Хәажәкыр 29, 2024

Ареспубликатә ҳәынҭқарратә усҳәарҭа «Аҧснымедиа»

Image

Аҧсны Аиҳабыра Реилазаа­ра аилатәарақәа рзал аҟны имҩаҧган аҵыхәтәантәи ашықәсқәа рзы аҧсуа ҵарауаа аус здырулоз аҭыжьымҭа ду «Аҧсны. Иаазыркьаҿу аенциклопедиа, 2-томкны» (урысшәала) аӡыргара. Аҭыжьымҭа аус адырулон аҭҵаарадырратә Центр «Аҧсуа енциклопедиа» амаҵ азызуа.

Ашәҟәы аиҧшз еиҧшу ирышьашәаланы еиқәыршәоуп, еиднакылоит, иамҽханакуеит Аҧсны ҳәынҭқаррак аҳасабала ажәытәӡатәи аамҭақәа инадыркны ҳазҭагылоу аамҭазынӡа иаҵанакуа аазырҧшуа еиуеиҧшым ахырхарҭақәа, ауаажәларра-политикатә шьақәгылашьа инаркны, акульту­ра, аҟазара, алитература, афоль­клор, агеографиа, аҭоурых, аеко­номика, адин, афлореи афаунеи, архитектура, аспорт уҳәа.

Аӡыргара иҽалаирхәит Аҧсны Аҧыза-министр ихаҭыҧуаҩ, афинансқәа рминистр В. Дел­ба, ауаажәларратә усзуҩцәа, аҵарауаа, аҧсуа интеллигенциа рхаҭарнакцәа аӡәыҩы.

Аӡыргара ааиртит, егьымҩаҧигон Ацентр «Аҧсуа енци­клопедиа» аиҳабы С. Салаҟаиа. Инаимҩатәны дзааҭгылеит, аҭыжьымҭа аус адулара шымҩаҧысуаз Ацентр анаартха инар­кны. Ҳәарада, аҧшьгамҭа усумҭа дууп, акы агӡамкәа иҟамзаргьы, инеизакны даара ахәшьара зҭатәу акәны ишыҟазаауа. Хымҧада, аҧхьаҟазы ахарҭәааразы аусура иацҵахоит, арҽеирақәа алагаланы.

Анаҩс ажәа ииҭоит аенци­клопедиа аредактор хада, афилологиатә ҭҵаарадыррақәа ркандидат У. Аҩӡба. Уи аӡыргарахь имҩахыҵыз зегьы иҭабуп ҳәа реиҳәеит. Аенциклопедиа азыр­хиара знапы алакыз аҵарауаа ракәзар, рџьабаа ахәшьара аҭауа аџьшьара бзиа ишаҧсоу азгәеиҭеит.

«Ари раҧхьатәи усумҭоуп. Инеиҧынкыланы хышықәса ау­сура мҩаҧысуан. Аҭыжьымҭа аиқәыршәара шықәсыки бжаки аамҭа агеит. Аусумҭа ахаҭабзиара лаҟәымхарц, еизаҳгоз, иҭаҳҵаауаз аматериалқәа рыдагьы, аенциклопедиақәа шырыҩуа азы иҟоу аҧышәа аганахьала еилкаатәыз рацәан, амҩа уқәызҵо алитера­тура ҷыда ҭҵаатәын. Иаҳҳәар ҳалшоит, жәаха енциклопе­диа рҟынӡа аус рыдааулеит ҳәа. Урҭ рҟнытә Аҧсны иазкыз аматериалқәа еизаҳгон. 2019 ш. рзы астатиақәа рыҩра ашҟа ҳаиасит. Изӡатәузеи, усҟан иҿиаз апандемиа аҵарауаа русура иаҧырхагахеит, абиблиотекақәа акраамҭа аус руамызт, аха, убас шакәызгьы, аенциклопедиа аиқәыршәара иалахәыз зегьы рнапы ианыз аус нарыгӡеит», – иҳәеит уи.

Аҭыжьымҭа еиднакыло астатиақәа рҩит, Аҧсны аҭҵаарадырратә институтқәа рҟны аус зуа аҵарауаа реиҧш, Урыстәылатәи аҭҵаарадырратә усҳәарҭақәа русзуҩцәагьы. Астатиақәа рҟны ахархәара зызуу ахыҵхырҭақәа ахьынтәаагоу иазку алитература ҷыда арбоуп. Уи ала зхы иазырхәо дарманшәалоит, дымҩақәнаҵоит, иеилнаркаауа рацәоуп.

Хымҧада, Аҧсны адоуҳатә культура аҿиара амҩан аенци­клопедиа аҭыжьрала ашьаҿа бзиа ҟаҵоуп, ауасхыр ҕәҕәагьы шьҭаҵоуп, аихаҳаразгьы амҩақәа аанартуеит.

Ашәҟәы ахцәажәараан ргәаанагарақәа рҳәеит аҵарауаа : И.Ҭаниа, З.Шьалашьаа, Е.Гәбаз, аҳәынҭқарратәи ауаажәларратәи усзуҩы В.Цыгәба уҳәа егьырҭгьы, иазааҭгылеит аҭыжьымҭа даара хәарҭара ду аланы ишыҟазаауа, хҭыс бзиангьы ишахәаҧшуа.

Аенциклопедиа редактор ха­дас дамоуп уаанӡа Ацентр анапхгаҩыс иҟаз У.Аҩӡба. Аредакциатә коллегиа аилазаа­ра иалоуп: А.Аҩӡба (аредактор хада ихаҭыҧуаҩ), И.Анчабаӡе, Н.Багаҧшь, Е.Гегиа, А.Дбар (аҭакзыҧхықәу амаӡаныҟәгаҩ), С.Салаҟаиа, Л.Саманба. Иҭыжьуп Санкт-Петербург, «Аиуристтә центр» аҟны. Атираж 2000 цыра ыҟоуп.


В. АЖӘАНБА

  • Image
    Image
    Ad Sidebar

    Login to your account

    Username *
    Password *
    Remember Me