«Аԥсны араионқәа зегьы рхатәы герб рымоуп, ҳара ҳраион ауп иахьа уажәра­анӡа уи змамыз. Сара сгәанагарала, агерб – ари араион аҭоурых-культуратә ҭынха аазырԥшуа символуп. Даара аҵак ду змоу усура мҩаԥган. Хазы ҷыдала иҭабуп ҳәа иасҳәарц сҭахуп агерб автор, асахьаҭыхҩы Баҭал Џьопуа», – ҳәа иҳәеит аилатәара зхы алазырхәыз Аҟәа араион ахада Алхас Ҷыҭанаа. Адепутатцәа рыхәаԥшит ирыдгалаз агерб авариантқәа хԥа, анаҩс ашьақәырӷәӷәаразы иалырхит агерб авариант «Гәыма». Аизара ахантәаҩы Валери Смыр иалхыз асимволика инагӡаны араион ахаҿра аанарԥшуеит ҳәа иазгәеиҭеит.