Хәажәкырамза 23, Аԥсныпресс. Урыстәылатәи Афедерациа Ашәарҭадара Ахеилак Амаӡаныҟәгаҩ Москва ақалақь аҿы Аԥсны Аҳәынҭқарра Ашәарҭадара Ахеилак Амаӡаныҟәгаҩ иԥылара мҩаԥигеит. Урыстәылатәи Афедерациа Ашәарҭадара Ахеилак аофициалтә саит иҟанаҵо адыррақәа рыла, Николаи Патрушеви Сергеи Шамбеи Урыстәылатәи Афедерациеи Аԥсны Аҳәынҭқарреи аидгылареи астратегиатә еиҩызареи рзы ирыбжьарҵаз Аиқәшаҳаҭра аҳәаақәа ирҭагӡаны, ҩ-ҳәынҭқаррак рмилаҭтә шәарҭадара иадҳәалоу азҵаарақәа ирылацәажәеит. Иара убас, аганқәа ашәарҭадара ахеилакқәа раппаратқәа рыбжьара амчратә хылаԥшырҭақәеи азинхьчаратә усбарҭақәеи русеицура арӷәӷәаразы аусмҩаԥгатәқәа азԥхьагәазҭо 2023-2024 шықәсқәа рзы аусеицура аплан рнапы аҵарҩит.