Роберт Џьопуа қәҿиарала аусеицуразы агәыӷра шимоу иҳәеит.

«Ахра Владимир-иԥа Аԥснытәи аҳәынҭқарратә университет аҿы аус иуеит. Иара аҵарадырра арҿиараҿы илагала дууп. Аԥсны жәлар Рџьынџьтәылатә еибашьра далахәын. Ахра Владимир-иԥа аредактортә усура аԥышәа имоуп», – иҳәеит уи.

Ахра Анқәаб ирҭаз агәрагаразы ҭабуп ҳәа раҳәо, зыхьӡзыԥша нагоу агазеҭ аколлектив қәҿиарала аус рыцура шалыршахо азы агәыӷра шимоу иҳәеит.

«– Ҳмилаҭтә доуҳа ахыҵхырҭақәа ираԥхьагылоу агазеҭ «Аԥсны» аредакциа аусзуҩцәеи сареи ҳамч-ҳалша еибыҭаны, иара анхацыркха аахыс иахықәкы хадаз ҳажәлар рҿахәы аҳәара, уи амаҵ аура ҳалшоит ҳәа сгәыӷуеит», – иазгәеиҭеит Ахра Анқәаб.

Аԥсны зҽаԥсазтәыз ажурналист Борис Қаџьиа, агазеҭ «Аԥсны» аредактор хада инапынҵақәа ҩышықәса егьаарыгымхо иназыгӡоз, аредактор хада ҿыц иҟаҵара идиныҳәалеит. Уи ҷыдала иазгәеиҭеит «Аԥсны» раԥхьаӡатәи аԥсуа газеҭны ишыҟоу, ақырҭуа меншевикцәа аҳра аныруаз иуадаҩӡаз аҭоурыхтә аамҭа ишалиааз. Агазеҭ еснагь иаанарԥшуан аԥсуа жәлар ргәы иҵхоз азҵаарақәа.

«Еиуеиԥшым ашықәсқәа раан агазеҭ аҟны аус руан иналукааша аԥсуа интеллигенциа рхаҭарнакцәа. Анапхгаҩцәа рҽырыԥсахуан, аха аԥсуа журналистика иреиӷьу атрадициақәа мырӡкәа иааргон. Агазеҭ «Аԥсны» еснагь иахьчон аԥсуа жәлар ринтересқәа. Аԥхьаҟагьы ҳазхиоуп шәареи ҳареи ҳусеицура», – иҳәеит Қаџьиа.