Аҭыжьымҭа аатуеит Аҧсны жәлар рпоет Алықьса Гогәуа 91 ш. ихыҵра аҳаҭыр азы икьыҧхьу Алықьса Гогәуеи Анатоли Лагәлааи реиҿцәажәара «Зыҧсы ҭаны иаанхаз сырхашҭӡом…» зыхьӡу ала. Абаҩхатәра злаз ашәҟәыҩҩы Даур Занҭариа диижьҭеи 70 ш. аҵра инамаданы ажурнал ианылеит иажәабжь «Аӡызлан», иара убас Владимир Занҭариа истатиа «Еицакра зқәым Даур иажәа». Ашәҟәыҩҩ Гьаргь Гәлиа ииубилеитә рыцхә (90ш.) аҳаҭыр азы икьыҧхьуп иажәабжьқәа: «Ашьхатәылатәи алакә», «Хәаҧтәи аҷкәын дҧырны амза ашҟа дышцаз». Аҵарауаҩ Станислав Лакоба иакәзар, 70 ш. ихыҵит, араҟа икьыҧхьуп иажәабжь «Асааҭ» (аиҭагаҩ – А. Ажьиҧҳа) , насгьы иажәеинраалақәа (еиҭеигеит В. Занҭариа) рыхәҭак.
Апоезиа иаҵанакуеит Анатоли Лагәлаа, Енвер Ажьиба ражәеинраалақәа. Апроза ажанр ала ианылеит Владимир Занҭариа иажәабжь «Ҿамҩак аҳарданҩы…». Ашәҟәыҩҩы Никәала Ҳашыг изку ргәалашәарақәа анылеит: Анатоли Лагәлаа, Анзор Мықәба, Валентин Кәаҕәаниа, Владимир Занҭариа, Даур Наҷҟьебиа, Дмитри Габелиа.
Аҧсны ашәҟәыҩҩцәа Реидгыла 90 шықәса ахыҵра инадҳәаланы аҭыжьымҭа иануп Виачеслав Бигәаа инеиҵыху истатиа «ХХ ашәышықәса 50-тәи ашықәсқәа рынҵәамҭеи – 90-тәи ашықәсқәқәа ралагамҭеи рзы аҧсуа литературатә процесс аҷыдарақәеи ахырхарҭақәеи» алагарҭа. «Апоет қәрахьымӡа…» ахьӡуп Таиф Аџьба игәалашәара иазку Елеонора Коҕониаҧҳа лстатиа.
Адраматургиа аҟәша аҟны икьыҧхьуп Геннади Аламиа еиҭеигаз Уилиам Шеқспир ипиеса «Акрал лир».
Абызшәадырреи аетнографиеи ирыҵанакуеит аҵарауаа Ева Ҭаниаҧҳаи, Шьазина Арнауҭҧҳаи, Елисо Сангәлиаҧҳаи еиуеиҧшым рстатиақәа.
Аиааира 30 ш. ахыҵра инадҳәаланы «Аҧсадгьыл ахьчаҩцәа» арубрикала акьыҧхь абеит «Аҧсны зыхьчоз срылагылан» зыхьӡу аинрал Вахтанг Цыгәбеи Анатоли Лагәлааи реиҿцәажәара, иара убас Саида Ҳаџьым Аҧсны Афырхаҵа Руслан Ладариа изылкыз астатиа «Уеибашьырц уҭахызар, ахаҳәгьы уршәыр ҟалоит».
