Иааныркылоз амаҵурақәа рҟнытә рхы иақәиҭтәуп аҩнуҵҟатәи аусқәа Рминистрра ГАИ аиҳабы Родик Базба, уи ихаҭыԥуаа Рауль Ҳагба, Алхас Еныкь, иара убас аҩнуҵҟатәи аусқәа Гәдоуҭатәи рраионтә ҟәша Аҳәынҭавтоинспекциа аиҳабы Инал Агрба.
Гәдоуҭа араион амилициа аҟәша аиҳабы Зосма Гыцба лахьы иҭан.
Аҩнуҵҟатәи аусқәа Рминистрра излаанацҳауа ала, ахәылԥаз маи 13 азы Гәдоуҭа араион Абӷархықә ақыҭан автомашьына Тоиота аныҟәцаҩ, 1994 ш. азы ииз, аԥсҟы измырманшәалеит, иаԥхьаҟа иаауаз амашьына даҿаланы абетон аанда дасит. Абри иахҟьаны ԥшь-ҩык апасаџьырцәеи аныҟәцаҩи араионтә хәышәтәырҭахь инаган, иара убраҟа рыԥсҭазаара иалҵит. Иҭахаз зегьы 25 шықәса инаркны 35 шықәса рҟынӡа зхыҵуаз ракәын.
Аԥсны аҩнуҵҟатәи аусқәа Рминистрра УГАИ аиҳабы аамҭала инапынҵақәа рынагӡаҩыс дҟаҵоуп амилициа аподполковник Лоу Инал-иԥа.
Вальтер Быҭәба азинлеишәа алыршара знапы иану аусзуҩцәа рҿаԥхьа ауснагӡатә хадақәа ықәиргылеит.
Иара убас аилацәажәараҿы ишьҭыхын азакәанԥҵара иалагалоу аиҭакрақәа ахрархәара азҵаарақәа, ахәҭакахьала – арыжәтә ыжәны автотранспорт аныҟәцара.
