Арҿиаҩы ихатәы ҧсҭазаараҿы акыр амыҟәмабарақәа шихигахьоугьы иҭыхымҭақәа ирылҧхаауеит аҧхара, ицәажәоит ҳбызшәала, ҳҿаҧхьа ицәыригоит аҧсуа инхамҩа, иҧсабара, ҟазара дула исахьаркны. Азалқәа ҩба ҭзырҭәаауаз иҭыхымҭақәа ирылҷҷаауан: «Ацәылашамҭаз», «Аныҳәаҩ», ш. «Аҧсуа иашҭа», 2015 «Аҧсуаа рынхашьа». Автор иҭыхымҭақәа рҿы ихадоу аҭыҧ азалхуп аҧсуа жәлар рҭоурых аҿы иаамҭа еиқәаҵәаны ирхаҧаз амҳаџьырра аамҭа.
Амҳаџьырра атема иазкны Заур Мықәба иаҧиҵеит акымкәа-ҩбамкәа аҭыхымҭақәа.
Ацәыргақәҵа аартуа, уи аиҳабы Ельвира Арсалиа дазааҭгылеит асахьаҭыхҩы инысымҩа. Иара арҿиара инапы алакуп 1975 шықәса раахыс. Иҭыхымҭақәа цәыргақәҵан Аҧсны анҭыҵгьы имҩаҧымсыц атәым тәылақәа рҟны имҩаҧаҳгоз Заур Мықәба дахьалахәымыз. Иара ихырхарҭа аҿыханҵа ауп, аха иахьагьы аус адиулоит ҽышәала аграфика, иагьицааиуеит. Иара иҭыхымҭақәа ыҟоуп Америка, Шьамтәыла, Германиа, Ҭырқәтәыла, Швециа, Естониа рцәыргақәҵатә галереиақәа рҿы. Амҳаџьырра атема аҟнытә иалукааша инапкымҭақәа иреиуоуп «Иҳазгәакьоу ҳадгьыл ҳшаҧырҵуаз» , «Амҳаџьыр иҭахара», «Агәалашәара», арҭ зегьы, аҵакы ҵаула зҵаҵәаху, ахәаҧшҩы шәхәыцрак изаазыртуа усумҭақәоуп.
Ажәа рҳәеит асахьаҭыхцәа, Аҧсны зҽаҧсазтәыз акультура аусзуҩы Сергеи Ҵәыџьбеи Аҧсны асахьаҭыхцәа Реидгыла анапхгаҩы Витали Џьениеи. Урҭ иазгәарҭеит рҩыза арҿиараҿ зегь раҧхьа иширгыло иҧсадгьыл, аҧсуа инхамҩа атема, ирҿиамҭа ишаныҧшуа иара убас амҳаџьырра атема, «Заур Мықәба аҿыханҵа азҟаза ду, ирылукааша ҳсахьаҭыхцәа дыруаӡәкуп», – иазгәарҭеит дара. Ацәыргақәҵа аҭааҩцәа иҭабуп ҳәа раҳәо дықәгылеит асахьаҭыхҩы. «Ҳара ҳмилаҭ аиқәырхара ҳазхиазароуп зегь рыла, арҿиарагьы уаҟа акырӡа аҵанакуеит», – иҳәеит иара.
Заур Мықәба хаҭалатәи иҭыхымҭақәа ацәыргақәҵатә зал аҿы иҟазаауеит мшаҧымза 29 рзынӡа. Уи збарц зҭаху алшара рымоуп иаҭаарц. Ирылшоит иара убас ргәы иалнахыз аҭыхымҭа аахәара.
Наира САБЕКИА
