Аԥсны аҭҵаарадыррақәа Ракадемиа апрезидент Зураб Џьапуа еизаз бзиала шәаабеит ҳәа реиҳәеит. Уи аҳасабрбатә ашықәс Академиазы иҷыдоу аҟазшьа аман ҳәа иазгәеиҭеит. «2022-тәи ашықәс Аԥсны анаукақәа Ракадемиазы аиубилеитә шықәсаны иҟан. Зегьы рзы игәырӷьараны иҟалаз хҭысхеит акарантинтә ԥкрақәа раԥыхра, иарбоу ахҭыс ҳҵарауаа ирыцны азгәаҭаразы арахь иааит еиуеиԥшым адунеи атәылақәа рҟынтәи хыԥхьаӡара рацәала асасцәа.

Аҵарауаа хаҭала дрыдныҳәалеит аҳәынҭқарра Ахада Аслан Бжьаниа, иара убас егьырҭ аҳәынҭқарра анапхгара ахаҭарнакцәагьы. Аҳәаанырцә иҟоу анаукақәа Ракадемиақәа жәпакы рҟынтәи видеола адныҳәа­ларақәа аарышьҭит. Ари зегьы, жәаҳәарада, аидеиа ҿыцқәа, апланқәа, урҭ рынагӡаразы ажәалагалақәа уҳәа рцәырҵразы игәышьҭыхганы иҟалеит», – ҳәа инаҵшьны иазгәеиҭеит анаукақәа Ракадемиа апрезидент Зураб Џьапуа.

Аизара иалахәыз зыԥсҭазаара иалҵхьоу рҩызцәа минуҭктәи аҿымҭрала иргәаладыршәеит. Анаҩс, Академиа апрезидент зусуратә ҭыԥқәа рҿы хра злоу аусура назыгӡо, аспирантурақәа рҿы аҵара зҵо, ареспублика анаукатә ԥсҭазаара активла зхы алазырхәа, жәларбжьаратәи аҳәынҭқарраҩнуҵҟатәи анаукатә форумқәа ирылахәу, астатиақәа зыҩуа, аҭҵаарақәа мҩаԥызго, акадрқәа реиҵааӡара знапы алаку уҳәа   зегьы иҭабуп ҳәа реиҳәеит. Уажәазы уаанӡа ишьақәгыланы иҟаз аизара амҩаԥгаразы арегламент аиҭакрақәа алагалахеит.

 Аԥсны аҭҵаарадыррақәа Ракадемиа апрезидент ҷыдала зҽалызкааз аҵарауаа, Академиа аԥҵара 25 шықәса ахыҵра иазкны раԥхьатәи аҿартә наукатә конференциа аиҿкааҩцәеи алахәылацәеи уахь иналаҵаны, аҳаҭыртә шәҟәқәа ранашьаразы ажәалагала ҟаиҵеит. Анаҩс уи ааигәа адиссертациақәа зыхьчаз Инал Гыцба (афилологиа), Мадонна Ԥлиа (афилологиа), Роза Саакиан (апедагогика) Академиа адипломқәа ранеишьеит. Қәҿиарала аусуразы аҵарауаа гәыԥҩык аԥаратә ҳамҭақәа ранашьахеит.

Аԥсныпресс