Сынтәа Аԥсны ажурналистцәа Реидгыла аконкурс Аԥсны Аиааира агареи Ахьыԥшымреи Рымш 30 шықәса ахыҵра азгәаҭаразы Аҳынҭқарратә комиссиа алархәны имҩаԥнагоит. Убри аҟнытә аконкурс аԥхьахәтә фонд ҩынтә еиҳахоит, уи 300 нызқь мааҭ рҟынӡа инаӡоит.

Аԥсны ажурналистцәа Реидгыла ахантәаҩы Руслан Ҳашыг иҟаиҵаз адыррақәа рыла, иарбоу аԥхьахә аҟынтәи 30 нызқь мааҭ аконкурс ажиури алахәылацәа русура ахәшьарахьы идәықәҵахоит. Ишьақәырӷәӷәаз аԥҟара ала, аконкурс ахь ирыдыркылалоит ԥхынҷкәынмза 1, 2022 шықәса инаркны жьҭаарамза 30, 2023 шықәсанӡа акьыԥхь аҿы ицәыргази ателехәаԥшра, ма арадио аефир аҿы имҩаԥыргахьази ажурналисттә материалқәа.

Апрезидиум алахәылацәа Аԥсуа телехәаԥшреи арадиои русзуҩцәа, ажурналистцәа: Гергиа Фатима, Асида Малиа, Алика Ҭраԥшь, Милана Адлеиба,  Асида Гәыниа ажурналистцәа Реидгылахь рыдкыларазы еицҿакны рыбжьы рҭиит. Аилатәараҿы лаҵарамза 19 – 23, 2023 шықәса рзы Санкт-Петербург ақалақь, Аҳәынҭқарратә Ермитаж аҟны имҩаԥысраны иҟоу XVII есышықәсатәи жәларбжьаратәи амедиафорум «Акультурақәа рдиалог» Аԥснытәи ажурналист ҿарацәа ралахәхара азы аинформациа иазыӡырҩит. Ажурналистцәа Реидгыла апрезидиум алахәылацәа ажурналқәа «Алашара», «Аԥсны аҟазара», «Амцабз» изаамҭанытәиу аномерқәа еиԥҟьарада рӡыргара шхымԥадатәиу азгәарҭеит.

Аԥсныпресс