Ақалақь агәҭа апарк хадақәа ируаку аҟны «Аушьҭымҭацәа рбал» еиҿкаан.

245-ҩык аушьҭымҭацәа рҟынтә 11-ҩык ибзиаӡаны рҵара хдыркәшеит. Урҭ аӡәаӡәала асценахь инарыԥхьеит, ирыдныҳәалеит! Магамед-ԥҳа Лолита, Абӷаџьааԥҳа Диана, Ҭраԥшьԥҳа Сариа, Кәарацхьелиа Александр, Ҭаниаԥҳа Мирра, Ахԥҳа Алиса, Аӡынба Еснаҭ, Занҭариаԥҳа Сиузанна, Гыцԥҳа Анна, Аҩӡба Инал, Жьиԥҳа Анелиа. Иара убас аспортсменцәа – аушьҭымҭацәа иалкаахаз рыхьӡқәа рылаҳәан: Ԥкьын Леуарса, Гәымԥҳа Елизавета, Кьиркьинаӡе Марлен, Сангәлиа Виктор, Ҭаниа Шамиль. Далкааны ихьӡ ҳәатәуп Урыстәылатәи Афедерациа аҭачкәымҟьаразы ҩынтә ачемпион Качараа Саир Михаил-иԥа. Аушьҭымҭацәа имаҷҩымкәан Урыстәыла Афедерациаҿы иреиҳау аҵараиурҭақәа ирҭалахьоу ыҟоуп.

ААУ аҟны имҩаԥысуаз аолимпиада алҵшәақәа рыла 25-ҩык еиуеиԥшым азанааҭқәа рыла адырра бзиақәа аадырԥшит. Урҭ ААУ иастудентцәахахьеит.

Аԥсни Урыстәылатәи Афедерациеи ртеатртә сценақәа рҿы аԥсуа милаҭтә ҟазара иаадырԥшыз азы рыхьӡқәа ҳәан: ансамбль «Аурашьа» (асахьаркыратә напхгаҩы Ҭаниа Валери), асолистцәа: Џьергьениа Дарафеи, Канделаки Серафима, Џьергьениа Саломеиа.

Акәашаратә ансамбль «Адац» (асахьаркыратә напхгаҩы – Дбар Руслан), асолист – Андресиан Алла.

Араион зегьы ахьӡала аушьҭымҭацәа дрыдныҳәалеит араион ахада ихаҭыԥуаҩ Аҩӡба Валери.

Гәдоуҭа араион аҵара аҟәша аиҳабы Ҳаразиа Адгәыр иазгәеиҭеит: – Ҳаушьҭымҭацәа, ҳгәы шәыладууп! Иахьа нахыс шәызнылаз амҩа арҭбаареи, уи иацу аизҳареи шәынасыԥ иахәҭакзааит, шәыгәҭакқәа рынагӡара шәразҟы иалазааит! Мҩамш шәықәлааит!..

Аԥсны Жәлар Реизара адепутат Лакоба Аслан иқәгылараҿы аманшәа­лареи ақәҿиарақәеи рзеиӷьишьеит.

Аушьҭымҭацәа ирызкыз ахәылԥаз мҩаԥыргон: Кәарацхьиаԥҳа Сариеи Гәынба Адгәыри. Еиҿкаан аконцерт.

Гугуца Џьыкырба