Аԥсны Аҳәынҭқарра Ахада иҳаҩсыз ахәашаҽны зыԥсҭазаара иалҵыз Лили Бганба аҵыхәтәантәи лымҩахь лынаскьагара ихы алаирхәит. Уаанӡа Аԥыза-министр Алеқсандр Анқәаб иҭижьыз ақәҵарала, Лили Бганба лыԥсыжра аиҿкааразы иаԥҵан аҳәынҭқарратә комисиа. Уи напхгара аиҭон Аԥыза-министр ихаҭыԥуаҩ, афинансқәа рминистр Владимир Делба.
Бганба Лили Дыгәыжь-иԥҳа диит Гагра араион Бзыԥ ақыҭан 1937 шықәсазы, Саратовтәи аекономикатә институт далгеит «Аҳасабеилыргаҩ-економист» ҳәа азанааҭ лыманы. 1982 шықәсазы Москва, КПСС Ацентр Комитет аҟны ауаажәларратә ҭҵаарадыррақәа Ракадемиа далгеит, СССР Аҳәынҭбанк Аԥснытәи аусҳәарҭа аиҳабы ихаҭыԥуаҩыс дыҟан.
Лили Бганба 1972-1992 шықәсқәа рзы Аԥсны ахәаахәҭра аминистрс аус луан, 1987 ш. инаркны 1991 шықәсазынӡа асовет-польшатә еиҩызара Аԥснытәи аҟәша дахантәаҩын.
2005 шықәса инаркны Аԥснытәи аҳәынҭқарратә университет аҟны «Афинансқәеи акредити» ркафедраҿы арҵаҩы еиҳабыс аус луан. Иланашьан «Аџьа аветеран» амедал.
