Рамин Габлаиа иҟаиҵаз адыррақәа рыла, ажьырныҳәамза 1 инаркны ԥхынгәымза 1 аҟынӡа Аҳәынҭқарратә миграциатә маҵзура иаднакылеит авизақәа риуразы 4 061 рҟынӡа арзаҳал; амиграциатә шәҟәҭагалара иахысит 2 430-ҩык аҳәаанырцәтәи атәылауаа; аусуразы азин аиуреи апатентқәа рыҭареи рзы ирыдыркылеит 3 717 рзаҳал. Ҳазҭоу ашықәс актәи азбжазы Аҳәынҭқарратә миграциатә маҵзура аусуратә визақәа рыҭаразы иашәаз аҳәынҭқарратә баџь азеиԥш еицҵалыҵ 17 миллиони 487 нызықь мааҭи иреиҳауп. Аҳәаанырцәтәи атәылауаа аусуразы азин аиуразы аҳәынҭқарратә баџь аҳасабала иҟарҵаз ашәатәқәа рзеиԥш еицҵалыҵ 15 миллиони 837 нызқь мааҭи ирыцуп, апатентқәа раиуразы иршәаз ашәатәқәа – 4 миллионки 389 нызықь мааҭи иреиҳауп. Аҳәынҭқарратә миграциатә маҵзура иарбоу аамҭа иалагӡаны административтә зинеилагарақәа рзы 55 материал аӡбарҭатә усбарҭақәа рахь идәықәнаҵеит. Амаҵзура иҟанаҵо адыррақәа рыла, ареспубликаҿы аус руеит аҳәаанырцәтәи аҳәынҭқаррақәа рҟынтәи атәылауаа. Аиԥылараҿы иара убас Аҳәынҭқарратә миграциатә маҵзура аусура иадҳәалоу егьырҭ азҵаарақәагьы ирылацәажәеит.

Атәыла Аԥыза-министр Алеқсандр Анқәаб амаҵзура анапхгаҩы, аусуразы ареспубликаҟа иаауа аҳәаанырцәтәи атәылауаа рышәҟәҭагалара аҩаӡара ашьҭыхра хымԥада ҷыдала хшыҩзышьҭа аиҭарц иеиҳәеит.