Туна Тунеи – Ҭырқәтәылантәи музыкант қәыԥшуп, Пицундатәи Жәларбжьаратәи амузыкатә фестиваль далахәын, аха иара Аԥсны дадҳәалоуп шьаладала. Ианду даԥсыуоуп. Уи лабдуцәа амҳаџьырра аан рыԥсадгьыл аанырмыжьыр ада ԥсыхәа рмоуит.

Асоциалтә информациа Амаҵзура «Apsny» Туна иахь аҳәара ҟанаҵеит амузыка иԥсҭазаара адиҳәаларц аниӡбаз, афестиваль аӡбахә шиаҳаз, иара убас игәаанагарақәа, игәахәарақәа ртәы далацәажәарц.

«Сара сиит амузыкантцәа ахьыҟамыз аҭаацәараҿы. Аха ҳаҩны иҩнагылан апианино – сан лхәыҷра аамҭақәа инадыркны. Абас, уи аинструмент саҿцаауа сала­геит.

Сара сҩыза, сгәакьа Барас Кәыџба иҽсымеидеит, абри апроект бзиа аӡбахә сзеиҭеиҳәеит. Даараӡа сеигәырӷьоит Аԥсны збартә еиԥш алшара ахьсоуз. Издырит амузыкантцәа бзиақәа. Ҳаҭыр дуны исыԥхьаӡоит сценак аҟны урҭ рыцықәгылара.

Абас еиԥш иҟоу апроектқәеи афестивальқәеи – амузыкантцәа қәыԥшцәа рышьҭыҵраҿы даараӡа лшара бзиоуп. Урҭ иалдыршоит асцена ҿыцқәа рҟны ақәгылара мацара акәымкәа, урҭ рышьҭахь аҭыԥ ԥшӡарақәагьы рҭаара», – иҳәеит амузыкант қәыԥш.

Ҳазну ашықәс азы еизгоу амалқәа зегьы дәықәҵахоит агәыҳалалрахь. Амалқәа реиҳарак рхы иадырхәоит Пицундатәи ауахәама Аҳәынҭқарратә концерттә зал азы ароиаль ҿыц аахәаразы.