Иура Бигәаа

АЛАМЫС

Схы здыруа сааҟалазар,

Еидара дук сызқәа икыдуп.

Сахьцалакгьы иара сыцуп,

Сымҩа зырлашо иаракоуп.

Уи аныҟәгара сылсыршазар,

Сара сзыҳәа насыҧ дууп.

Иацәхьаҵызгьы ӡәыр дыҟазар,

Аҧсҭазаара дажьымдыруп.

АН

Ира Гегенаа лыҷкәын

Авҭандил Ҭодуа ихьӡынҩылоуп

Блала унаскьазгон,

Џьара  уанцоз.

Мыцхәы сухӡыӡаауан,

Иаҳарак уахьзаҵәыз.

Ҧҳәызбак дызбар,

Сыбла лыдхалон.

Дшысгәаҧхаз уасҳәар,

Макьана  ухәыҷнысшьалон.

Аибашьра  ианалага

Уарҧысхеит мышкала.

Уиҿагылеит аҕа хәымга,

Иухьчарцаз  Аҧсынтәыла.

Ушҟа исымаз агәыҕрақәа,

Ҵааршәны сгәаҵаҿ иаанхеит.

Уаб ишицәысҵәахуаз

                                сылаҕырӡқәа,

Иаргьы иҧсҭазаара  даҧхеит.

Урҭ сгәыҕрақәа  лҵшәадахазар,

Сгәы зласҟажо акоуп.

Уан уҧсадгьыл ухы ақәуҵазар,

Ҳаумырҧхашьеит узааӡаз.

Азҵаара схы иасҭеит,

Исылсыршазеи сыҧсадгьылаз?

Аиашаз ҭоуба зуеит,

Иара сшаҧырхагамхаз.

Аӡәырҩы изызхәыцуа акоуп уахгьы-ҽынгьы,

Амал қамса арҳара.

Урҭ рыҧсадгьыл ашаха рзахаршәуазҭгьы,

Иргон аџьармыкьахь ҭира.

Ақәыҧшра ссируп,

Мҵәыжәҩада иҧыруеит.

Аҕәра умпыҵшәар,

Иуцәыӡыр ауеит.

Ақәра ду иниҵыз,

Агәабзиарагь ацын.

Иҧсы ҭанаҵы игыз,

Ауаҩра акәын.

Салаган жәеинраалак зыҩуеит ҳәа,

Исҭахым изҩуа ргәы ахсыршәарц.

Аҽаваҩ аҧхьахә игеит ҳәа,

Бзанҵык аӡәгьы имаҳац.

Ишҧасҭаху ашәак аҧысҵар,

Уара сыҧсадгьыл иузкны.

Шаҟа уссиру сашәа ссимхар,

Рыцҳарами сара сзы.

Мац: – Уанхәа лыҩныҟа данынаскьоугоз угәалаҟара бзиан, ухынҳәны уанаауа улахь еиқәуп, дахьцаз угәы иалоума?

Хакәыцә: – Мап, еиҭах лассы саауеит лҳәеит.

Мактина: – Иацы быҷкәын аррамаҵурахьы данынаскьабгоз бихьҵәуон, аҭел бизасхьоума?

Хьыма: – Мап, иара дысзаст «аҩныҟа саахьеит» ҳәа.

Қамча: – Упалатаҿ ишьҭаз ачымазцәа збаӡом, рҽыхәшәтәны аҩныҟа ицама?

Хакәыцә: – Мап, ирымаз аҧарақәа анынҵәа ицеит.

Сыӡҕаб: – Бҭыҧҳахеит, арҧарцәа бхьыҧшуа иалагеит, бажәа рыбымҭан цқьа еилымкаакәа.

– Сан ибҳәо саҳауеит, аха ишсабҳәара, саби бареи шәеибадырра шыҟалаз.

– Уи исҳәо ҳәа акрыҟоума, баби сареи ҳахьеибадырыз амҳара­ҿоуп.

–Аҧенџьыр ахь уҧши уара, ҳамҩадуаҿ амашьынақәеи ауааи узрывсуам, машәырк ҟалазар акәхап, рыбжьгьы ишакәым игоит.

– Уи хьаас ибымкын, сыхаара, урҭ адепутатрахь кандидатцәас иқәгылоу роуп, ҳамҩаду абҕанҷ ақәҧсара еимаркуеит ауп.

Аҵх агәы ааиҩнашахьан, Ҳанашә ицәарҭа даақәтәан, ивараҿ ишьҭаз иҧшәма лылахь днагәӡит.

Илбаз џьашьахәыс ибаны, лхы дааҩахан, лхаҵа днеиҿаҧшит.

– Иҟалаз бымбои, ҧхыӡла аҧааимбар исыдиҵеит «уҧшәма лылахь гәыдкыл» ҳәа.

– Уара иуеиҧшу хымхәак иуеиҳәазар акәхап, мамзар ҧааимбарҵәҟьазҭгьа иеиҕьу уск уабжьаимгози, – лҳәан аҭӡахьы лхы налырхан дааҧышәарччеит.