратә ҵараиурҭа. 1983 ш. рзы қәҿиарала инаигӡеит «1 ак­ласс змоу аԥырҩы, аҳаиртә транспорт амаҵзура анџьныр» изанааҭ ала ауаҩытәыҩсатә авиациа Ленинградтәи академиаҟны идыррарҳара.

Анаҩс, аус иуан ауаа ныҟәызгоз аҳаирпланқәа рырԥырҩыс; аҳаирпланқәа АН-2, ТУ-134 рырԥырҩцәа Аҟәатәи ргәыԥ аԥызас. Аԥсны жәлар Рџьынџьтәылатә еибашьра аԥхьатәи амшқәа инадыркны хеигӡарак ҟамҵа аԥсадгьыл ахьчара дазгылан, изныкымкәа аԥсра абла хьшәашәақәа дшы­рҭаԥшхьазгьы. Иман еиуеиԥшым арратә дҵақәа рынагӡаразы шәкыла асааҭ рацәа зымҽхазкуа 80 инареиҳаны ашьҭԥраарақәа.

1993-2003 ш.ш. раан Аԥсны Арра-Ҳаиртә Мчқәа ркомандаҟаҵаҩыс дыҟан; 2003-2004 ш.ш. – Аԥсны Аҳәынҭқарра Атәылахьчара аминистрс; 2009 ш. раахыс В.Г. Арӡынба ихьӡ зху Аҟәатәи жәларбжьаратәи аҳаирбаӷәаза аиҳабыс аус иуан.

Авиациеи акосмонавтикеи жәларбжьаратәи ракадемиа ҳаҭыр зқәу алахәылас дыҟан. «Авиациатә енциклопедиа Ахаҿқәа» зыхьӡу еицырдыруа аҭыжьымҭа ззанааҭтә ҟазара ҳараку ҳәа зыхьӡ еиднакылаз дыруаӡәкын.

Ахӡыргара зцәаҩамыз Виачеслав Ешба ҳаҧсадгьыл аҟазаареи аҟамзаареи ианрыбжьагыла, «Шәнеибац, аҧсуаа рыҷкәынцәа!» ҳәа Владислав Арӡынба ибжьы анга аамҭазы, зхыҧхьаӡара зынӡа имаҷӡаз занааҭла аррамаҵзура иазҟазаз хьаҳәхьачарак ҟамҵакәа днарывагыланы аҳаиртә хыхьчара иазкыз аусмҩаҧгатәқәа реиҿкаара нап азыркыз драҧхьагылан, ибзоуроугьы рацәаӡоуп.

Иҧсҭазаара аҵыхәтәантәи амшқәа рҟынӡагьы ҳтәыла аҳаиртә шәарҭадара ахылаҧшреи арҕәҕәареи, уи аус иацызҵаша, иҧацәа руаӡәк дназлоу аҿар радыҧхьалареи урҭ рымҩақәҵареи, жәашықәса инареиҳаны напхгара ззиуаз ҳҳәынҭқарразы астратегиатә ҵак ду змоу аҳаиртә баҕәаза аиҿкаареи, уи аҧеиҧши ихы-иҧсы зегьы азкын.

Ҳџьынџьхеиқәырхаратә еибашьра иахаану, иахьа еиҵагыло абиҧарақәа ирхаҭарнаку дарбанызаалак изы акырӡа аҵанакуеит Сулҭан Сосналиев, Сергеи Дбар, Владимир Аршба, Гиви Агрба, Виачеслав Ешба уҳәа реиҧш иҟаз Афырхацәа аамҭак ҳахьрыцаныз. Иҟамызҭгьы урҭ рҩызцәа ахацәа, иҟаломызт Аиааира, Аҭынчра, Ахьыҧшымра. Хьӡи-ҧшеи рыгымзааитҲаҧсадгьыл зыхьчаз!

Уҧсаҭа лашахааит Виачеслав Аҳмеҭ-иҧа. Ухьӡ кашәара ақәым.