«2024 шықәсазы атауарқәеи, аусурақәеи, амаҵзурақәеи еизаку рамҽхак шьақәыргылоуп 149,7 миллиард мааҭ рыла, убрахь иналаҵаны ақыҭанхамҩаҿы – 11 миллиард мааҭ. Адәныкаекономикатә усура азԥхьагәҭоуп 46,3 миллиард мааҭ рыла. 2022 шықәсазтәи аҟаҵарбақәа ирыдкыланы аизҳара иартәоит 34%, 2023 шықәсазтәи аплантә ҟаҵарбақәа ирыдкыланы акәзар – 18%», –лҳәеит Озган.

Аминистрцәа Реилазаара адҵала Ранета Биџьиева альготақәа лыҭоуп аҳәынҭқарратә нхарҭатә фонд аҟнытә хатәык аҳасабала илырҭауа анхарҭа ахәԥса ахшәааразы.

Ранета Биџьиева – Лугансктәи Жәлартә Республика (Урыстәылатәи Афедерациа) ицо аибашьраҿы иҭахаз арепатриант Ҟазбек Биџьиев иԥшәма лоуп.

Иара убас, анхарҭа ахәԥса ашәаразы альготақәа иҭоуп Таифун Кәаӡбагьы.

Донбасс арратә операциа ҷыда аан иҭахаз хатәгәаԥхарала аибашьцәа Едуард Шьакаиеи Олег Бебиеи рҭаацәарақәа аамҭакала ирзыршәоит 1 миллионк мааҭ асоциалтә цхыраагӡақәа.

Изыхәҭоу адҵақәа рыдыркылеит Аминистрцәа Реилазаара аилатәараҿы.

Аамҭакалатәи ацхыраагӡа рзашәоит асоциалтә еиқәыршәареи адемографиатә политикеи Рминистрра. Аминистрцәа Реилазаара аиҭакрақәа аланагалеит «Аԥсны Аҳәынҭқарра аҩныҵҟатәи аусқәа русбарҭақәа Рдисциплинартә ԥҟаԥҵа ашьақәырӷәӷәаразы» ақәҵара.

Аԥсны Аминистрцәа Реилазаара «Ачеи ачашылеи рыхәқәа аҳәынҭқарраҿы рырманшәаларазы» ақәҵара ҿыц рыдыркылеит.

Шьҭарнахыс иреиҳаӡоу асорт иеиуоу 1 килограммк ача 50 мааҭ иаԥсахоит, 0,6 килограмм – 30 мааҭ иреиҳамқәа; аҩбатәи асорт еиуоу ачашыла иалху 1 килограммк ача – 47 мааҭ, 0,6 килограмм –28 мааҭ.

Иара убас, Аминистрцәа Реила­заараҿы ирыхәаԥшын еиуеиԥшым азҵаарақәа.