Иеиднакыло аматериал аҵарауаа мацара ирызкым. Иамоу аҭҵаарадырратә интерес ҳаракӡа инаваргыланы, Аҧснытәи аҳәынҭқарратә университет аҟны, арҵаратә прцесс аҿы, алекциатә материалқәа реиқәыршәараан ахархәара аҭоуп. Хықәкысгьы иамоуп, аҧсуа-адыга бызшәақәа рзанааҭ лексика ажәытә шьаҭақәа аҿар разхьарҧшра, рыхдырраҿы инаганы агәыбылра дыркра, анаҩс аҭҵаарадырра иаднаҧхьало рыхшыҩ азышьҭра.
Атерминқәа аҭоурых-етимологиатә анализ рызуа автор аҧсуа, афиники, аиндори, ажәытә бырзен бызшәақәа рҟынтәи ақарҭвел бызшәақәа ирыднаҧхьалаз, иаланагалаз лымкаала дырзааҭгылоит. Аҧсуа бызшәа иамоу амчхара ҷыдала иазгәаҭо, амаршәа кны дазнеиуа, дазымццакыкәа, факт материалла ишьақәырҕәҕәо, дызлацәажәо ибызшәеи дызну адгьыли аҧсуа ишитәу гәрамгара ацымкәа, аизга знапы иаку дазааигоит. Аҭҵаарауси арҵареи, абызшәеи аҭоурыхи знапы алаку, ирызхьаҧшуа зегьы рзы хәы змаӡам усумҭоуп.
Аҧсуа дгьыл анызаара гәырҩазго амилаҭ ицәырырго азҵаарақәа: Инхозма ари адгьыл аҿы аҧсуаа? Амшыни аҧсуеи еимаразма? Ирылазма урҭ аргыларатә ҟазара? Иаҧшәымацәоума ҭоурыхла рыдгьыл аҿы дара рхаҭа? Рбызшәа ажәартә еилазаара иалшома рыҧшәмара ашьақәырҕәҕәара? Аҧсуа-адыга бызшәақәа еихылҵшьҭраҵәҟьоума? Ҭҵарадырра ҵаҵҕәы цқьала иҟоума абарҭқәа шьақәзырҕәҕәо?
Ихарҭәааны иҟоу алитература нҭырҳәыцааны иҭҵааны, иақәнаго азанааҭтә жәар еидкыланы, арҭ азҵаарақәа рҭакқәа жәаҳәарада иҵаҵҕәыркуп.
Аизга, Аҧснытәи аҳәынҭқарратә университет акафедрақәа рыдагьы, Нхыҵ-Кавказтәи аҳәынҭқарратә университетқәа рҵаратә программа иаларҵаша, аҧсуа-адыга бызшәашьаҭа акзаара шьақәзырҕәҕәо, абызшәатә ҭаацәара иаднакыло абызшәақәа рҵареи рыҭҵаареи зырманшәало, дара еибызҭо ажәартә еилазаара лҵшәала ихазырҭәаауа аматериал беиа агәылоуп.
Иаҳҳәаз азгәаҭаны, афилологиатә ҭҵаарадыррақәа рдоктор, апрофессор Ӡиӡариа О.П. (Ӡари-иҧа) имонографиақәеи истатиақәеи реизга «Аматериалқәа аҧсуа-адыга бызшәақәа рлексикологиеи азеиҧш бызшәадырреи рзы» аизга, Гь.А.Ӡиӡариа ихьӡ зху Аҳәынҭқарратә премиа аиура хымҧада иаҧсоуп.
Е.Ш.Ҭаниа, афилологиатә ҭҵаарадыррақәа ркандидат, адоцент, Ҭырқәтәыла Ауниверситет Диузџье акафедра «Кавказтәи абызшәақәеи акультурақәеи» адоцент Диузџье, Ҭырқәтәыла
