Аԥсны ашахмат Афедерациа апрезидент, афестиваль амҩаԥгаҩ Константин Ҭыжәба агазеҭ «Аԥсны» аредакциахь излааицҳаз ала, афестиваль инҭагӡаны имҩаԥысит ашахматтә хәмаррақәа ԥшьба: адуцәа, 12, 10, 8 шықәса рҟынӡа зхыҵуа ахәыҷқәа рыбжьара аицлабрақәа хԥа.

Афестиваль рхы аладырхәт Аԥсны иахьабалак арегионқәа рҟнытә ақәрақәа зегьы ирыҵаркуа ашахматасыҩцәа 150-ҩык, иара убас Урыстәылантәи асасцәа.

Адуцәа реицлабраҿы аиааира игеит ФИДЕ азҟаза Роберт Сафин (Набережные Челны), аҩбатәи аҭыԥ ааникылеит ФИДЕ азҟаза Игор Уриупин (Тамбов), ахԥатәи –Тристан Кәарацхьелиа (Аҟәа).

Иалкаахеит еиуеиԥшым аноминациақәа рҟны аиааира згази аԥхьахәқәа заузи: амилаҭтә реитинг зманы иалахәыз рыҩнуҵҟа –Богдан Турков (Аҟәа), Сергеи Миносиан (Очамчыра), Саиаҭ Сабекиа (Аҟәа); аветеранцәа рыбжьара – Талгат Шаинуров (Челиабинск), Валери Ахмадеев (Набережные Челны), Константин Ҭыжәба (Аҟәа); арԥарцәа рыҩнуҵҟа – Михаил Зелианин (Москва), Нестор Багаҭелиа, Аскар Аџьынџьал (Аҟәа); аӡӷабцәа рыбжьара – Сарида Ла­кәатаа (Аҟәа), Мариа Иванова (Сыктывкар), Ксениа Листкова (Ханты-Мансииск); аҳәса рҩнуҵҟа –Богдана Шестакова (Перм), Светлана Шикута (Ханты-Мансииск).

8 шықәса рҟынӡа зхыҵуа аҷкәынцәеи аӡӷабцәеи реицлабраҿы актәи аҭыԥқәа ааныркылеит Дмитри Коробеиников (Новыи Уренгои), Анна Ԥалаванӡиа (Аҟәа), аҩбатәи – Вадим Басиев (Санкт-Петербург), Дана Ҭарба (Аҟәа), ахԥатәи – Александр Акчурин (Химки), Софиа Абыдба (Аҟәа).

10 шықәса рҟынӡа зхыҵуа аҷкәынцәеи аҭыԥҳацәеи рыбжьара аԥхьахәтә ҭыԥқәа абас еизшахеит: актәи аҭыԥқәа – Армен Топчиан (Гәылрыԥшь), Ксениа Листкова (Ханты-Мансииск): аҩбатәи аҭыԥқәа – Дамир Ҳа­луашь (Гәдоуҭа), Василиса Михаилова (Ҭа­ҭарсҭан); ахԥатәи аҭыԥқәа – Тимофеи Иванов (Сыктывкар), Евридика Михаилиди (Аҟәа).

12 шықәса рҟынӡа зхыҵуа аҷкәынцәеи аӡӷабцәеи рбжьара актәи аҭыԥқәа ааныркылеит – Нестор Багаҭелиа (Аҟәа), Полина Марченко (Аҟәа), аҩбатәи аҭыԥқәа – Дамир Ҳалуашь (Гәдоуҭа), Вероника Шатилова (Дмитров), ахԥатәи аҭыԥқәа – Армен Топчиан (Гәылрыԥшь)́, Маргарита Шатилова (Дмитров).

Аԥхьахәқәа зауз зегьы иранашьан ахраҿақәа, амедалқәа, аграмотақәа, аԥаратә ҳамҭақәа.

Афестиваль еиҿкаан аҿари аспорти русқәа рзы Аԥсны Аҳәынҭеилакы иҟанаҵаз афинанстә цхыраарала.

Аԥсны еицырдыруа анападкылаҩцәа Леван Ҭыжәбеи Акоп Ирадиани аԥхьахә ҷыдақәа аԥырҵеит абаҩхатәра злоу ахәыҷқәа рзы. Аԥаратә ҳамҭақәа роуит Тристан Кәарацхьелиа, Нестор Багаҭелиа, Сарида Лакәатаа, Богдан Турков, Армен Топчиан, Дмитри Коробеиников.