Абар, сынтәа иҵуеит жәашықәса арҿиаратә центр анапхгаҩы, Аҧсны зҽаҧсазтәыз акультура аусзуҩы Нури Еремеи-иҧа Кәарҷиа ибзоурала абардашәа аҧҵаҩцәа имҩаҧыргоижьҭеи афестиваль. Иахьа уажәраанӡа уи мҩаҧыргон Р.Гәымба ихьӡ зху афилармониаҿы. Ушьҭарнахыс ироуит алшара арҿиаратә центр аҿы ҿыц иаадыртыз асцена маҷ аҟны амҩаҧгара.

Сынтәатәи афестиваль ҳџьынџьтәылатә еибашьраан иҳавагылан иҳацеибашьуаз, ахақәиҭра ҳацаазгаз ачечен шәаҳәаҩы Имам Алимсултанов игәалашәара иазкуп. Иара идунеи иҧсахит 1996 шықәсазы. Аконцерт хацыркын Имам Алимсултанов иашәа «Абхазы абхазы, вас мало», анагӡарала. Ахәаҧшцәа идырбан аибашьра аҟнытә авидео анҵамҭа. Уи ашьҭахь асценахь дцәырҵит ашәаҧҵаҩы-абард Гьаргь Кәакәасқьыр, инаигӡеит ашәақәа ҩба.

Ҳаџьараҭ Ашәба инеигӡоз абард ашәа ус ҭынч узазыӡырҩуамызт.

Ахәаҧшцәа гәахәарыла ирзыӡырҩуан иара убас: Аҧсны зҽаҧсазтәыз артист Омар Сангәлиеи, абардашәа аҧҵаҩы Зураб Лазбеи рашәақәа. Азалаҿ имаҷҩымызт асасцәа–аҧсшьацәа, ашәақәа нарыгӡон аҧсышәалеи урысшәалеи.

Есышықәса афестиваль анымҩаҧысуа рҽаладырхәуеит Аҧсны анҭыҵынтә ашәаҳәацәа. Убас сынтәа ари аконцерт иалахәын Ижевскнтәи ашәаҧҵаҩы Андреи Иванови, Ҟарачы-Черқьестәылантәи Билиаль Хасрокови. Урҭ ҩба-ҩба ашәа нарыгӡеит.

Аҧсны зашәаҳәарала бзиа еицырбахьоу абард Лавренти Амҷба инаигӡеит ашәақәа: «Бара быда», «Бес в ребро».

Ашәаҧҵаҩы Геннади Дбар азыӡырҩцәа ирлахҿыхит «Бара быда» зыхьӡу иашәа хаа ала.

Аконцерт лырҧшӡон ашәаҳәаҩ қәыҧшӡа Ҭеона Ҭачлиа. Лара аҧсышәалеи ҭырқәшәалеи ҩашәак налыгӡеит.

Аконцерт хыркәшан, амҩаҧгаҩ, ашәаҳәаҩ Инесса Григолиеи Омар Сангәлиеи еицынарыгӡоз ашәа «Иҭбаауп ҳа ҳдунеи» ала.

Аҵыхәтәан, Иван Кортуа ихьӡ зху арҿиаратә центр аиҳабы Нури Кәарҷиа афестиваль иалахәыз зегьы адипломқәеи агәаларшәагатә ҳамҭақәеи ранеишьеит.

Наира Сабекиа