Урыстәылатәи аделегациа аилазаараҿы иҟоуп: аҳәаанырцәтәи атәылақәа рҟны арегион­бжьаратәи акультуратә имадарақәа рзы Урыстәылатәи Афедерациа иҟны иҟоу Аусбарҭа анапхгаҩы Игорь Маслов, аекономикатә ҿиара аминистр ихаҭыԥуаҩ Дмитри Вольвач, аенергетика аминистр ихаҭыԥуаҩ Евгени Грабчак, арратехникатә усеицуразы Афедералтә маҵзура адиректор ихаҭыԥуаҩ Михаил Бабич.

Аԥсни Урыстәылеи ирыбжьоу аҳәынҭқарратә ҳәаа аушьҭрагәаҭаратә ҭыԥ «Псоу» аҟны асасцәа ирԥылон Аԥсны Аҳәынҭқарра Ахада ихаҭы­ԥуаҩ Бадра Гәынба, Аԥсны иҟоу Урыстәылатәи Афедерациа Ацҳаражәҳәаҩ Михаил Шургалин, Аҳәынҭқарра Ахада Иусбарҭа анапхгаҩы Џьансыхә Нанба, Аԥыза-министр ихаҭыԥуаҩ, аекономика аминистр Кристина Озган, Гагра араион ахада Иури Ҳагәышь.  

Урыстәылатәи Афеде­рациа Аиҳабыра Рхантәаҩы ихаҭыԥуаҩ Алеқсандр Новак аинвестициатә программа аҳәаақәа ирҭагӡаны Урыстәылатәи афинанстә цхыраара иабзоураны еиҭашьақәыргылаз Гагра ақалақь агаҿеи аколоннадеи дырҭааны игәеиҭеит.

Иара убас Алеқсандр Новак инапхгарала Урыстәылатәи аделегациа Пи­цунда ақалақь аҿы ҳаԥхьаҟа исасааирҭаны иҟалараны иҟоу «Москва Резорт» аҵакыра иаҭааны игәарҭеит. Алеқсандр Новак 46,5 гектар рҟынӡа инаӡо атерри­ториаҿы асасааирҭатә комплекс «Москва Резорт» апроект шынагӡахо азы адырра ирҭеит. Иарбоу асасааирҭатә комплекс иаҵанакуеит 200 нызқь метрԥшьырқца аҟынӡа. Ари апроект ахарџьынҵа 31 млрд. мааҭ рҟынӡа инаӡоит. Уи аартра азԥхьагәаҭоуп 2026 шықәсазы.

Иара убри аҽны Алеқсандр Новак «Акурорт Пицундеи» Пицундатәи аныхабааи дырҭааит. Алеқсандр Новак иԥылеит атуризм аминистр Ҭеимураз Хышбеи апансионатқәа реидгыла «Акурорт Пицунда» аиҳабы Фрикан Гәынбеи. Ҭеимураз Хышба «Акурорт Пицунда» аҭоурыхи иахьатәи амши ртәы изеиҭеиҳәеит. Алеқсандр Новак иара убас Х ашәышықәсазы Апостол Андреи Аԥхьанаԥхьа иаҳаҭыр азы иргылаз Пицундатәи Апатриархтә ныхабаа даҭааит. Асасцәа раԥхьа иқәгылеит ауарӷанарҳәаҩы Лука Гаделиеи аоператә шәаҳәаҩы Кристина Ешбеи.

Урыстәылатәи Афедерациа Аиҳабыра Рхантәаҩы ихаҭыԥуаҩ Алеқсандр Новак хадара ззиуа аделегациа Аҟәатәи аҳаирбаӷәаза иаҭааит. Асасцәа ирԥылеит Гәылрыԥшь араион ахада Саид Ҳаразиеи Ареспубликатә унитартә наплакы «В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» аиҳабы Виачеслав Ешбеи. Виачеслав Ешбеи аҳаирбаӷәазеи ашьҭыԥраарҭатәарҭатә цәаҳәеи рҭагылазаашьа далацәажәеит.