Аусшәҟәы атекст аус адулан Аԥсни Урыстәылеи рыбжьара ишиашоу авиаеимадара аиҭашьақәыргыларазы Урыстәылатәи Афедерациа Ахада Владимир Путин иҟаиҵаз адҵа адырра ҟанаҵоит Урыстәылатәи Афедерациа аекономикатә ҿиара Аминистрра аофициалтә саит.  Аиқәшаҳаҭра инақәыршәаны, Урыстәылатәи аган аинвестициатә проект аҭагылазаашьақәа зегьы рынагӡара ахахьы иагоит, Аԥснытәи – иарбоу аинвестициатә проект аҳәаақәа ирҭагӡаны иргылахо аобиектқәа рхатәра азинқәа рыхьчаразы иҷыдоу аҳәынҭқарратә хәдуқәҵарақәа, иара убас ашәахтә зинҷыдақәеи ашәахтә ԥхықәрақәеи, иара убас аргыларақәа рзы адгьылтә ҵакырақәа рзоужьразы аҭакԥхықәреи ахахьы иагоит.

Максим Решетников иажәақәа рыла, Урыстәылеи Аԥсни рыбжьара ииашоу авиаеимадара аиҭашьақәыргылара аҩ-ҳәынҭқаррак рнапхгара арегионқәеи абизнеси алархәны атуризм аҿиара иазкны инарыгӡо астратегиа ду иахәҭакны иҟоуп.

«Аҟәатәи аҳаирбаӷәаза – Аԥсны азы аҭоурыхтә хҭысны иҟалоит. Аҳаирбаӷәаза абар шьҭа 30 шықәса раахыс аус ауӡом. Ари афакт ареспублика атуристтә аусуратә усхкқәа рыҿиара ӷәӷәа­ла иаԥырхагоуп», – иазгәеиҭеит иара.

«Ҳара агәра ганы ҳаҟоуп, аҳаирбаӷәаза аусура аиҭаларгара атуристцәа рзы ареспублика аҟынӡа атранспорттә, наӡареи ҳтәыла жәларбжьаратәи атранспортлогистикатә системаҿы алшарақәа рацҵареи шалнаршо», – инаҵшьны иазгәалҭеит атәыла Аԥыза-министр ихаҭыԥуаҩ, аекономика аминистр Кристина Озган. Аҳаирбаӷәаза аиҭашьақәыргылара иазку аусурақәа хазхаҭалатәи аинвестор ихарџьла, афедералтә биуџьет аҟынтәи аԥаратә малқәа ралагаларада, ҩ-етапкны имҩаԥгахоит. Урыстәыла атранспорт Аминистрреи Урыстәыла авиациа Аминистрреи иарбоу апроект анагӡара зхахьы изгаз аинвестори заанаҵтәи рыхәшьарала аҳаирбаӷәаза аиҭашьақәыргылара актәи аетап ахарџьынҵа 6,5 млрд. мааҭ рҟынӡа инаӡоит.

Аиқәышаҳаҭра анапаҵаҩра ашьҭахь. Аԥыза-министр ихаҭыԥуаҩ, аекономика аминистр Кристина Озган илҳәеит. «Исҳәар сҭахуп, ҳтәыла азы ари даара акыр зҵазкуа, 30 шықәса зегьы ҳаззыԥшыз хҭыс дууп. Иарбоу аинвестициатә проект анагӡара Аԥсны аекономика аҿиара даара хра злоу анырра анаҭоит», – ҳәа иазгәалҭеит лара.   

Кристина Озган лажәақәа рыла, аиқәшаҳаҭра анапаҵаҩра апроект анагӡараан аганқәа рҭакԥхықәрақәа алнакаауеит, ахәҭакахьала, уи Аԥсны Аҳәынҭқаррала апреференциақәеи азинҷыдақәеи рыҭара азԥхьагәазҭо иҷыдоу аинвестициатә режим шьақәнарӷәӷәоит. «Ҳара агәра ганы ҳаҟоуп аҳаирбаӷәаза аусура аиҭаларгара атуристцәа рзы ареспублика аҟынӡа атранспорттә мҩақәеи ҳтәыла жәларбжьаратәи атранспорт-логистикатә системаҿы алшарақәа рацҵареи шалнаршо», – инаҵшьны иазгәалҭеит атәыла Аԥыза-министр ихаҭыԥуаҩ.

Ари ахҭыс ҟаларц азы даара мхакы ҭбаала аусура нагӡан, уи рхы аладырхәит Урыстәыла атранспорт Аминистрреи, аекономикатә ҿиара Аминистрреи, Урыстәыла авиациа Аминистрреи. Аԥсны Аҳәынҭқарра Ахада Аслан Бжьаниа инапынҵала Кристина Озган Урыстәыла аекономикатә ҿиара аминистр Максим Решетникови ари ахҭыс аганахьала злагала ҟазҵаз Урыстәылатәи лколлегацәа зегьи иҭабуп ҳәа ралҳәеит.