Аҽны аволонтиор Амина Адлеиба асоциалтә ҳақәа рҟны алаҳәара ҟалҵеит: «Уаҵәы асааҭ 10:00 рзы Аҟәантәи ицоит аволонтиорцәа Гагреи Лӡааи аҧхасҭа знаҭаз ауаа рыцхрааразы, ахалархәра агәаҳәара змоу аҭелла адырра ҟашәҵа» ҳәа. Хымш рышьҭахь аиҿкаарақәа «Ҳара Ҳпицундеи», аҿари аспорти русқәа рзы аилаки рыцхыраарала еиқәыршәан 25-ҩык аволонтиорцәеи, урҭ згаша амашьынақәа ҩбеи. Гагра ианнеи рҽыршеит гәыҧ-гәыҧла, Лӡаа, Ҧсахара, иара убасгьы ақалақь аҩныҵҟа.
Идрыцқьон аҩнқәа, абаҳчақәа. Рымч ахьынӡақәхоз иқәыргеит аҧшеи аӡи ихыржәаз аҵлақәа, ишаны ирырҭеит аӡыцқьеи, ачеи, ахәшәқәеи, асабицәа рхәы рызнаргеит.
Аҧсуаа жәытәнатә аахыс иаҳҟазшьоуп агәыҳалалреи, арыцҳашьареи, агәыразреи, аидгылареи, ҳаамҭазы урҭ шмыӡхьоу арҵабыргит ари ахҭыс. Арҭ 25-ҩык «афырхацәа» раамҭа иамеигӡакәаны, рхатә усқәа ирзымхәыцӡакәа арыцҳара иақәшәаз ирыцхраарц инеит. Алаҳәара ақәҿызҭыз рхыҧхьаӡара акыр еиҳан, аха жәаа зхымҵыцыз макьана ари аҩыза аус уадаҩ иаладмырхәит аӡә ида, жәеиза шықәса зхыҵуаз Агрба Леонид агәаҳәара ду ахьааирҧшыз азы мап ицәкра рылымшеит.
Абарҭ иреиҧшу гәыкала ирзырҳәоит «Аҧсынреи аҧсуареи шәагымзааит» ҳәа.
Жасмин Гьерзмаа,
афилологиатә факультет
ажурналистика аҟәша
1-тәи акурс астудент
