Хәажәкыр 29, 2024

Ареспубликатә ҳәынҭқарратә усҳәарҭа «Аҧснымедиа»

Image

Аҳәынҭансамбль – Москва

Асабша, маи 27 азы Аԥсны ашәа­ҳәареи акәашареи зҽаԥсазтәыз рҳәынҭқарратә ансамбль ақәгыларақәа қәҿиарала имҩаԥысит. «Урыстәылеи Аԥсни ркультуратә еимадарақәа» ҳәа апроект инақәыршәаны, П.Чаиковски ихьӡ зху азал аҟны аконцерт шымҩаԥысыз атәы далацәажәеит акорр. Алеқсеи Шамба.

Ақәгылара иалагаанӡа акультура аминистр Даур Ақаҩба ажурналистцәа драцәажәеит.

Аусҳәарҭа анапхгаҩы иаҵишьит аусмҩаԥгатәқәа шынарыгӡауа Урыстәылеи Аԥсни ркультура аминистррақәа иҟарҵо адгыларала. Уи еиҿызкааз Росконцерт ауп.

«Агәра ганы сыҟоуп, ҳартистцәа рҟазара шаадырԥшуа, аконцерт ашҟа имҩахыҵыз шдыргәырӷьауа», – иҳәеит иара.

Иара убас, аминистр иазгәеиҭеит аиԥылара шимаз Урыстәылатәи Афедерациа акультура аминистр ихаҭыԥуаҩ Андреи Малышев иҟны, уаҟа анапы шаҵаҩыз 2023-2025 шықәсқәа рзы аусҳәарҭақәа рыҩбагьы русеицура апрограмма.

«Апрограммаҿы иарбоуп Урыстәылатәи арҿиаратә коллективқәа рҭактә гастрольқәа, аҿыханҵаратә ҟазара инаркны абиблиотекатә, амузеитә ус аҟынӡа хырхарҭа рацәала аусеицура», – иҳәеит Ақаҩба.

Асцена аҟнытә аминистр даԥхьеит Аԥсны Ахада Аслан Бжьаниа иҟаиҵаз адныҳәаларатә шәҟәы. Уаҟа аҳәынҭқарра Ахада иазгәеиҭеит иахьа Урыстәыла ахәаԥшыҩцәа зеиуахкы ыҟаӡам алшара шрымоу аԥсуа культура аилкааразы, азхьаԥшразы.

«Ҳазну ашықәс азы Урыстәылатәи Афедерациа аганахьала Аԥсны аҳәынҭқарратә хьыԥшымра аназханаҵа аҽны инаркны 15 шықәса ҵуеит. Абри аиубилеи шьахә иахьатәи ахҭыс аҵак ҷыда анаҭоит. Ҳтәылақәа рыбжьара аиҩызаратә еизыҟазаашьақәа рышьақәыргылара ухаҿы иузаагаӡом акультуратә еимадарақәа рыда. Уаҩы деигәырӷьоит ҳара ҳусеицура заҵаааира аганрацәа ахьаиуа», – иазгәаҭоуп адныҳәа­лараҿы.

Аофициалтә хәҭа шьҭахь иалагеит аконцерт, инарыгӡеит аԥсуа жәлар рашәақәа, рыкәашарақәа.

Аԥсны зҽаԥсазтәыз артистцәа Адамыр Сангәлиа, Омар Ӡинӡибаӡе, Емма Абӷаџьаа, Герман Ҳашыг, Аахыҵ-Уаԥстәыла зҽаԥсазтәыз артистка Илона Зыхәба, Аԥсны жәлар рартист Анри Ферзба рашәаҳәашьала, рыкәашашьала ахәаԥшцәа дыршанхеит.

«Урҭ абри аҩыза злаҟарҵозеи? Саԥсыуаны схы збо салагеит, ажәак сыздыруам, аха зегьы сныруеит. Ишԥасҭаху асценахь схаланы, урҭ срыцкәашарц», – лҳәеит ақәгыларақәа рышьҭахь ԥҳәызбак.

Аконцерт аан сара сидтәалан Аԥсни Ҟарачы-Черқьестәылеи жәлар рартист, Аҳәынҭ­ансамбль асахьаркыратә напхгаҩы Валери Ҭаниа. Уи иааӡамацәа рықәгылара дахӡыӡаауан, дагьеигәырӷьон.

  • Image
    Image
    Ad Sidebar

    Login to your account

    Username *
    Password *
    Remember Me