Ашколқәа рыбжьара имҩаҧысуаз аицлабра иалахәын Аҟәатәи аҧшьбатәи, ахәбатәи, афбатәи, абыжьбатәи, ажәабатәи, ажәахатәи, ажәиҧшьтәи абжьаратәи ашколқәа рҵаҩцәа ргәыҧқәа.
Аҟәатәи ажәабатәи Ашьхарыуаа ршкол ахь инеит, ашколхәыҷқәеи арҵаҩцәеи реиҧш, ашәҟәыҩҩцәа, аҟазара аусзуҩцәа. Аицлабраҿы иреиҕьхо ралкааразы иаҧҵаз ажиури аилазаараҿы иҟан: апоет З. Ҭҳаиҵыкә, асахьаҭыхҩы Л. Габелиа, Аҟәа ақалақь аҵара аусбарҭа аусзуҩцәа Н. Ломиа-ҧҳа, А. Ҭар-ҧҳа.
Ашколхәыҷқәа рҟазара аадырҧшуан быжьҩык ашәҟәыҩҩцәа ирызкны. Урҭ рҩымҭақәа рыла еиқәдыршәаз ӡырыргон.
Школцыҧхьаӡа рықәгылара иазыҧҵәан жәаминуҭк рҟынӡа.
Ажиури зызхьаҧшуаз иреиуан: афотоальбом аестетикатә гьама ахьынӡаҳараку (уи абҕьыцқәа жәаҩа даҟьа иреиҵамзар акәын), насгьы акомпозициа, иҭырҵааз азгәаҭара, апрозатә ҩымҭа ацҧҵәаха мамзаргьы ажәеинраала исахьаркны аҧхьара ахьынӡарылшаз.
Аусмҩаҧгатә аартуа еиқәшәаз бзиала шәаабеит ҳәа ралҳәеит амҩаҧгаҩ, арҵаҩы И. Конџьриа-ҧҳа. Аиҧылара иалахәыз зегьы ирыдныҳәалауа иқәгылеит, ақәҿиарақәа рзеиҕьаршьеит Аҟәа ақалақь аҵара аусбарҭа аиҳабы А. Ҭаркьыл-ҧҳа, Аҧсны ашәҟәыҩҩцәа Реидгыла ахантәаҩы В. Аҧҳазоу, ажурнал «Алашара» аредактор хада А. Лагәлаа уҳәа егьырҭгьы.
Ашколхәыҷқәа ақәҿиара бзиақәа аадырԥшит. Ари ишьақәнарӷәӷәоит аԥсуа литература ишазҿлымҳау, рхатәы бызшәа шыгәцараркуа, ахархәара ишазыманшәалоу, агәырҵҟәыл шрымоу, ишҿыршыгоу. Зегьы аихьӡара шьахәқәа шаадырҧшызгьы, аицлабра анакәха, иҟалоит еиҕьны иқәгыло, еиҳау ахәшьарақәа зауа, убри алагьы иалкаахо. Ажиури аихшьалақәа рыла, актәи аҭыҧқәа ҩба ирыҧсахеит Д.И. Гәлиа ихьӡ зху аҧшьбатәи ашколи Н.А. Лакоба ихьӡ зху ажәабатәи Ашьхарыуаа ршколи. Аҩбатәи аҭыҧ ранашьахеит Е.А. Ешба ихьӡ зху Аҟәатәи ахәбатәи ашкол, ахҧатәи аҭыҧ рҽаҧсартәит Ҷ.М. Џьонуа ихьӡ зху ажәахатәи ашкол агәыҧ еиднакылоз.
Абас еиҧш иҟоу алитературатә хәылҧазқәа, аицлабрақәа, аконкурсқәа, афестивальқәа еиҵагыло аҿар рхатәы бызшәа агәыблра рыланааӡоит, аҧсуара иазхьанарҧшуеит.
